Топ
Мигрант заврши зад решетки поради напад и разбојништво врз други мигранти во Липково

Основното јавно обвинителство Куманово поведе постапка против лице на возраст од 21 година, државјанин на Пакистан, поради разбојништво.
Осомничениот на 18 јули, околу пладне, во атарот на селото Лојане, општина Липково, во состав на група со уште девет непознати лица пресретнал мигранти што се движеле пеш по што, упатувајќи закани кон нив, почнале со метални шипки да ги удираат по главите и телата.
„Од секој од оштетените одзеле пари во износ од 600 до 800 евра, а од некои од нив и златен накит, кој оштетените го носеле со себе. Осомничениот заедно со други засега непознати лица од групата ги задржал оштетените заканувајќи им се за животот сѐ до моментот кога биле откриени од страна на полициските службеници по што непознатите лица од групата се разбегале во непознат правец, а осомничениот бил фатен од полициските службеници“, соопшти Обвинителството.
Јавниот обвинител од Основното јавно обвинителство Куманово до судијата на претходна постапка при Основниот суд во Куманово поднесе предлог за определување на мерката притвор против осомничениот бидејќи постои основан страв дека ќе ја попречува кривичната постапка со влијание врз сведоците, како и оправдан страв дека може да се даде во бегство, но и да го повтори кривичното дело доколку се брани од слобода.
Судијата на претходна постапка, по спроведена постапка, донесе решение, со кое на осомничениот му определи притвор во траење од 30 дена.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Од идеја до бизнис со помош на државата, Владата обезбеди 40 милиони евра

Министерот за економија и труд, Бесар Дурмиши, денеска престојуваше во Тетово каде што оствари работна посета и средба со граѓани, локални претприемачи и претставници на институции. Целта на посетата беше директна презентација на активните мерки за вработување кои се предвидени со Оперативниот план за 2025 година.
Овој план, кој се спроведува преку Агенцијата за вработување, е една од клучните алатки на Владата за зголемување на вработеноста и поттикнување на претприемништвото. За неговата реализација, во 2025 година се издвоени над 40 милиони евра, што претставува највисок досега буџет наменет за оваа цел.
„Преку Оперативниот план за вработување, државата првпат системски пристапува кон решавање на невработеноста – не само преку финансиска помош, туку и со структурна поддршка, менторство и обука. Граѓаните добиваат реална можност да започнат сопствен бизнис, да креираат работни места и да придонесат во локалната економија“, истакна министерот Дурмиши.
Во рамки на Планот за 2025 година, активни се три главни мерки за самовработување:
Мерка 1.1 – Финансиска поддршка до 7.000 евра за лица постари од 29 години кои сакаат да отворат сопствен бизнис. За работодавачите кои ќе вработат лице со попреченост, се предвидува дополнителна поддршка од 4.000 евра.
Мерка 1.2 – Поддршка до 10.000 евра за млади лица до 29 години кои имаат одржлива и иновативна бизнис-идеја.
Мерка 1А – Поддршка до 20.000 евра за формирање на заеднички бизнис од страна на најмалку две невработени лица.
Сите мерки се спроведуваат преку интегриран пристап, кој опфаќа: идентификација на потреби, професионално советување, обука, развој на бизнис-план, административна поддршка и менторство во првите 12 месеци од работењето.
„Наша цел е да изградиме економија базирана на знаење, иницијатива и локален развој. Овие мерки не се само финансиски поттик – тие се платформа за личен и професионален напредок. На младите не им велиме само да останат тука – туку им даваме услови за да успеат“, нагласи министерот Дурмиши.
Во рамки на теренската комуникација, министерот ќе продолжи со посети во повеќе општини – Гостивар, Кичево, Липково, Сарај и други – со цел директно информирање и вклучување на граѓаните во овие програми.
Аплицирањето за мерките веќе е започнато, а до крајот на вчерашниот ден се регистрирани над 2.500 апликации.
Топ
Маж нападнал девојче со нож, полицијата пукала за да го спречи, но тој избегал

Велешката полиција вчера попладне испукала неколку предупредувачки куршуми во воздух во обид да го спречи нападот од 23-годишно лице кое држело остри предмети и се заканувало на граѓани и на полициски службеници. Осомничениот успеал да побегне, но неговиот идентитет е познат и по него се трага.
Инцидентот се случил на 13 јуни 2025 година, околу 18 часот, кога во СВР Велес бил пријавен физички напад врз малолетно девојче на улицата „Хаџи Косте“ во Велес. Нападот го пријавил нејзиниот татко, 25-годишниот Е.Х. од Велес, кој информирал дека неговата ќерка била нападната од С.У. (23) од Велес, кој користел и метален предмет при нападот. Дополнително, откако на местото пристигнала и мајката на девојчето, 27-годишната сопруга на пријавителот, С.У. и кон неа упатил закани.
На местото на настанот интервенирале полициски службеници кои го затекнале С.У. со остри предмети во рацете. Му дале наредба да ги фрли предметите, но тој не се придржувал, продолжил да им се заканува и се движел кон нив со намера да ги нападне.
Во тој момент, полицијата испукала еден предупредувачки куршум во воздух и повторно му наредила да ги остави предметите. И покрај тоа, С.У. продолжил со заканувачко однесување, по што бил испукан и втор предупредувачки куршум. Дури тогаш, напаѓачот го фрлил еден од предметите и почнал да бега.
Полицајците испукале уште два предупредувачки куршуми додека го следеле бегалецот, кој во меѓувреме го фрлил и вториот остар предмет. Двата предмети се пронајдени и одземени од страна на полицијата.
За случајот се известени јавен обвинител и Центарот за социјални работи Велес, а по С.У. интензивно се трага.
Економија
Мицкоски: Земјоделците се херои на денешницата, Владата останува посветена на нивната поддршка

На манифестацијата „Од нива до трпеза“, која денеска се одржува во Скопје, премиерот Христијан Мицкоски упати јасна порака за поддршка на македонските земјоделци, нагласувајќи дека Владата силно се залага за развојот на земјоделскиот сектор и поддршка на оние кои го одржуваат аграрот жив.
„Македонија има потенцијал – и тоа не е празна фраза, туку фактичка состојба. Имаме сонце, имаме вода, имаме плодна почва, но најважно од сè – имаме луѓе. Луѓе кои не се плашат да станат рано наутро, да ги извалкаат рацете во кал, да работат до доцна навечер. Тие се тивките херои на нашето време. Тие се темелот на нашата економија, чуварите на традицијата и креаторите на иднината“, изјави премиерот.
Мицкоски подвлече дека земјоделството е еден од стратешките приоритети на Владата, наведувајќи дека во последните 11 месеци биле исплатени повеќе од 8 милијарди денари за субвенции и други форми на финансиска помош за земјоделците.
„Ова не се празни ветувања – ова се мерливи резултати. Тие говорат за нов пристап, нова енергија и визија со која сакаме да го издигнеме земјоделството, да ги поттикнеме младите генерации да се вклучат во овој сектор, и пред сè – да ја зајакнеме довербата кај секој земјоделец“, рече премиерот, апелирајќи до граѓаните да избираат македонски производи и со тоа директно да го поддржат домашното производство.
На манифестацијата учествуваат 25 општини од целата земја, претставувајќи уникатни традиционални производи како што се домашни вина, печива, мед и рачни изработки.
Настанот е во организација на здружението „Наша традиција, наша иднина“, со поддршка од Министерството за земјоделство, шумарство и водостопанство. Главната цел е да се истакне богатството на македонската традиционална храна и да се промовира руралниот туризам како ресурс со сериозен економски и културен потенцијал.