Министерството за здрвство добило 90 пријави од граѓани кои се пожалиле на функционирањето на здравствениот систем. Министерот за здравство Азир Алиу денес извести дека на новата алатка за пријавување неправилности, досега има 90 пријави.

„Во рамките на новата логика што ја градиме во здравството, логика на транспарентност и отчетност – веќе активно функционира алатката за пријавување неправилности преку која граѓаните може директно да пријават проблеми во системот. Досега регистрирани се 90 пријави, најмногу од Скопје, а најчести се поплаките за доцнење резултати, доцнење на прегледи и ангажмани на доктори во јавниот и во приватниот сектор. Но, најважно е што овие пријави и претставки не остануваат во фиока – секоја се разгледува од посебна работна група со цел да има институционална реакција. Ова е јасната политичка порака: времето кога здравствените проблеми се игнорираа заврши. Сега граѓаните имаат глас – и тој глас ќе се слуша“, ветува Алиу.

Тој кажа дека досега работните групи обработиле околу 60 од пристигнатите пријави и во нив нема пријава дека на пациенти му било барано мито. За две пријави оцениле дека навистина има индикации за понатамошно постапување.

„Тоа значи дека со тие информации ние ќе седнеме заедно со институциите кои што се поврзани со тие информации да ги објасниме процесите и зошто тоа се случува. Тие не се индикации поврзани со финансиска злоупотреба туку повеќе се индикации поврзани со недоволно оптимизирани здравствеи услуги во тие институции или долго чекање на граѓаните да добијат услуги во тие институции или поточно злоупотреба на тој ред што граѓаните сакаат да го има. Доаѓате навреме а добивате услуга после два-три часа“, рече министерот Алиу.

Тој денес најави дека во болниците во Штип, Тетово и Тичево ќе се инвестираат 205 милиони евра со кои очекува значително подобрување на здравствениот систем.

ВМРО-ДПМНЕ, кога обвинува за недостиг на вода во град Скопје, заборава да додаде дека токму полициските службеници на Панче Тошковски од МВР се фатени за диви приклучоци на мрежата на ЈП „Водовод и канализација“ во Шуто Оризари и за нив МВР по службена должност нема поднесено кривична пријава за кражба, реагираат од Град Скопје по денешното соопштение од владејачката ВМРО-ДПМНЕ.

Како што појаснуваат, и на дивоградбата, каде што беше физички нападната градоначалничката Данела Арсовска, бил утврден див незаконски приклучок на вода, а Панче Тошковски, како што истакнуваат во соопштението, дозволува таму да се продолжи со градба и се стави во одбрана на насилникот Сулејман Љамалари.

„Во услови на рекордна потрошувачка од 356.000 м³ дневно и во просек по фатени и спречени 30 нови диви приклучоци секој ден, некој сѐ уште глуми политичка загриженост. Додека едни крадат вода и не плаќаат ни денар, граѓаните што чесно си плаќаат трпат поради пад на системот.

Потрошувачката на вода овој месец достигна рекордни 356.000 м³ на ден, што значи дури 700 литри дневно на жител, највисоко ниво досега.
Само во последните денови дневно се откриваат по 30 нови диви приклучоци во Скопје, бројка што постојано расте“, реагираат од Град Скопје.

Одговорноста, според нив, е јасна. Проблемот, како што велат, не е водата, проблемот се оние што ја добиваат бадијала и институциите што ги штитат.

Со поставување камен темелник денеска стартуваше изградбата на ветерен парк во близина на Штип, каде „Алканзар енерџи партнерс“, со инвестиција од 500 милони долари ќе изгради 55 ветерници кои ќе произведуваат струја за 100 илјади домаќинства.

Премиерот Христијан Мицкоски денеска го означи почетокот на изградбата.

„После нешто повеќе од една година, тоа што го ветивме, денеска добива завршница – завршница на првата фаза“, изјави Мицкоски на настанот.

Инвестицијата беше најавена вториот ден по изборот на Владата, а Мицкоски ја нарече „драјвер и модел како треба да се движиме понатаму“ во секторот на обновливи извори на енергија.

Премиерот нагласи дека минатата година била рекордна по странски директни инвестиции, достигнувајќи 1,255 милијарди евра. Како индикатори за економски напредок тој ги наведе растот на извозот на земјоделски производи за 57%, зголемување на бројот на туристи за 22% и индустриски раст од 9,4% во мај.

„Не може да имате силна економија без враќање на довербата кај инвеститорите. А довербата се враќа преку дисциплина и борба против криминал и корупција“, рече Мицкоски.

Тој се заблагодари на сите институции, општини и универзитетски кадар вклучени во проектот, нарекувајќи го ветерниот парк „целосно македонски производ – од проектирање до изведба“.

„Да ни е аирлија и да ни се множат уште многу вакви инвестиции“, порача премиерот.

На настанот се обрати и вицеремиерот и министер за транспорт, Александар Николоски кој ја истакна огромната важност на проектот, како за државата и граѓаните, така и за развојот на економијата и создавање можности за конкурентност на македонската индустрија на европскиот пазар.

„Кога патуваме надвор, она што можеби најмногу не’ импресионира, особено во Северна Европа, е кога ќе ги видеме ветерниците и тоа е некој симбол за развој, симбол за прогрес, симбол за 21. век и каде се движи човештвото. Така што, ова што ќе се случува во годините пред нас, е и психолошки добро да покажеме, дека како нација можеме да водиме големи проекти“, рече Николоски.

Во однос на економијата, додаде дека тука имаме директен и индиректен импакт. Директниот импакт е она што ќе се произведе и што ќе се продаде, кое што директно влегува во БДП. Но индиректниот е многу поголем, не само во изградбата во годините што следуваат пред нас, не само во придобивките кои што ќе ги имаат трите општини, на чија што територија ќе биде овој ветерен парк, туку пред се’ за стопанството и за индустријата.

На настанот се обратија и директорот на компанијата и инвеститор, Даниел Калдерон, како и министерката за енергетика, Сања Божиновска.