За кандидатката за градоначалничка на Скопје од СДСМ, Каја Шукова, Скопје денес изгледа запуштено, нечисто и хаотично затоа што јавните претпријатија се заробени од партиски интереси, долгови и неспособни раководства. Таа констатира дека граѓаните плаќаат за услуги, а добиваат насобран смет, нефункционален јавен превоз и хаотична инфраструктура.

„Мој приоритет е вистинска реформа на јавните претпријатија, да им служат на граѓаните, а не на партиите. ЈСП се модернизира со нови еколошки автобуси, електронски систем за наплата и брз автобуски транзит за да се воспостави за да се воспостави јавен превоз што функционира. ‘Комунална хигиена’ се ревитализира со современ центар за селекција и рециклажа, редовно собирање отпад и конечно решавање на ‘Вардариште’. Во ‘Паркови и зеленило’ се отвора нова ера, десет илјади дрвја и петнаесет паркови за петнаесет месеци со редовно одржување и враќање на зелените површини во маалата. ‘Водовод’ се насочува кон стабилно снабдување, модерна опрема и намалени загуби на вода. Јавното претпријатие ‘Лајка’ се надградува во вистински хуман систем за згрижување и грижа за уличните животни“, рече денес Шукова.

Таа уверува дека со нејзината програма Скопје ќе добие функционални и транспарентни јавни служби и ќе прерасне во град што ќе работи и се грижи за жителите.

„Време е институциите да им служат на граѓаните, а не на партијата“, рече Шукова.

Политичките партии имаат уште четири дена за претставување на програмите пред да настапи изборниот молк за локалните избори.

Во пресрет на изборите, Здружението за заштита на животните „Анима мунди“ апелира прашањето за благосостојбата на животните конечно да стане централно прашање од јавен интерес, а не тема на маргините. Во своето соопштение тие нагласуваат дека односот кон животните покажува дали општеството е хумано или сурово, дали владеат вредности или безредие.

„Анима мунди“ ги повикува сите кандидати за градоначалници да се изјаснат околу осум конкретни барања, меѓу кои: масовна стерилизација, вакцинација и микрочипирање на уличните животни;  стационари управувани од активисти и 24/7 итна служба; контрола на сопствеништвото на миленици и стимули за одговорни граѓани;  програми за хумана контрола на бројноста на уличните мачки; засилена инспекција и санкционирање на насилството врз животни; забрана за користење коњи како влечни животни во градовите; трансформација на зоолошките градини во центри за рехабилитација и конзервација; изградба на гробишта за миленици.

„Ќе преземете ли одговорност – или ќе останете дел од проблемот?“, прашуваат од „Анима мунди“, додавајќи дека очекуваат јасни и конкретни одговори од сите кандидати.

Платформата зад барањата ја поддржуваат и повеќе организации: „Шепасти ентузијасти Скопје“, „Мали херои Битола“, Paws-2021 / „Шепи-2021“, „Kumanovo Animal Save“, „NARD Macedonia“, „Ејнџелкетс Скопје“, „Е.Д.Е.Н.“ и „Лина спаси живот – Кавадарци“.

Секое јавно изјаснување, најавуваат од здружението, ќе биде споделено преку нивните платформи со 70.000 членови и партнерски страници, како и преку националните и локалните медиуми.

Кандидатот за градоначалник на општина Центар од редовите на СДСМ, Горан Герасимовски, синоќа беше на терен, на средби со граѓаните „од врата до врата“. Во разговорите со центарци, тој најави дека во новата програма надоместокот за новороденче се зголемува од 7.000 на 10.000 денари.

„За 50% го зголемуваме надоместокот за новороденче, од 7.000 на 10.000 денари. Со оваа мерка ги поддржуваме центарските семејства.. Родителите добиваат поголема финансиска поддршка во најважниот период, кога се раѓа нов живот и започнуваат нови семејни предизвици. Ги зголемуваме субвенциите за сите категории на граѓани“, рече Герасимовски.

Тој, потенцираше дека развојот мора да продолжи, а концептот „За Центар што го сакаме“ е единствениот што нуди поквалитетен живот на центарци.

„Развојот мора да продолжи, а тоа ќе го постигнеме ако сите заедно се обединиме „За Центар што го сакаме“. Затоа, ве повикувам во недела, 19 октомври, масовно да излеземе на гласање и да го дадеме својот глас за бројот 5, за напредени модерен Центар“, порача Герасимовски.

На средбите со граѓани, тој ги презентираше и клучните проекти за вториот мандат, меѓу кои: модерен дом за стари лица на Водно, нова градинка во близина на Клиничкиот центар, набавка на две цистерни и пет метларки, ограничување на движењето на возилата во Дебар Маало за намалување на метежот, изградба на две монтажни катни гаражи, нов административно-граѓански објект, два покриени базени, како и воведување на „Центарска картичка“ со бројни поволности и попусти за жителите.

„Во изминативе години покажавме што значи одговорно и посветено водење на општина. Реализиравме проекти што го подобрија секојдневието, уредивме улици, зголемивме зеленило и создадовме подобри услови за младите и повозрасните,“ рече Герасимовски.