Германскиот претседател Франк-Валтер Штајнмаер денеска го распушти Бундестагот и најави предвремени парламентарни избори за 23 февруари 2025 година.

„Во тешки времиња“ потребна е функционална влада, рече Штајнмаер во објаснувањето на својата одлука.

„Затоа сум убеден дека новите избори се вистинскиот пат за благосостојбата на нашата земја“, изјави Штајнмаер, пренесуваат германските медиуми.

Политичките партии во Германија веќе се договорија, датумот на избори да биде 23 февруари, но за тоа беше потребно распуштање на Бундестагот, согласно член 68 од германскиот Устав.

Минатиот понеделник канцеларот Олаф Шолц побара доверба од Бундестагот и го загуби гласањето откако се распадна владејачката коалиција, пренесува Танјуг.

Тој тогаш му предложи на Сојузниот претседател, Бундестагот да се распушти и со тоа да се отвори вратата за нови избори, а според Уставот, Сојузниот претседател тоа може да го направи во рок од 21 ден, но не е должен да го стори тоа.

Поморскиот сообраќај во многу пристаништа во Грција е во прекин поради силниот ветер.

Според грчката државна телевизија ЕРТ, поради силните ветрови на Егејското Море, воведена е забрана за пловидба во многу пристаништа, меѓу кои Пиреја, Лаврио, Рафина, Волос и Кавала.

Поради забраната, значително е во прекин поморскиот сообраќај во целата земја, а транспортот до многу острови во моментот не е можен, пренесуваат медиумите.

Според податоците на грчката метеоролошка служба, се проценува дека брзината на ветерот во регионот денеска ќе се зголеми, што значи дека би можел да достигне ниво на брзина на урагански ветер од 89 до 102 километра на час.

Федералната служба за безбедност на Руската Федерација (ФСБ) спречи терористички напад во близина на полициска станица во Москва, кој го подготвуваа лица од Централна Азија – членови на забранетата ќелија во Русија на меѓународната терористичка организација Исламска држава во Авганистан – „Вилајат Хорасан“.

Оваа информација ја соопшти Центарот за односи со јавноста на ФСБ на Русија.

„Осомничените купиле возило и почнале да прават импровизирана експлозивна направа. За време на апсењето, терористите дале вооружен отпор на руските офицери на ФСБ и на крајот биле неутрализирани со возвратен оган“, се наведува во соопштението, пренесе агенцијата ТАСС.

Ова, нагласува ФСБ, ги запре активностите на ќелијата на меѓународна терористичка организација, чии членови, по потекло од Централна Азија, планирале да извршат терористички акт против еден од полициските оддели. Извршителите го привлекоа вниманието на безбедносните агенции кога собираа информации за одделот на руското Министерство за внатрешни работи во Москва, кој беше избран за цел на терористичкиот напад, соопшти Центарот за односи со јавноста.

За време на истражните дејства во местото на живеење на радикалот пронајдено и одземено е огнено оружје, муниција. Во тек се оперативни дејства за пребарување и истрага.