Македонија
(Видео) Мециновиќ: Политички притисок врз членови на Левица од мафијашкиот режим на СДСМ и ДУИ
Притисоците и деградирањата на луѓето кои се поистоветуваат со Левица продолжуваат, како непрекинат притисок врз партијата за да се компромитираат нашите активности, вели Амар Мециновиќ.
„Јавноста е запознаена со оперативната рамка на мафијашката-владејачка гарнитура, која постојано ги користи државните инструменти за саботажа на поединци, движења и партии – но, откако судбината на владејачката коалиција се стави под знак прашалник, мобилизирани се сите средства за нечесно останување на власт“, додава тој.
„Имено, мајката на наша кандидатка за советничка во Град Скопје, која од 2001 година во Фондот за здравствено осигурување работи како деловен секретар со статус на јавен службеник, со последната наредба потпишана од двата директори на Фондот – Стево Крстевски и Фатон Ахмети таа се задолжува на работно место кое се предвидува за службеници со средно образование. Со оваа наредба, таа се деградира – и тоа, бидејќи нејзината ќерка на Фејсбук споделила статус на претседателот на Левица – Димитар Апасиев“, истакна Мециновиќ.
Додаде дека СДСМ и Левица се влезени во обратнопропорционален политички однос и растот на Левица, како што рече, директно влијае на иднината на социјалдемократскиот сојуз – затоа, според него, тие свесно водат немилосрдна битка која не бира средства, знаејќи дека исходот е конечна промена на рамнотежата во левиот политички блок.
„Како работничка партија – Левица уште повеќе добива елан кога номинално левата СДСМ својот бес го истура токму по работничката класа – која непогрешно ќе покаже меѓусебна солидарност кон овие нечесни напади врз поединци, подвлече Мециновиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Дурмиши: Работиме на нови иницијативи со кои ќе ја подобруваме и зголемуваме вработеноста и ќе овозможиме социјална инклузија на пазарот на трудот
„Денес успешно завршуваме проект чиј главен фокус беше решавањето на едни од најголемите предизвици со кои се соочуваме како општество – долгорочната невработеност и зависноста од гарантираната минимална помош, кажа министерот за економија и труд, Бесар Дурмиши во обраќањето на завршниот настан од реализација на тригодишниот ИПА проект „Активација на ранливи групи на пазарот на трудот“ во организација на Агенцијата за вреботување.
Министерот истакна дека на почетокот на овој проект, поставвена е амбициозна цел: ранливите групи да добијат можност за економска независност, преку вклучување во специјализирани програми за развој на вештини и услуги.
„Преку Програмата за советување и мотивација на невработените лица од ранливите категории им помогнавме да го надминат својот страв од новото и непознатото и да направат чекор кон активна вклученост на пазарот на трудот. Советувањето и менторската поддршка не беа само технички алатки, туку вистинска поткрепа, која овие лица ја почувствуваа како поттик за промена. Втората компонента, Програмата за поддршка за вработување преку обуки, е клучот кон иднината на многу луѓе. Во неа беа вклучени пет мерки кои, директно влијаеа на подобрување на вештините и вработливоста на нашите граѓани. Завршените обуки за побарувани занимања на пазарот на трудот, значат дека денес имаме повеќе луѓе подготвени да се вклучат во работната сила и да одговорат на потребите на пазарот. Овие обуки не беа само начин за стекнување на вештини – тие на невработените лица ќе им отворат врати за нови можности и професионален развој. Обуката на работно место ги подготви невработените лица за реални предизвици на работните места, а со обврската на работодавачите да вработат најмалку 50% од обучените лица, осигуруваме дека овие обуки ќе водат кон реални работни позиции. Преку субвенционираното вработување невработените лица добија шанса да влезат на работа со директна финансиска поддршка. Тие луѓе денес имаат можност да изградат кариера и да придонесат за развојот на економијата. Програмата за практикантство пак, не само што ги подготви овие луѓе за идните работни позиции, туку ја зајакна врската помеѓу образованието и пазарот на трудот. Практичната работа е клучен елемент во развојот на секој професионалец. И конечно, Пилот-програмата Втора шанса не само што ја зголемува вработливост на невработените лица, туку им дава надеж за подобра иднина. Со ова докажуваме дека никогаш не е доцна да се вложи во себе и да се создадат нови можности, наброја министерот Дурмиши.
Според министерот проектот покажа дека со правилна стратегија, соработка и посветеност можеме да постигнеме многу.
„Резултатите од проектот не се само статистика, туку луѓе кои добија поддршка, нови можности и полесен пристап до работни места.Верувам дека научените лекции од овој проект ќе ни послужат како темел за идни иницијативи со кои ќе ја подобруваме вработливоста, ќе ја зголемуваме вработеноста и ќе овозможиме социјална инклузија на пазарот на трудот“ кажа министерот Дурмиши.
Македонија
Најдоцна во јануари Јаневска ќе го распише тендерот од половина милијарда денари за учебници по странски јазици
По најавата дека учебници по странски јазици ќе има за сите ученицни, но од следната учебна година, министерката за образование Весна Јаневска денес извести дека најдоцна на почетокот на следната година ќе го распише тендерот за нивна набавка. Јаневска, денес, давајќи отчет за првите 100 дена од новата Влада, рече дека е задоволна од сработеното и најави дека ќе продолжи со исто темпо.
„Набавката на учебници по странски јазици, најверојатно, ќе биде распишана најдоцна во јануари. Тоа значи дека за следната учебна година ќе ги има и учебниците по сите странски јазици“, рече министерката Јаневска.
Минатиот месец од нејзиниот кабинет за „Макфакс“ изјавија дека набавката на учебниците по странски јазици се очекува да чини 500 милиони денари или 8,1 милиони евра.
Учебници по странски јазици во основните училишта нема петта учебна година по ред. Четворица министри, вклучително и сегашната министерка, дозволија учебната година да почне без овие учебници, но одговорност не се бара од никого.
Македонија
Вонредни инспекции на Детската клиника и во Козле ја бараат вината за смртта на 14-месечното дете
Државниот санитарен и здравствен инспекторат и стручна комисија, формирана од министерот за здравство, од утрово прават увид во Универзитетската клиника за респираторни заболувања кај децата во Козле и на Клиниката за детски болести за да се утврдат причините за смртта на 14-месечното дете, кое во саботата почина на Детската клиника. Министерот за здравство, Арбен Таравари, вели дека утрово имал состанок со директорот на Државниот санитарен и здравствен инспекторат.
„Првиот состанок што го имав утрово беше со директорот. За овој случај формирана е и стручната комисија и веќе е на терен. Од девет часот утрово на терен се и стручната комисија и Инспекторатот“, рече министерот Таравари.
Тој вчера потврди дека 14-месечното дете било вратено од Детската клинка, односно лекарите одбиле да го хоспитализираат. Родителите помош побарале на клиниката во Козле, каде што го примиле, но поради влошена состојба, било пренесено на Детската клинка, каде што и почина.
Министерството за здравство извести дека детето било примено со тешка респираторна инфекција, тешка општа состојба и засегнати витални функции. Настапило рапидно влошување на состојбата со отежнато дишење и пад на сатурацијата. Телото на детето е предадено на обдукција за која од Министерството очекуваат да ги утврди причините за смртта.
Директорот на Детската клиника, Реџеп Мемеди, вчера, на социјалните мрежи објави дека смртта на 14-месечното дете е голема трагедија за него и како родител и како доктор. Најави дека нема да остане мирен сè додека не ги дознае причините за смртта и додека не се побара индивидуална одговорност за случајот доколку се утврди пропуст.