Македонија
Царовска на средба со Сојузот на просветни работници: Со новиот закон се гарантира сигурноста на работните места
По денешната средба на министерката за образование и наука Мила Царовска и претставници на Сојузот на просветните работници на која во фокусот беа измените на Законот за наставници и стручни соработници, но и воопшто реформите со кои се соочува националниот образовен систем особено во делот на основното образование , беше потенциран заеднички заклучок.
„Нашите наставници подолго време апелираа дека се неопходни драстични промени во воспитно – образовниот систем коишто ќе ја подобрат наставата, но и ќе ја подигнат мотивацијата за работа и конечно се задоволни затоа што тие промени се случуваат преку еден плански и заеднички пристап на институциите на системот со сите засегнати страни. Согласно тековните активности и најавените новини од септември, нивните очекувања се со стартот на новата учебна година сликата во училиштата да почне значително да се менува“, се вели во писменото соопштение од министерството за образование и наука.
Од таму информираат дека претставниците на Сојузот изразиле задоволство што конечно со нови законски одредби се намалуваат грижите на наставниците поврзани со сигурноста на работното место и што ќе можат да се фокусираат исклучиво на креативна реализација на наставата. Повеќе нема да има вработувања на определено време, туку само на неопределено, а ќе се трансформира и работниот однос на оние кои во моментов на стапување во сила на законските измени се ангажирани со договори на одреден период, доколку истите ги исполнуваат законските услови.
Велат дека е особено важно што се дефинираат компонентите на платата на наставниците и стручните соработници и што училиштата ќе може да исплаќаат додатоци кои во минатото не се исплаќаа, како додаток за одделенско и класно раководство, додаток за работа во ридско – планинско подрачје и слично. Според нив, праведно е и што со порастот на минималната плата, ќе расте и нивната.
Министерката Царовска рече дека наставниците се најважната алка во воспитно – образовниот процес и од нив, од нивната креативност и мотивација за работа, најмногу зависи квалитетот на генерациите кои излегуваат од училишните клупи. Оттука произлегуваат и новите законски решенија со кои се подобрува општествениот статус на наставниците и на стручните соработници.
„Без вас наставниците не би можеле да ја спроведеме ниту најдобро напишаната реформа на хартија. Важни сте и мора така и да се чувствувате. Сите знаеме колку задоволството од работата и желбата за работа влијаат на крајниот исход и на резултатот. Во овој случај, крајниот исход е поврзан со иднината на државата, со создавањето на квалитетен кадровски потенцијал. Затоа, како Влада излегуваме во пресрет и ќе продолжиме со позитивните политики кои ве засегаат и обезбедуваат повеќе и подобри можности за секој вработен во училиште“, рече Царовска.
Измените на Законот за наставници и стручни соработници се веќе во собраниска процедура и се очекува да бидат усвоени следните неколку денови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Следува променливо облачно време со повремени врнежи од дожд и снег
Времето утре ќе биде променливо облачно со врнежи од дожд, кои локално ќе бидат пообилни (над 25 l/m²), особено попладне и во текот на ноќта. На планините врнежите ќе бидат од снег. Ќе дува засилен ветер од јужен правец (над 60 km/h).
Минималната температура ќе биде во интервал од 7 до 12, а максималната ќе достигне од 10 до 17 степени.
Во Скопје, променливо облачно со повремен дожд, особено кон крајот на денот и во текот на ноќта. Ќе дува умерен ветер од јужен правец. Минималната температура ќе се спушти до 8, а максималната ќе достигне до 14 степени.
Времето во наредните денови
Под влијание на циклонска активност во следните денови времето ќе биде променливо облачно со повремени врнежи од дожд, а на планините од снег. Поради продор на постуден воздух и засилен северен ветер во четврток врнежите ќе преминуваат во снег на повисоките и во некои од пониските места.
На планините во западните делови ќе се формира нова снежна покривка, а помала покривка се очекува и во пониските места. Во петок ќе има преодно стабилизирање на времето, а во деновите од викендот, особено во сабота повторно ќе има локални врнежи од дожд и снег, кои наместа ќе бидат пообилни. Температурите ќе бидат во опаѓање.
Македонија
(Видео) Николоски: 40 километри од автопатот Охрид – Кичево се веќе во функција
Вицепремиерот и министер за транспорт Александар Николоски на својот фејсбук профил објави ноќно видео од автопатот Охрид-Кичево, каде истакнува дека 40 километри од автопатот се ставени во функција.
„Погледнете го ова прекрасно ноќно видео од делот од автопатот Охрид – Кичево. 40 километри се веќе во функција. Се надевам голем број македонски граѓани ќе возат по овој автопат на пат кон Балканскиот Ерусалим – Охрид за овој Божиќ. Честитки на сите вредни работници кои се посветија на неговата изградба! За многу години Божиќ и Бадник!“ порача вицепремиерот Николоски.
Македонија
(Фото) Мицкоски: Бадник не е само ден, туку порака дека заедништвото, љубовта и солидарноста нe прават посилни
„Во пресрет на Бадник, денеска поделивме пакети помош во Карпош, Гази Баба, Чаир, Аеродром, Ѓорче Петров, Кисела Вода, Бутел и Центар со желба секое семејство да ја почувствува топлината на празникот на својата трпеза“, извести премиерот Христијан Мицкоски преку социјалните мрежи.
„Бадник не е само ден, туку порака дека заедништвото, љубовта и солидарноста нe прават посилни“, додаде Мицкоски.

