Против две лица, меѓу кои еден нотар од Гостивар и една фирма, тетовската полиција поднесе кривични пријави поради сомнение за низа тешки кривични дела, меѓу кои лихварство, фалсификување и злоупотреба на лични податоци.

Главниот осомничен е Т.В. (39) од селотото Неготино, Гостиварско, кој од 2022 година до моментот на пријавувањето,  ја искористувал тешката материјална состојба на едно лице од Гостивар и во повеќе наврати му позајмувал пари со екстремно високи камати. За заем од 35.000 евра, побарал 15.000 евра камата за една година, а потоа, месечно, дополнително по 3.000 евра камата.

Кога оштетениот не можел да ги врати парите, Т.В. со присила и закани го натерал да потпише договор за купопродажба на недвижен имот, заверен кај нотар.

Истиот осомничен, на 27 септември 2023, изготвил и фалсификуван договор за купопродажба на моторно возило кај нотар, во време кога оштетениот бил надвор од државата.

Кривична пријава доби и второосомничениот Ј.Д. (48) од село Добри Дол, кој во својство на овластено лице во нотарската канцеларија во Гостивар, без присуство на оштетениот, на истиот датум заверил договор за купопродажба на возило вредно 1.000 евра на име на И.А. од Гостивар. Од МВР појаснуваат дека без согласностна оштетениот, прибрал, обработувал и користел негови лични податоци и заверил лажен договор.

Истрагата се води за кривични дела: „лихварство“, „употреба на исправа со невистинита содржина“, „фалсификување на исправа“, „злоупотреба на лични податоци“ и „несовесно вршење на службата“.

Четириесет и тригодишен маж е осомничен дека по расправија го убил својот една година помлад брат, а потоа неколку дена се обидувал да го прикрие злосторството.

Како што соопшти Основното јавно обвинителство, убиството се случило вечерта на 27 јули, во дневната соба од домот на жртвата. Меѓу браќата најпрвин избувнала вербална расправија, која завршила трагично – осомничениот неколку пати го удрил својот брат со метален предмет по главата, нанесувајќи му смртоносни повреди.

Во деновите што следеле, осомничениот презел серија чекори за да го сокрие злосторството – ја исчистил крвта од подот и од предметите, а телото го преместил во помошна просторија во дворот, каде што го закопал и го покрил со шперплоча и други предмети, надевајќи се дека нема да биде откриен.

Обвинителството поднесе предлог до судот за определување мерка притвор, со образложение дека постои опасност осомничениот да се обиде да избега или дополнително да уништува докази.

За да нема прекин на воспитно-образовниот процес на учениците што имаат посериозни здравствени предизвици и се на болничко лекување повеќе од три недели, Министерството за образование и наука во соработка со Министерството за здравство и Здружението САНО, кое им помага на децата заболени од канцер или други малигни и хронични болести, од септември воведува формално образование во здравствените установи. Во зависност од здравствената состојба, ќе може да се вклучат онлајн на наставата во својот клас, да се организира индивидуална настава или преку асинхрона комуникација да добиваат материјали и да ги решаваат домашните задачи.

Ова денес беше соопштено од страна на министерката за образование и наука Весна Јаневска, која заедно со министерот за здравство Азир Алиу и претседателката на САНО, Марија Вук, ја посетија Клиниката за детски болести.

„Децата со сериозни здравствени предизвици најчесто се соочуваат и со дополнителни образовни предизвици. За жал, на Детската клиника секогаш има дечиња што се наоѓаат на подолготрајно лекување поради што не може да ја следат редовната настава. Но, за ова постои решение и новата Влада со поддршка од граѓанскиот сектор го дефинира и го уреди системски и отсега повеќе нема да биде како во минатото кога всушност и постоеше една неправда, па би рекла и дискриминација кон децата со сериозни здравствени предизвици“, рече Јаневска.

Министерката посочи дека секое дете на школска возраст, кое е сместено на Клиниката за детски болести повеќе од три недели, додека трае учебната година, ќе може онлајн да се вклучи во наставата во својот клас или, пак, наставникот ќе организира индивидуална настава во зависност од здравствената состојба на ученикот и тоа по наставна програма приспособена на неговата состојба. За оваа цел се користат истите дигитални алатки што ги користат и другите ученици, ЕДУИНО и платформата за дигитални интерактивни учебници. Училиштето во кое е запишан ученикот може да му додели електронски уред од фондот на таблет-компјутери, кои МОН ги има обезбедено и доставено до училиштата.

Доколку училиштето има доволен кадровски потенцијал, наставникот може и да го посетува ученикот во здравствената установа и таму да ја реализира наставата, но тоа повторно зависи од состојбата и можностите на ученикот.

Јаневска информира дека за време на распустот се организираат обуки за ефикасна работа на наставниците на далечина.

„Сакам да потенцирам дека ниедно дете не смее да биде лишено од образование само затоа што се лекува. Болеста не значи изолација, прекин или заборавеност. Напротив – болеста е предизвик, а ние како општество им должиме поддршка, структура и надеж. Со инвестирање во нивното знаење инвестираме во една поправедна, поемпатична и посилна иднина“, додаде Јаневска.

Министерот за здравство Алиу рече дека покрај овозможување највисоко ниво на здравствена заштита од терциерен карактер на клиниката, оваа иницијатива претставува значаен чекор кон целосна инклузија на болните деца и нивно побрзо враќање во училишните клупи.

„За нас, најважна е целосната грижа за децата – не само нивното оздравување, туку и нивниот образовен и психосоцијален развој“, рече Алиу.

За директорот на Клиниката за детски болести, Реџеп Мемеди, вклучувањето на децата од болница во формалното образование значи половина здравје, односно полесно поминување на долготрајниот пат на лекување.

Марија Вук, претседателка на САНО, изрази благодарност што по повеќегодишна заложба за формално образование во здравствените установи, актуелното раководство на МОН ја прифати иницијативата додавајќи дека граѓанското здружение почнува јавна кампања за подигнување на свеста за образованието на децата на подолготрајно лекување.