Свет
На советот НАТО – Русија во Брисел се расправале за распадот на Југославија
Денешниот состанок на заедничкиот совет НАТО – Русија во Брисел од разговори за Украина се претвори во дискусија за распадот на Југославија.
Според неофицијалните информации на хрватските медиуми, Русите го отвориле прашањето за распадот на Југославија со тврдењето дека НАТО ја разби Југославија со своите бомбардери, што според Русите е само еден во низата докази дека воената алијанса била агресивна во проширувањето на поранешните социјалистички држави.
На ваквите руски тврдења прв одговорил претставникот на Хрватска, амбасадорот Марио Нобило.
Средбата, секако, се одржала зад затворени врати, a деталите неофицијално говорат дека за овој дел од разговорот со Русите, кој се однесува на распадот на Југославија, јавно проговорил и генералниот секретар Јенс Столтенберг.
Новинарите на прес-конференција го прашаа Столтенберг како тој одговори на тврдењата на Русија дека улогата на НАТО во Југославија и Либија е контроверзна.
Столтенберг потврди и дека за време на состанокот на советот НАТО – Русија, претставниците на Хрватска, Словенија и на Црна Гора зеле збор и разговарале за тоа што навистина се случило за време на распадот на Југославија, а што е спротивно на она што денеска го кажаа Русите.
„Неколку сојузници, кои беа дел од поранешна Југославија, многу јасно кажаа дека Југославија не се распадна поради НАТО, туку поради внатрешни причини, внатрешни конфликти. НАТО дојде подоцна за да спречи злосторства“, рече Столтенберг.
„Целата идеја дека НАТО е виновен за распадот на Југославија е погрешна. Требаше да се запрат злосторствата, првин во БиХ, а потоа и во Косово. Но, во тој момент Југославија веќе се распадна“, додаде генералниот секретар на алијансата.
Извори на хрватските медиуми наведуваат дека средбата на сојузниците од НАТО со Русите, веднаш по иницирањето на темата за распадот на Југославија, станала поемотивна и добила посилен тон. Наводно Хрватите го смениле тонот на разговорот, сакале да нагласат дека Русија може да биде конструктивен играч во меѓународната безбедносна политика. Тие изјавиле дека за време на распадот на Југославија, Русија била конструктивна и активно соработувала со западните сили.
Акумулацијата на руски војници на руска територија во близина на границата со Украина сè уште ги остава сојузниците цврсто убедени дека Русија се подготвува за голема инвазија, па НАТО сака да види деескалација на руската страна.
И условите што Москва неодамна ги постави за НАТО, вклучително и писмени гаранции дека нема да има повеќе проширување на НАТО на исток и барање силите на НАТО да се повлечат на линиите од 1997 година, пред да се прошират во Централна и Источна Европа, за време на состанокот убедливо се отфрлени од сите триесет сојузнички земји.
Сојузниците ги потврдија политиката на отворени врати на НАТО и правото на секоја нација да избира свои безбедносни аранжмани.
„Сојузниците јасно ставија до знаење дека нема да се откажат од нивната способност да се заштитат и бранат меѓусебно, вклучително и присуството на трупите на НАТО во источниот дел на алијансата“, изјави генералниот секретар Јенс Столтенберг на прес-конференција по советот НАТО – Русија.
Како и на средбата во Женева во понеделникот, на која Американците и Русите разговараа за истото прашање, на денешната средба во Брисел ништо не беше решено, беа утврдени само позициите на двете страни, со очекување дека дијалогот може да продолжи, но со условот Русија да ги намали тензиите.
НАТО е заинтересиран за дијалог со Русите за некои важни прашања за кои веќе неколку години не се разговарало во дијалогот.
