Свет
(Видео)Тепачка во џамија во Турција: Верниците ги прекршија корона-мерките, полицијата реагираше со солзавец

Во регионот Газиантеп во југоисточна Турција, во џамија настана тепачка во која учествуваа собраните верници и членови на Фондацијата „Фуркан“ од една страна и припадници на полициските сили од друга страна, пренесуваат турските медиуми.
Со оглед на тоа што на сила е целосната блокада поради пандемијата со коронавирусот, што, меѓу другото, значи и забрана за собирање во затворени простории, членовите на организацијата „Фуркан“ изразија незадоволство од ваквата одлука на Ердоган и неговата партија.
Лидерите на организацијата истакнаа дека забраната за собирање во џамии подразбира лишување од верските права и слободи.
Во знак на протест, членовите на организацијата се собраа во една од џамиите во Газиантеп на молитва, а лидерите на движењето истакнаа дека сите собрани ќе го почитуваат растојанието и ќе носат маски во џамијата.
Сепак, многу брзо откако се собраа полициските сили влегоа во џамијата и им наредија на верниците да се разотидат. Кога тие одбиле, се судриле со полицајците кои со солзавец ја растерале толпата. Според турските медиуми, полицајците кои користеле солзавец биле суспендирани.
„Ова не е Израел, ова е Турција. Оние кои им дозволуваат на луѓето да се собираат на стадионите, јавниот превоз и бизнисот и покрај епидемиолошките мерки, ги спречуваат верниците да се молат во џамиите“, велат од организацијата.
Фондацијата „Фуркан“е позната во Турција по бројните политички ексцеси, а по новиот инцидент, нивниот водач рече дека ќе продолжи да инсистира на собири во џамиите.
Инаку, заклучувањето во Турција започна на 29 април и ќе трае вкупно три недели. Како дел од новите епидемиолошки мерки, турските власти забранија собири на верници во џамиите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Сијарто: Зеленски го изгуби контактот со реалноста

Украинскиот претседател Володимир Зеленски целосно „го изгуби чувството за реалност“ ако мисли дека може сам да одлучи дали неговата земја ќе биде примена во Европската Унија, изјави министерот за надворешни работи на Унгарија, Петер Сијарто.
Европската Унија му додели на Киев статус на кандидат во 2022 година и ја постави 2030 година како крајна дата за членство. Будимпешта се спротивстави на процесот уште од самиот почеток, предупредувајќи дека приемот на Украина би можел да ги зголеми тензиите со Русија и да им наметне децении воена помош на даночните обврзници на ЕУ. Во средата, Зеленски ја обвини Унгарија дека го блокира пристапувањето за премиерот Виктор Орбан да профитира политички со критикување на ЕУ и Украина.
„Украина стана едно од средствата со кои Орбан може да ја зголеми популарноста на својата партија“, рече Зеленски на прес-конференција, додавајќи дека „Киев ќе влезе во ЕУ без оглед на ставот на Будимпешта“.
Сијарто одговори на тие обвинувања во емисијата „Час на воинте“..
„Мислам дека украинскиот лидер целосно го изгубил чувството за реалност и можеби тоа е причината зошто зборува такви глупости“, рече Сијарто. „Кој ќе стане член не одлучуваат оние што сакаат да влезат, туку оние што веќе се внатре. И тоа мора да биде едногласна одлука. Додека сите не се согласат дека некој треба да стане член, тоа нема да се случи – тоа не е ракетна наука.“
Тој потсети дека Унгарците веќе го изразиле своето мислење за ова прашање – на националниот референдум во јуни, повеќе од два милиони гласачи, или 95 проценти, го отфрлија членството на Украина во ЕУ.
Унгарија, потсетуваат медиумите, не е сама во својот став. Словачкиот премиер Роберт Фицо, како и неколку полски функционери, исто така изразија противење. Според истражувањето на агенцијата IBRiS, само 35 проценти од Полјаците денес го поддржуваат влезот на Украина во ЕУ – во споредба со дури 85 проценти во 2022 година. Податоците на Евробарометарот од септември покажуваат дека само 28 проценти од Чесите го поддржуваат пристапувањето, додека повеќе од половина од граѓаните на Франција и Австрија се противат на тоа, пренесуваат агенциите.
Фото: принтскрин
Свет
Зеленски: Украина ја зголемува употребата на оружје со долг дострел

Претседателот на Украина, Володимир Зеленски, денес изјави дека имал детална дискусија со военото раководство на земјата за употребата на оружје со долг дострел, вклучувајќи ракети и беспилотни летала, како и за потребата од зајакнување на таканаречените „далакусежни санкции“ против Русија.
„Разговаравме детално за употребата на нашето оружје со долг дострел, нашите ракети и беспилотни летала. Разговаравме и за производството, снабдувањето на армијата и обуката на екипите. Целта е да бидеме значително поактивни во подготовката и примената на долгорочните санкции против Русија. Колку сме поефикасни во нашиот дострел, толку побрзо ќе постигнеме мир“, рече Зеленски, објави Укринформ.
Тој истакна дека „Украина не води војна заради војна“, за разлика од Русија, туку дека сака да постигне мир. Додаде дека дури и Хамас сега покажува подготвеност за преговори, додека, како што рече, „диктаторот Владимир Путин“ продолжува да одбива.
Зеленски, исто така, нагласи дека Украина, заедно со меѓународните партнери, создава услови за „принудување на Русија на мир“. „Ги поддржуваме сите глобални дипломатски напори за мир на Блискиот Исток и цврсто веруваме дека праведниот притисок врз Русија ќе донесе мир во Украина и во целиот наш регион. Важно е американското раководство да остане активно“, заклучи Зеленски.
Тој претходно го поздрави напредокот кон мир на Блискиот Исток, велејќи дека „Русија останува главен извор на војна и терор во светот“.
Фото: принтскрин
Свет
Белгискиот премиер цел на терористички напад: уапсени три лица

Три лица, родени во 2001, 2002, 2007 година, беа уапсени денес во Белгија под сомнение за планирање терористички напад инспириран од радикален ислам, објави федералната обвинителка Ан Францен на вонредна прес-конференција, а локалните медиуми објавија дека белгискиот премиер Барт де Вевер бил цел на нападот.
„Тие беа лишени од слобода како дел од истрагата за обид за терористичко убиство и учество во активностите на терористичка група“, рече Францен, објави Фламанската радио-телевизија (VRT).
Како што дознава VRT, цел на нападот требало да бидат белгиски политичари, вклучувајќи го и белгискиот премиер Барт де Вевер.
За време на претресот на станот на еден од осомничените, федералната полиција пронашла рачно изработена експлозивна направа што личи на импровизирана експлозивна направа (IED), како и торба со челични топчиња, а според првичните информации, експлозивот не бил активиран.
Кај вториот осомничен е пронајден 3Д печатач, за кој се верува дека е користен за изработка на делови од експлозивна направа.
Исто така, постојат докази дека осомничените планирале да користат дрон за носење експлозиви.
Двајца осомничени биле испрашувани во седиштето на федералната полиција во Антверпен и ќе бидат изведени пред истражен судија, додека третото лице беше ослободено во текот на денот, пренесуваат медиумите.
Белгискиот министер за правда, Анелис Верлинден, изјави дека овој случај „ги погодува темелите на белгиската демократија“ и ја пофали брзата и решителна реакција на обвинителството и полициските служби.
Фото: принтскрин