Култура
Објавен јавниот повик за 4. издание на фестивалот на светлината Skopje Light Art District-The Sun
ЈУ Универзална сала со поддршка на Град Скопје објави јавен повик за поднесување апликации за четвртото издание на фестивалот на светлината – Skopje Light Art District (SkLAD).
Главната тема на ова издание ќе биде Сонцето како непресушен извор на светлина и бесконечен извор на енергија. Врската помеѓу Сонцето и Земјата го создава и оддржува целокупниот живот на планетата. Уште од самите почетоци на човештвото Сонцето симболизира врховна моќ, знаење, божественост, енергија, сила и повторно раѓање
SkLAD е основан во 2018 година со цел да создаде нов културен и социјален настан со фокус на светлосната уметност. Преку минатите изданија во 2018, 2019 и 2020 година, SkLAD успешно го претстави Скопје на мапата на европски фестивали на светлината, презентирајќи светлосни инсталации и уметност во нови медиуми на водечки уметници од светот, преку нивно истакнување на домашната уметничка сцена.
SkLAD цели да создаде соработка со други регионални настани и фестивали на светлината со која дополнително ќе се зајакне важноста на Скопје како еден вид нов центар за современата уметност.
На конкурсот право на учество можат да земат сите заинтересирани автори кои креираат во сферата на светлосната уметност, светлосните инсталации, видеоарт или го користат светлото како главен израз на визуелно и уметничко изразување.
Заинтересираните уметници, покрај официјалната пријава, потребно е до организаторите да достават и наслов, детален опис, скици, концепт на предлог-проектот, проект дизајн, програма со предлог финансиска конструкција за реализација на истата; да наведат локација за која се аплицира; фотографии и/или видео од делата доколку истите биле претходно изложени; потребна опрема за реализација на делото; професионално портфолио и кратка биографија/CV на уметникот/уметничката група.
Повеќе информации околу повикот, начините на финансирање и останатите детали поврзани со 4-тото издание на Skopje Light Art District, може да се најдат на официјалната веб-страница на фестивалот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Долг аплауз за Камерниот оркестар на Националната опера и Балет во Виена
Министерот за култура и туризам, Зоран Љутков, вчеравечер, во познатата Почесна сала (Ehrbar Saal) во Виена го проследи концертот на Камерниот оркестар на Националната опера и Балет, чиј настап многубројната публика го поздрави со долг аплауз.
На концертот, на кој присуствуваа и македонскиот амбасадор во Австрија, Освит Росоклија, амбасадорот на ОБСЕ, Пајо Авировиќ, како и претставници од дипломатскиот кор, Камерниот оркестар на НОБ, под диригентската палка на италијанскиот маестро Џанлука Мартиненги, изведе композиции од: Пучини, Бритен, Цанев, Аврамовски, Имери и Шуплевски.
Специјална гостинка на вечерта беше истакнатата пијанистка Горјана Стојановска, чиј настап ја збогати уникатната можност да се слушне македонската музика на едно од најпрестижните места во Виена продолжувајќи ја традицијата на меѓукултурна размена и промоција на македонската уметност во светот.
Култура
„Нова надеж“ – мултимедијален настан на „Терапија“ во Спомен-костурницата во Велес
На 11 Октомври – Денот на македонското востание, музичката платформа „Терапија“ организира мултимедијален настан на Спомен – костурницата во Велес. Имено, станува збор за јавен објект кој е дел од домашното културно наследство. Честопати нарекувана и како „Герника на Македонија“, оваа Спомен – костурница е изградена во знак на сеќавање на партизаните кои се бореле за слобода на Велес и за слобода на Македонија, во периодот на Народноослободителната борба (НОБ).
Токму во петок, од 18:00 часот, ова спомен – обележје ќе добие дополнителна вредност, а новите генерации ќе можат да посведочат на музички и визуелен перформанс налик настаните во Европа и светот.
Мултимедијалниот настан „Нова надеж“ ќе го модерираат нашите реномирани актери Тони Михајловски и Камка Тоциновски. Свое учество во музичкиот дел ќе земе и единствениот Игор Џамбазов придружуван од Харе, кои ќе изведат неколку култни македонски песни кои имаат оставено траен белег на домашната културна сцена.
Во последниот дел од настанот прилагодени DJ сетови ќе имаат и нашите артисти Ивана Драгшиќ и Александар Гроздановски – HERZEL.
„Терапија“ ги поканува сите граѓани да бидат дел од овој уникатен настан и од одбележувањето на 11 Октомври – Денот на македонското востание.
Мултимедијалниот настан „Нова надеж“ е поддржан од Министерството за култура и туризам, Конзулат на Република Србија во Куманово (почесен конзул), СКОПСКО, ABSOLUT и BWI.
„Терапија“ веќе неколку години креира и одржува настани од мултимедијален карактер на јавни објекти кои се дел од домашното културно наследство. Основната цел е да се даде „нов живот“ на овие обележја, да се афирмира културното наследство меѓу новите генерации и да се промовираат домашните артисти.
Култура
Изложба на живи статуи – Која си? А која сакаш да бидеш?
На 13 октомври, во 17:30 часот, во Red Door на Илинденска 38 a, ќе ве пречека уникатна изложба на скулптури – но не во традиционалната смисла. Овојпат, скулптурите ќе бидат живи статуи.
Преку свеж и креативен пристап, оваа изложба ќе ја претстави жената во различни социјални улоги, поврзувајќи ја темата со животните предизвици што ги носат овие улоги. Мотото на настанот, „Која си ти? А која сакаш да бидеш?“, повикува на размислување и интроспекција. Пет девојки, како живи статуи, ќе ги отелотворат различните категории на жени – од најниската до највисоката, застанати во пози кои го одразуваат нивниот социјален статус и различност.
Публиката ќе има можност не само да ја набљудува оваа уметничка инсталација, туку и активно да учествува – поставувајќи прашања, коментирајќи и споделувајќи мислења по изложбата.
„Особено сме горди што ќе ни се придружат четири девојки од Косово, кои за време на изложбата ќе демонстрираат како настануваат живите статуи – додавајќи уште една димензија на креативност и интеркултурна соработка“.
Проектот е воден од Весна Николовска, дел од Театроск, и ова е нејзино прво самостојно дело, со голема поддршка од тимот на Театроск. Настанот е овозможен преку грант од RYCO – Младински културен фонд за Западен Балкан.
Дополнително, октомври е месецот за подигнување на свеста за борба против ракот на дојка. Оваа изложба е директно поврзана со оваа тема, потсетувајќи нè на влијанието што стресот го има врз жените кои се соочуваат со оваа болест. Повторно, прашањето останува исто: „Која си ти? А која сакаш да бидеш?“