Србија конечно има сили да каже дека операцијата „Бура“ беше „етничко чистење и бесмислен масакр, злосторство без преседан“, изјави српскиот премиер Александар Вучиќ по повод Денот на сеќавањето на страдањата и прогонувањето на Србите, пренесуваат српските медиуми.

Вучиќ во своето обраќање пред граѓаните кај граничниот премин Сремска Рача, каде пред 20 години прогонетите Срби од страната на Хрватска влегуваа во Србија, рече дека војната е завршена и дека веќе никогаш нема повторно да се случи, но дека Србија нема да ги заборави своите жртви и својот народ.

Српскиот премиер истакна дека за време на акцијата „Бура“, спроведена од страна на хрватската војска и полиција, биле протерани повеќе од 250 илјади Срби и дека повеќе од две илјади лица биле убиени или уште се водат како исчезнати.

Вучиќ додаде дека не сака зборовите на омразата, судирот и одмаздата да го одбележат овој ден, нагласувајќи дека Србија со Хрватска живее во мир и дека се надева оти наскоро двете земји ќе бидат во заедничка куќа, во рамките на Европската унија.

Сепак, тој укажа дека Србија веќе нема да молчи ниту, пак, тивко да говори за страдањето на својот народ во „Бура“, за која вели дека е „страшно злосторство“. „Силата на нашите солзи и свеќи е многу поголема од силата на нивните тенкови“, заклучи Вучиќ.

На оние кои ја слават „Бура“, Вучиќ им порача дека би требало тоа да го прават шест дена и шест ноќи, поради тоа што „толку време е потребно да се набројат имињата на сите прогонети и избркани Срби“./крај/мф/бс