Црна хроника
Малолетникот осомничен за убиството во ГУЦ сè уште во бегство
Полицијата сè уште трага по шеснаесетгодишниот малолетник кој е осомничен за убиството на деветнаесетгодишниот Мухамед Али Јашари, кој настрада во петокот во училишниот двор на средното градежно училиште „Здравко Цветковски“.
Министерката за внатрешни работи, Гордана Јанкулоска вели дека ќе бараат малолетникот да одговара за убиство, но не се знае со каква квалификација ќе оди Обвинителот.„Иницијално нашиот предлог до Обвинителот е кривична пријава за убиство, сепак со каква квалификација ќе оди Обвинителот јас не би можела да кажам бидејќи тој го има последниот збор. Меѓутоа, важно е да испратиме една силна порака дека насилството во било која форма не смее и не може да се толерира“ рече Јанкулоска.Таа смета дека за да се намали насилството во училиштата треба поголема мобилизација на целото општество, а според неа, насилството своите корени ги влече од семејството и домот.„Сметам дека насилството своите корени ги влече можеби од најраната возраст и од онаму каде што се стекнуваат првите знаења односно се стекнува основата на воспитувањето, а тоа е семејството и домот. Секако дека целото општество има улога во воспитувањето на младите луѓе, тука пред сè мислам на педагозите, психолозите, наставниците, но не смее да се потцени и улогата на родителите бидејќи, како што реков, основните и првите знаења децата, уште пред да појдат на училиште, ги стекнуваат во кругот на семејството. Неопходно е да има една поголема мобилизација на општеството и да се едуцираат најмладите припадници на општеството дека секој проблем без разлика колку тој изгледа тежок и нерешлив, мора да се решава низ дијалог и толеранција“ вели Јанкулоска.Безбедноста во училиштата, според Јанкулоска, е во надлежност на градот или општината, а МВР презема мерки во однос на одржувањето на јавниот ред и мир и во делот на репресивниот дел ,односно тогаш кога ќе треба да се казнат сторителите. „Освен овој репресивен дел наша задача е да делуваме на превенција и едукација и токму тоа и го правиме и преку локалните совети за превенција и преку непосредни контакти и преку офицерите за превенција и голем дел од нив одржуваат предавања во голем дел на училиштата, но сепак сметам дека е неопходно да се оди кон една поширока општествена мобилизација“ вели Јанкулоска.Резултатите од обдукцијата од Институтот за судска медицина официјално не ги соопштуваат, велат дека ќе бидат готови за четири до пет дена.Последните неофицијални информации велат дека момчето починало од удар во пределот на срцето.Денеска во училиштето „Здравко Цветковски“ беше одржана комеморација за смртта на ученикот. Во среда Советот на Град Скопје ќе одржи вонредна седница за овој инцидент. Полицијата го уапси второосомничениот за учество во инцидентот, а истражен судија му одреди петнаесетдневен притвор.Според полицијата, причините за инцидентот биле банални. Ученикот кој го преживеа нападот, седумнаесетгодишниот Дарко имал недоразбирања со второосомничениот кој сега е во притвор и кој исто така е ученик во ГУЦ. И двајцата осомничени се од македонска националност.Пред неколку недели второосомничениот го нападнал Дарко пред неговата девојка со шлаканици во населбата каде што живее.Деветнаесетгодишниот Мухамед Али Јашари од Кондово во петокот се обиде да го спаси својот соученик – Македонец, но смртно настрада.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Топ
Две жртви во сообраќајката на патот Радовиш-Штип, уште едно лице повредено
Две лица загинаа на лице место во сообраќајната несреќа што се случи попладнево на магистралниот пат Радовиш-Штип.
Во несреќата е повредена и сопатничката од едното возило, која е пренесена во штипската Болница.
Веста за „Макфакс“ ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.
„На местото на несреќата починале возачите на двете возила, смртта ја констатирал лекар од „ЈЗУ Здравствен дом Радовиш“ а сопатничка од патничкото возило „опел” била пренесена во Медицински центар Штип“, информира Трајанова.
Увид на местото на несреќата врши јавен обвинител, а сообраќајот се пренасочува по стариот пат.
Од полицијата повеќе детали за несреќата најавуваат за утре.
Црна хроника
Приведен скопјанец: се заканувал со ловечка пушка
Утрово во 01.20 часот во село Богомила, општина Чашка, полициски службеници од Полициското одделение Чашка го лишиле од слобода Ѓ.Ѓ.(36) од Скопје, постапувајќи по претходна пријава од Н.Д.(37) од село Богомила.
Ѓ.Ѓ. пред објект во селото со ловечка пушка му се заканил нему и на С.С., М.Д., Б.Ј., Т.Д., П.Б. и Д.Ѓ..
Бил задржан во полициска станица, а известен бил и јавен обвинител и по документирање на настанот протв него ќе биде поднесена соодветна пријава, соопшти полицијата.
Црна хроника
Кривична за директорот на ЈП „Пазари“ Битола: склучил договор за јавна набавка со фирма избришана од Централниот регистар
Одделот за криминалистичка полиција, по наредба од Основното јавно обвинителство Битола презема предистражни дејствија и во координација со СВР Битола поднесе кривична пријава против Б.К. од Скопје поради постоење основи на сомнение за сторено кривично дело „злоупотреба на постапката за јавен повик, доделување на договор за јавнa набавкa или јавно-приватно партнерство“ по член 275-в од Кривичниот законик и против В.А. од Битола поради постоење основи на сомнение за сторено кривично дело „несовесно работење во службата“ по член 353-в од Кривичниот законик. Имено, првопријавениот Б.К., во својство на управител на правно лице од Битола, на 19.12.2019 со неизвршување на обврските од склучен договор за јавна набавка на стоки за проектирање, набавка и монтажа на фотоволтаични панели за производство на електрична енергија со ЈП „Пазари“ Битола нанел штета на претпријатието. Тој дал гаранција за поставените фотоволтаични панели во рок од 25 години, иако знаел и бил свесен дека во предвидениот рок од една година од основањето на друштвото не го внел основачкиот влог на своето друштво согласно чл.186 ст.5 од Законот за трговски друштва поради што истото согласно чл.552-а и чл.552-б од истиот закон било избришано од Централниот регистар. Исто така, Б.К. знаел дека не можел да гарантира за изведените работи, со што постапил спротивно на дадената изјава за сериозност на понудата.
Второпријавениот В.А., во својство на директор на ЈП „Пазари“ Битола со пропуштање на должен надзор во вршењето на своите овластувања и должности, не извршил надзор кој бил должен да го изврши над носителот на набавката дали е активен субјект или не, со што не постапил согласно одредбите од склучениот договор за јавна набавка и не го раскинал. Исто така, В.А. постапил спротивно на чл.101 ст.7 од Законот за јавни набавки и не објавил негативна референца на електронскиот систем на јавни набавки на Бирото за јавни набавки. На тој начин В.А. му овозможил на првопријавениот да се стекне со противправна имотна корист како право да не биде исклучен од идните постапки за јавни набавки во период од шест месеци од денот на евентуалното објавување на негативната референца, а воедно и по доставена фактура одобрил и извршил плаќање кон првопријавениот односно кон неговото правно лице во вкупен износ од 1 298 000 денари со што го оштетил буџетот на ЈП „Пазари“ Битола.