Целосен молк од страна на надлежните институции за скандалот што вчера го објавивме за шверц на еден тон наркотични супстанции преку скопскиот аеродром. Молчи Јавното обвинителство, молчат Оливер Спасовски и МВР, молчи и Царината, преку која била пропуштена дрогата на аеродромот. Нема одговори за скандалот како тоа пратка од 1 тон дрога ги поминала сите безбедносни и царински мерки и незабележливо била пропуштена да излезе од скопскиот аеродром, рече Драган Ковачки, пратеник и член на ИК на ВМРО-ДПМНЕ, на прес-конференција.

„Нема одговори дали на царинските службеници усно или писмено им било наредено да не ја проверуваат пратката на скопската компанија за мобилна галантерија, која пристигнала од Дубаи. Исто така, јавноста не доби одговори дали царинските работници под присила ги смениле своите изјави за непостапувањето за оваа пратка, со која во Македонија се внесе 1 тон дрога“, додаде Ковачки.

Но, овој скандал, како што нагласи, не завршува со самото пропуштање на дрогата да влезе на територијата на Македонија.

„Ќе ги прашаме надлежните институции за овој случај уште неколку скандалозни постапки од стана на засегнатите институции.
Дали истиот ден откако пратката била пропуштена да излезе од скопскиот аеродром, таа била товарена во превозни средства и била придружувана со царинска придружба со ротациски светла? Повторувам, придружувана од царински службеници со ротациски светла. Дали пратката на влез во Скопје била запрена од страна полицијата и при контрола и претрес е констатирано дека пратката не соодејствува со содржината што била внесена на товарниот лист и царинската декларација, при што таа е запленета? Дали полицијата при претресот запленила и два мобилни телефонски уреда на македонски царински службеници и дали врз нив се извршени понатамошните истражни дејства, кои би можеле да укажат во учество во сторување одредени кривично-правни дејства, кои се поврзани со сомнителниот нелегален увоз на стоки и материјали?“, праша Ковачки.

Смета дека надлежните институции треба да одговорат за инволвираноста на раководните структури во МВР и Царината, како и на царинските работници, како и на полициските службеници, кои, како што додаде, не спречиле голем шверц на дрога да влезе во Македонија преку скопскиот аеродром.

Го повика Јавното обвинителство веднаш да постапи по овој случај.

„Не смееме да дозволиме и овој случај да биде уште еден од редицата нерасчистени криминални случаи, кој се поврзани со кланот на власт – СДСМ и ДУИ“, истакна Ковачки.