Македонија
(Видео) Каевски: Институциите да постапат по скандалот со парцелите на човек близок до Трпковски
Вчера објавивме како еден близок човек до градоначалникот на општина Сопиште, Стефче Трпковски за краток период стекнал сопственост на различни парцели во Долно Соње, општина Сопиште. Еве дел од тие 28 имотни листови кои покажуваат дека човекот близок до Трпковски во своја сопственост има над 30.000 метри квадратни земјиште во Долно Соње, изјави на денешната прес-конференција Дарко Каевски, пратеник на СДСМ.
Денеска, рече Каевски, ги повикуваме надлежните институции да постапат по допрен глас и да испитаат дали и каква позадина има во овој случај?
„Овој скандал со парцели води директно кон градоначалникот Трпковски, прво затоа што парцелите ги купил негов близок човек и второ затоа што сите тие се наоѓаат на територија на општина Сопиште. Како е можно еден човек близок до актуелниот градоначалник Трпковски за краток временски период да купи над 30.000 метри квадратни земјиште и дали овде станува збор за дил ориентед релации кум-кумашин, како во времето на Никола Груевски и богатење на грбот на граѓаните?“, праша Каевски.
„Наместо по социјалните мрежи напразно да се заканува со тужби, Трпковски треба да излезе пред јавноста и да одговори: Како негов близок за само неколку години станал сопственик на илјадници метри квадратни земјиште? Која е неговата улога во овој скандал со „парцели во Долно Соње“ од 30.000 метри квадратни?“, рече Каевски.
Јавноста, додаде тој, чека одговори од Трпковски и постапување од страна на надлежните институции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.