Луис Казарес беше меѓу ретките чиј дом остана недопрен по разорните пожари што ја опустошија населбата Алтадена, североисточно од центарот на Лос Анџелес, во јануари.

Но, кога се вратил, го пречекало отровно изненадување: куќата била покриена со оловен пепел, сосема нездраво за живеење. Неговото осигурување одбило да ги покрие трошоците за чистење.

„Кога ја видовме куќата како стои, бев среќен“, изјави Казарес за „Њузвик“. „Но, се чувствував виновен затоа што ниедна друга куќа не беше поштедена.“ Радоста брзо се претвори во очај – сè што преживеа во куќата беше контаминирано, а Калифорнискиот план ФАИР (државниот план за осигурување од пожар) нудел само трошки.

„Му рекоа дека може сам да ја исчисти“, рече неговиот адвокат, Ерик Страценер. Осигурувањето му плати само 55.000 долари, од кои само 7.000 долари беа за штета, иако експертите проценија дека на куќата ќе ѝ требаат дури 250.000 долари за поправка.

Казарес го тужеше Планот ФАИР во мај, обвинувајќи го за прекршување на договорот и лоша намера. Неговиот случај не е единствен – сè повеќе граѓани тврдат дека биле измамени, а многумина живеат во контаминирани домови или се принудени да се преселуваат од хотел во хотел.

Брачен пар од Пацифик Палисадес, исто така, поднесоа тужба против планот ФАИР бидејќи, и покрај фактот дека нивната куќа не изгорела, не им биле платени отровите од олово, цијанид и метал што останале во нивниот дом.

„Луѓето чекаа предолго за да го добијат она на што имаат право. Осигурителните компании бараат сериски броеви на уништените предмети, што е апсурдно“, рече адвокатот Брајан Ајлсток.

Само пожарот во Алтадена ослободи шест тони олово од оловна боја. „Заврши насекаде – и на километри наоколу. Децата се особено изложени на ризик бидејќи нема безбедно ниво на олово“, предупредува Ајлсток, според „Њузвик“.

Комесарот за осигурување на Калифорнија, Рикардо Лара, во мај призна дека државата нема јасни стандарди за штети од чад повеќе од 30 години. Тој најави формирање работна група за да се изнесат нови правила, но за многумина погодени е предоцна – тие се во неизвесност со месеци, бездомници и опкружени со токсични остатоци.

Казарес сега привремено престојува кај својот брат во Помона и размислува да купи приколка. Изнајмувањето стан е премногу скапо, и иако Планот ФАИР моментално ги покрива неговите трошоци за домување, таа помош наскоро ќе заврши. „Не мислам дека некогаш ќе можам да се вратам во таа куќа“, рече тој. „Мислам дека треба да се сруши“.

Судијата на округот Лос Анџелес минатата недела пресуди дека Планот ФАИР нелегално ги задржува исплатите за штети од чад, што потенцијално отвора врата за илјадници тужби – вклучувајќи ја и онаа на Казарес. „Осигурувањето тврди дека штетата не е покриена, но ние знаеме дека е“, рече адвокатот Страценер. „Имаме силен случај“.

Ревизијата на ЦИА откри недостатоци во подготовката на проценката на американското разузнавање дека рускиот претседател Владимир Путин се обидел да влијае на претседателските избори во САД во 2016 година во корист на Доналд Трамп, но не го оспори тој заклучок.

Ревизијата „не го оспорува квалитетот или кредибилитетот“ на строго доверливиот извештај на ЦИА на кој се потпирале авторите на проценката за да дојдат до тој заклучок, соопшти денес ЦИА.

Но, ревизијата ја доведува во прашање „високата доверба“ во тој заклучок, како што е оценета од ЦИА и ФБИ. Наместо тоа, на заклучокот требало да му се даде оценка „умерена доверба“ што му ја дала Националната агенција за безбедност (НСА).

Трамп ја отфрли проценката на разузнавањето, објавена во јануари 2017 година. По состанокот со Путин во ноември 2017 година, тој рече дека верува оти Путин не се мешал во изборите.

Директорот на ЦИА, Џон Ратклиф, поранешен конгресмен кој беше директор на националното разузнавање за време на првиот мандат на Трамп, нареди преглед и на делот „научени лекции“ „за да се промовира аналитичка објективност и транспарентност“, соопшти ЦИА.

Дирекцијата за анализа на ЦИА, која ја спроведе ревизијата, „идентификуваше повеќе процедурални аномалии“ во подготовката на класифицираната проценка за руското мешање во изборите во декември 2016 година.

Меѓу нив беа „екстремно тесниот временски рок… и прекумерната вклученост на раководителите на агенцијата“, што „доведе до отстапувања од стандардните практики во подготовката, координацијата и прегледот“ на извештајот, се вели во неа.

„Овие отстапувања ја спречија ригорозната примена на експертизата, особено за најспорната оценка на проценката“.

Сепак, ревизијата не ја поништи проценката дека Путин користел дезинформации и сајбер кампања за да влијае на изборите во 2016 година во корист на Трамп.

Одборот на Сенатот за разузнавање дојде до истиот заклучок во извештајот од 2018 година.

Светската здравствена организација (СЗО) вчера ги повика земјите да ги зголемат цените на алкохолот, тутунот и безалкохолните пијалоци за 50 проценти во следните десет години преку даноци за да помогнат во борбата против хроничните болести.

СЗО истакна дека ова ќе помогне да се намали потрошувачката на овие производи, кои придонесуваат за болести како што се дијабетес и некои видови рак, и да се соберат пари во време кога помошта за развој се намалува, а јавниот долг расте.

„Даноците за здравство се едни од најефикасните алатки што ги имаме“, рече помошникот генерален директор на СЗО за промоција на здравјето и превенција и контрола на болести, Џереми Фарар.

„Време е да се дејствува“, додаде тој.

СЗО започна иницијатива наречена „3 до 35“ на Конференцијата на ОН за финансирање на развојот во Севиља. Иницијативата би можела да собере 1 трилион американски долари до 2035 година.

СЗО со децении ги поддржува даноците на тутунот и зголемувањето на цените, а во последниве години повикува на даноци на алкохолот и безалкохолните пијалоци, но ова е прв пат да предложи специфични зголемувања на цените за сите три производи.

Генералниот директор на СЗО, Тедрос Аданом Гебрејесус, на конференцијата изјави дека даноците би можеле да им помогнат на владите „да се прилагодат на новата реалност“ и да ги зајакнат своите здравствени системи со зголемени приходи. Речиси 140 земји веќе ги зголемија даноците и цените на тутунот за просечно повеќе од 50 проценти од 2012 до 2022 година, забележа СЗО.

СЗО разгледува други даночни препораки, вклучително и оние за ултра-преработена храна, и ја финализира дефиницијата за тој вид храна во наредните месеци. Иницијативата е поддржана од Bloomberg Philanthropies, Светската банка (СБ) и OECD и вклучува поддршка за земјите кои сакаат да дејствуваат.