Свет
Се очекува чуден пресврт во случајот со актерот Кевин Спејси

Се очекува да биде отфрлена граѓанската постапка против холивудскиот актер Кевин Спејси, во која се наведува дека актерот сексуално нападнал тинејџер во 80-тите години на минатиот век, откако адвокатите соопштија дека жртвата одбила да излезе во јавност со своето име и презиме.
Федерален судија минатата недела донесе одлука дека човекот – идентификуван во судските документи како Ц.Д. кој тврдеше дека Спејси сексуално го нападнал кога имал 14 години, мора јавно да го открие неговиот идентитет.
Судијата Луис А. Каплан утврди дека јавноста има легитимен интерес да го открие идентитетот на жртвата, забележувајќи во овој случај „дека интересот е зголемен затоа што Ц.Д. ги изнесе своите обвинувања против јавната личност“.
Адвокатите на жртвата вчера доставиле писмо до судот во Њујорк, во кое го известиле судијата за одлуката и се согласиле да го отфрлат случајот поврзан со Ц.Д., пренесе Си-Ен-Ен.
„ Како што претходно го информиравме Судот, Ц.Д смета дека тој не е во состојба да ја издржи инвазијата во неговиот живот доколку неговиот идентитет биде откриен во овој случај“, напишаа адвокатите.
„ Всушност, дури и одлуката на Судот за ова прашање поттикна повеќе вести во сите форми на медиуми, како на национално така и на меѓународно ниво. Ненадејното несакано внимание што ќе го открие неговиот идентитет е едноставно премногу за него”, рекоа тие.
Актерот Ентони Рап, кој му се придружи на Ц.Д. во граѓанската постапка против Спејси, тврди дека актерот имал несакан сексуален контакт со него кога имал 14 години, според тужбата. Инцидентот наводно се случил во куќата на актерот во 1986 година.
Адвокатите исто така напишаа дека имаат намера да го отстранат Ц.Д. од постојниот случај со Рап, а предметот да се паузира додека се обработува жалбата.
Во 2017 година, Спејси се извини за она што го нарече „длабоко несоодветно пијано однесување“, откако Рап ги изнесе обвинувањата, но исто така рече: „Искрено не се сеќавам на состанокот“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Габи Новак беше вистинска дама на југословенската поп-музика

Пејачката Габи Новак (1936–2025) беше вистинска дама на југословенската и хрватската забавна музичка сцена, вели музичкиот публицист и новинар Бранимир Локнер.
Во врска со веста за смртта на Габи Новак, Локнер изјави за „Танјуг“ дека првата фаза од нејзината кариера вклучувала поп, твист и други жанрови од шеесеттите години, потоа помек вокален џез.
Според него, нејзиниот стил се менувал низ годините и таа се обидела и со шансона, „што може да се види од композициите што ги направил нејзиниот сопруг Арсен Дедиќ (1938–2015)“.
Локнер рече дека Габи Новак не била фокусирана само на една музичка форма, а нејзиниот музички опус во однос на дискографијата, особено сингловите, е многу богат и таа била присутна на сцената континуирано.
Според неговите зборови, изведбата на Габи Новак на песната „Вино и гитари“ „до ден денес останува една од најголемите екс-џу еврегрини од 1960-тите“.
„Во првата фаза од нејзината кариера, таа беше покомерцијална, а нејзиниот подоцнежен пристап немаше таков комерцијализам, но беше препознаена и ценета. Секогаш ја сметаа за дама“, истакна Локнер.
Како што додаде, Габи Новак беше учесник на бројни забавни музички фестивали на домашната музичка сцена, а нејзината кариера беше придружена со релевантна дискографија.
Локнер додаде и: „Нејзините најплодни години во креативна смисла беа во втората половина на шеесеттите и првата половина на седумдесеттите“.
Свет
Трамп: Во првите две минути од средбата со Путин ќе знам дали може да се постигне договор

Американскиот претседател Доналд Трамп денес изјави дека украинскиот претседател Зеленски може да присуствува на неговиот самит со рускиот лидер Владимир Путин во Алјаска во петок, но изрази скептицизам дека тоа ќе направи разлика во постигнувањето мировен договор, објави денес телевизиската мрежа Си-Ен-Ен.
„Тој (Зеленски) не беше дел од тоа. Би рекол дека може да оди, но беше на многу состаноци. Знаете, тој е таму три и пол години. Ништо не се случи“, им рече Трамп на новинарите во Белата куќа.
„Ќе имаме состанок со Владимир Путин и на крајот од тој состанок, веројатно во првите две минути, ќе знам точно дали може да се постигне договор или не“, рече Трамп.
На прашањето на новинарите „како ќе го знаe тоа“, Трамп одговори: „Затоа што тоа го правам. Склучувам договори“.
Трамп подоцна додаде дека состанокот меѓу Путин и Зеленски ќе биде неопходен.
„На крајот на краиштата, ќе ги ставам двајцата во иста просторија. Или ќе бидам таму, или нема да бидам таму, и мислам дека ќе се среди“, рече Трамп.
Претседателот на САД рече дека „може да има многу дефиниции“ за добар договор, но исто така, според „Си-ен-ен“, се чини дека ги намали очекувањата пред самитот во петок.
„Се радувам на средбата со Путин за која мислам дека ќе биде добра, но може да биде и лоша“, рече Трамп.
Свет
Канаѓанец преживеал 9 дена во дивината, спасен благодарение на порака на камен

Маж кој исчезна пред повеќе од една недела во огромната дивина на Британска Колумбија, Канада, е пронајден жив откако го напишал зборот „Помош“ на карпа и напишал „СОС“ во калта.
Ендру Барбер (39) преживеал девет дена пиејќи вода од локва и градејќи импровизирано засолниште додека спасувачите не го пронашле, пишува „Би-би-си“.
Барбер исчезнал на 31 јули во близина на езерото Меклис, околу 587 километри северно од Ванкувер, откако неговиот камион се расипал. Девет дена подоцна, на 8 август, хеликоптер на Кралската канадска коњаничка полиција (RCMP) го забележал неговото возило на шумски пат, што значително ја стеснило областа за пребарување и на крајот довело до негово спасување.
Полициски хеликоптер набрзо го забележал Барбер во близина на неговото импровизирано засолниште. Пораката „ПОМОШ“ што ја напишал на каменот го привлекла нивното внимание. Тој бил тешко дехидриран и имал повреда на ногата, но сега е „прилично добро“.
„По повеќе од една недела во дивината, тој беше пронајден жив за време на воздушното пребарување денес“, објави локалната волонтерска група за пребарување и спасување Quesnel Search & Rescue на Фејсбук. „Овој исход е резултат на безброј часови на земја и во воздух, користејќи секој ресурс и технологија што ни е достапна“.
Спасувачкиот тим, исто така, сподели фотографија од засолништето што Барбер го изградил од стапчиња и кал, потпрен на карпа на која напишал порака за помош. По спасувањето, тој бил однесен во болница, каде што бил лекуван и отпуштен.
Барбер јадел што можел да најде додека бил во шумата. „Тој буквално сркал валкана вода од езерцето за да остане хидриран“, рече тој. „Човечкото тело може да издржи долго време без храна, но ситуацијата е поинаква со водата.“
Боб Цимерман, претседател на „Кеснел Рискју“, изјави за CBC News дека не е сигурен дали Барбер „ќе издржеше уште 24 часа ако не го пронајдовме ние“.