Свет
Масовни протести во Германија против ковид-мерките, повредени 14 полицајци
Повеќе од 35.000 луѓе присуствуваа на протестите во Германија против ограничувањата наметнати од владата поради коронавирусот.
Многу собири беа претходно регистрирани кај властите, што е неопходно според германскиот закон, а други не беа одобрени и затоа беа незаконски. Демонстрации вчера беа одржани, меѓу другите, во Мекленбург-Западна Померанија, Тирингија и Саксонија-Анхалт. На нерегистриран митинг во Магдебург се случија судири со полицијата.
Силите на редот објавија дека 14 полицајци се повредени во нападите на демонстрантите во градот Лихтенштајн, во Саксонија, а полицијата употребила бибер-спреј. Собири против ограничувањата се одржаа и во Баварија, а во многу делови на покраината општинските власти забранија демонстрации или им се заканија на граѓаните со казни за неовластени протести.
Во Берлин неколку стотици луѓе дојдоа на митингот пред медиумското студио ЗДФ, а некои од нив извикуваа „лажливи медиуми“. Полицијата соопшти дека немало насилство.
Стапката на вакцинација во Германија е нешто повеќе од 71 отсто. Многумина што примиле две дози добиле и бустер, но 25,8 отсто од населението воопшто не биле вакцинирани. Меѓу нив има деца помлади од пет години и луѓе што, генерално, не може да ја примат вакцината.
Невакцинираните лица се соочуваат со значителни ограничувања во својот секојдневен живот во целата земја вклучувајќи ја и неможноста да влезат во многу продавници и места за забава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
При уривање на автопат во јужна Кина загинаа 36 лица
Бројот на загинати во уривањето на дел од автопатот во јужната кинеска провинција Гуангдонг се искачи на 36, соопштија локалните власти.
Несреќата се случи вчера наутро, а по уривањето на делницата долга 17,9 метри, 23 возила паднале во провалија, јавува агенцијата Синхуа.
Претходно беше соопштено дека загинале 24 лица, а 30 се повредени.
Свет
Трамп: Апсењето на студенти во Њујорк „беше убаво за гледање“
Поранешниот американски претседател Доналд Трамп изјави дека е „убаво да се гледа“ како полицијата во Њујорк упадна во зградата на Универзитетот Колумбија, окупирана од пропалестински демонстранти, нарекувајќи ги „бесни лудаци и симпатизери на Хамас“.
На митинг за претседателската кампања во Висконсин, Трамп рече дека „Њујорк е под опсада“ и го поздрави апсењето на околу 300 демонстранти, пренесува Ројтерс.
Некои членови на Републиканската партија ги обвинија универзитетските лидери за игнорирање на антисемитската реторика и малтретирање на пропалестинските протести низ САД.
Свет
Земјотрес со јачина од 4,1 степени според Рихтер го погоди Лос Анџелес
Земјотрес со јачина од 4,1 степени според Рихтеровата скала вечерва го погоди поширокото подрачје на Лос Анџелес, соопшти Сеизмолошкиот институт на САД.
Земјотресот се случил во областа Корона, во близина на Лос Анџелес.
Земјотресот бил почувствуван во поширока област, западно до Лос Анџелес, Лонг Бич, округот Оринџ и Санта Кларита.