Црна хроника
Во критична состојба се две деца од сообраќајката во кочанско
Две деца се уште се борат за живот во Ургентниот центар, од вкупно 11-те донесени во Скопје по тешката сообраќајна несреќа што се случи синоќа во близина на кочанското село Оризари.
На Клиниката за анестезија, реанимација и интензивно лекување, на одделот за интензивна нега задржани се четири деца од кои две имаат повреди на главата и нагмечување на градниот кош, изјави д-р Илир Хасани, раководител на Ургентниот центар во Скопје.
Интервенција е направена врз девојче на Клиниката за пластична и реконструктивна хирургија поради санирање повреди на лице, а траела до 5 часот изутрината, по што девојчето е однесено повторно на КАРИЛ.
„Четворица пациенти се наоѓаат во центарот за интензивно лекување, едниот од нив е доста тежок, со сериозна, тешка повреда на глава и на градниот кош. Едниот пациент е префрлен после операцијата којашто е извршена од страна на докторите од Клиниката за пластична и реконструктивна хирургија поради тоа што има претежно повреди на лицето и на лицевите коски”, вели Хасани.
Пет деца се лекуваат на Клиниката за неврохирургија од кои две се исто така во тешка состојба и се на одделот за интензивна на оваа клиника, а три се на одделение.
„На неврохирургија, двајца се во тешка состојба и се наоѓаат во кома центарот, односно во неврохируршкото интензивно лекување и се во потешка состојба. Едниот од нив во текот на ноќта беше опериран, додека тројцата што се примени на одделение се во подобра општа состојба”, вели Хасани.
Две деца се лекуваат на Детската клиника и се со најлесни повреди, па треба да бидат пуштени на домашно лекување во текот на денешниот ден. Повредените деца се на возраст меѓу 14 и 17 години.
Три деца се наоѓаат на интензивна нега во Општата болница во Кочани и нивната здравствена состојба е стабилна.
Според МВР, до несреќата дошло откако трактор со кој се превезувале 18 лица, повеќето малолетници кои се враќале од првомајски излет, се превртел во близина на местото Илин Дол на патот меѓу кочанските села Пресека и Оризари.
Несреќата се случила околу 19.30 часот. До превртување на тракторот дошло на асфалтна површина на не многу стрмен терен, наведуваат во МВР. Возачот кој управувал со тракторот загинал на местото на несреќата, а по пат кон Скопје синоќа почина и неговата сопруга, која исто така била повредена при превртувањето на тракторот./крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Предложен притвор за 37-годишник за недозволено држење муниција
Основното јавно обвинителство Скопје донесе Наредба за спроведување истражна постапка и предложи мерка притвор за 37-годишник осомничен за – Неовластено држење, посредување и тргување со оружје или експлозивни материи од член 396 став 3 во врска со став 1 од Кривичниот законик.
На 30 октомври, при претрес во автомобилот на осомничениот на улицата “Кемал Сејфула”, биле пронајдени 100 куршуми со калибар 7,62Х39мм, наменети за испалување од различни видови огнено оружје.
Притворот е предложен поради опасност од бегство и можност осомничениот да го повтори делото што му се става на товар.
Црна хроника
Уапсен германски државјанин на ГП Табановце, пронајдена дрога
Вчера во 17:30 часот на Граничниот премин Табановце, на влез во државата, полициски службеници го лишија од слобода А.К..(52) од Германија, затоа што при гранична контрола на патничко возило „мерцедес спринтер“ со германски национални ознаки, со кое патувал, пронајдени се марихуана, таблети и др..
А.К. е предаден на полициски службеници од СВР Куманово и по целосно документирање на случајот ќе следува соодветен поднесок.
Црна хроника
Несреќа на патот Охрид – Кичево: автомобил удри во 10-годишно дете, со тешки повреди пренесено во болница
Десетгодишно девојче од Кичево со тешки повреди е пренесено во болница откако во него удрил автомобил. Според информациите на МВР, несреќата се случила вчера на патот Охрид-Кичево.
„На 30.10.2025 во 07:15 часот во ОВР Кичево е пријавено дека на магистралниот пат Охрид-Кичево, патничко возило „опел астра“ со кичевски регистарски ознаки, управувано од И.С.(60) од с.Другово, кичевско, удрило во 10-годишна малолетничка од Кичево. Во несреќата со тешки телесни повреди се здобила малолетничката, констатирани во Медицински центар Кичево“, велат од МВР.
Извршен бил увид од увидна екипа од ОВР Кичево.

