Црна хроника
Полицијата нема докази дека Шукри бил „менторот“ за убиствата кај Смилковци
Министерството за внатрешни работи нема докази дека Алија Шукри бил идеологот и „мозокот“ на петкратното убиство кај Смилковското езеро што се случи во април годинава.
Министерката за внатрешни работи, Гордана Јанкулоска еден ден по екстрадицијата на Алија Шукри од Косово изјави дека нема да коментира никакви информации кои се пласирани во јавноста за неговата поврзаност со „Монструм“.
„За секое лице за кое ќе обезбедиме докази дека сторило кривично дело, без размислување ќе поднесеме кривична пријава. МВР не ги коментира медиумските прилози односно слободата на уредувачката политика на медиумите, МВР поднесува кривични пријави врз основа на докази за сторено кривично дело. Ние ниту од поднесувањето на кривичната пријава до денес немаме нешто ново што би сметале дека треба да додадеме или да смениме“ изјави Јанкулоска.
Во средата попладне Шукри, кој беше баран со меѓународна потерница, беше екстрадиран од Косово во Македонија, а полициските власти, повикувајќи се на оперативни сознанија, го претставија како еден од најголемите приврзаници и идеолози на радикалниот ислам во Македонија и во поширокиот регион.
МВР не исклучува дека Шукри имал некое влијание врз сторителите на грозоморното убиство кај Смилковци.
„Досега лицето не фигурира во кривичната пријава, којашто беше поднесена од страна на МВР против осомничените сторители и помагачи во врска со грозоморното убиство на Смилковското езеро Но сепак, ќе се проверува неговата евентуална инволвираност и неговата евентуална улога, бидејќи не е исклучено дека имал некакво влијание врз сторителите, имајќи го предвид фактот дека според оперативните сознанија фигурира како еден од главните идеолози и ментори на следбениците на радикалниот ислам во Република Македонија“, изјави во среда Иво Котевски, портпарол на македонското Министерство за внатрешни работи.
Името на Алија Шукри се споменуваше и во 2005 година, како еден од учесниците во внатрешните пресметки во исламската верска заедница, како дел од групата која ги претепа имамите во џамијата во Кондово, обидувајќи се да внесат радикални елементи во исламската религија.
За ова дело минатата година е осуден на тригодишна затворска казна која од вчера ја издржува во истражниот затвор.
Тој се смета за десна рака на Рамадан Шити, кој беше убиен во полициската акција „Планинска бура“ во Бродец во 2007 година.
Според пишувањата на медиумите, Шукри го криел Шити по убиството на таксист во септември 2004 во скопско Визбегово.
Таксистот бил убиен бидејќи одбил да ги превезе Имер Риза и Рамадан Шити во Чаир. Риза пукал кон таксистот, а по убиството и двајцата беа уапсени. Во неговиот дом полицијата пронашла подрум преполн со исламска литература.
Без никаква причина на 12 април беа убиени и четирите млади момчиња и еден повозрасен маж кај Смилковското езеро.
Обвинителството ги товари за тероризам Африм Исмаиловиќ и Алил Демири, кои се во бегство, Агим Исмаиловиќ, Фејзи Азири и Рами Сејди, додека шестообвинетиот Хаки Азири, кој првично беше заштитен сведок, се товари за помагање.
Директни извршители на петкратното убиство се Алил Демири, Африм Исмаиловиќ и неговиот брат Агим.
Убиството, според обвинението имало за цел да предизвика несигурност кај населението и да ја нарушат безбедноста во земјава со предизвикување страв кај граѓаните. Смилковското езеро било под концесија на еден од обвинетите, Фејзи Азири, кому по убиството му е одземена концесијата./крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.