Властите во американската сојузна држава Делавер соопштија дека во понеделникот наутро по локално време имало пукање во судот на областа Њукасл во главниот град Вилмингтон, при што се убиени три лица а ранети се уште две, пишува интернет изданието на Huffington Post, повикувајќи се на локалната полиција.

Според полицијата, жртви во нападот се две жени, вклучувајќи ја и сопруга на напаѓачот, кои се здобиле со фатални рани. Двајца полицајци од судското обезбедување биле транспортирани до блиската болница, но нивните животи не се загрозени.

Како што соопштиле полициски извори за NBC Philadelphia, напаѓачот, исто така, е мртов, но не се наведува дали станува збор за самоубиство или е застрелан во престрелката со судското обезбедување.

Според други информации на локалниот портал Delaware Online Reports, кој се повикува на полициски извор, напаѓачот за кој се претпоставува дека бил припадник на обезбедувањето, бил уапсен.

Напаѓачот отворил оган во 8 часот по локално време во фоајето на зградата на судот, изјавил портпаролот на полицијата на државата Делавер. Нагласил дека тој не минал преку безбедносниот периметар кој се наоѓал неколку метри во внатрешноста од влезот во објектот.

Властите соопштија дека осум до десет полициски службеници се постојано присутни на територијата пред судот или во самиот суд. По инцидентот, повеќе училишта во Вилмингтон, биле затворени.

Градоначалникот на Вилмингтон, Денис Вилијамс, во телефонски разговор изјавил дека е мртов човекот кој е осомничен за убиство на неговата сопруга и ранувањето на други две лица во судот на областа Њукасл. Додал дека напаѓачот бил убиен од полицијата, а според неговите информации двојката живеела одвоено.

Портпаролот на полицијата на Вилмингтон, пак, претходно изјавил дека три лица биле застрелани. Полицискиот наредник Џејмен Крафорд потврдил дека жртвите биле две жени и еден маж. За мажот само рекол дека бил безбедносно лице.

Засега не се соопштени други детали за инцидентот, како ниту евентуалните мотиви на напаѓачот.

Весникот пренесува дека и по неколку часови по инцидентот, во зградата на судот е забележливо силно присуство на полицијата, а исто така блокирани се и околните улици./крај/мф/сн