Тоа се теми, како: новиот договор за контрола на вооружувањето, договорот за потранспарентно спроведување на воените вежби, за намалување на опасноста од сајбер-напади и слично. НАТО, едноставно, не сака да зборува за најголемите желби на Русија напишани во два предлога за безбедносни договори, кои Москва ги испрати до САД и НАТО со желба да ги склучи и со тоа да ја промени безбедносната архитектура на Европа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Русија распиша потерница по Зеленски, се огласи Украина
Украинското Министерство за надворешни работи соопшти дека издавањето налог за апсење од страна на Русија за претседателот Володимир Зеленски е „доказ за очајот на руската државна машина и пропаганда“, пишува „Украинска правда“.
„Руските извештаи за наводното додавање на украинскиот претседател Володимир Зеленски на потерницата на руското Министерство за внатрешни работи го покажуваат очајот на руската државна машина и пропаганда. Русите не знаат што друго да измислат за да привлечат внимание“, посочија Украинците. надвор.
„Ги потсетуваме сите дека, спротивно на безвредните руски најави, налогот на Меѓународниот кривичен суд за апсење на рускиот диктатор Владимир Путин под обвинение за воени злосторства е реален и спроведлив во 123 земји“, додаваат тие.
Русите не го прецизираа написот врз основа на кој е издаден налогот за апсење на украинскиот лидер. „Володимир Александрович Зеленски, 25 јануари 1978 година. Се бара според членот од Кривичниот законик“, стои во базата на податоци на веб-страницата на руското Министерство за внатрешни работи.
Базата на податоци го наведува и местото на раѓање на бараното лице, градот Кривиј Рих во регионот Дњепропетровск. Објавена е и фотографија од Зеленски, направена пред војната.
Свет
НАТО започна огромни вежби, за Русија: Тоа е подготовка за војна
Четиримесечните воени вежби на НАТО во близина на границите на Русија, наречени „Непоколеблив бранител“ се доказ дека алијансата се подготвува за потенцијален конфликт со Русија, изјави портпаролката на руското Министерство за надворешни работи, Марија Захарова.
Захарова неделава ги отфрли обвинувањата на НАТО дека Русија води хибридна војна против нејзините членки, тврдејќи дека тоа е дезинформација со цел да се одвлече вниманието од активностите на алијансата.
НАТО е тој што води хибридна војна против Русија, поддржувајќи ја Украина со оружје, разузнавачки информации и финансии, рече таа.
„Во моментов, најголемата вежба на НАТО од Студената војна, Непопустлив бранител, се одржува во близина на руските граници. Според нивното сценарио, акциите на коалицијата против Русија се практикуваат со користење на сите инструменти, вклучително и хибридно и конвенционално оружје“, продолжи Захарова.
„Мора да признаеме дека НАТО сериозно се подготвува за потенцијален конфликт со нас“, рече Захарова.
Најавувајќи го почетокот на вежбите во јануари, НАТО најави дека на нив ќе учествуваат 90.000 војници, кои ќе го вежбаат сценариото американските сили да им помагаат на Европејците во земјите кои граничат со Русија и на источното крило на алијансата доколку конфликтот се разгори.
Вежбите ќе траат до мај, пишува Ројтерс.
Свет
Во Мексико трагаа по исчезнати туристи од САД и Австралија, пронајдоа три тела
Мексиканските власти пронајдоа три тела во областа Долна Калифорнија за време на потрагата по исчезнати туристи. ФБИ соопшти дека телата биле пронајдени во градот Санто Томас и се уште не се идентификувани. Австралијците Џејк (30) и Калум Робинсон (33) и Американецот Џек Картер Роуд (30) сурфале во близина на популарното туристичко место Енсенада. Исчезнаа на 27 април, пишува Би-Би-Си.
Мексиканската полиција во четвртокот испрашувала жена и двајца мажи во врска со нивното исчезнување. Пред да бидат пронајдени телата, во областа беа пронајдени напуштени шатори, запален бел пикап и мобилен телефон поврзан со исчезнатите туристи.
Долна Калифорнија е меѓу државите во Мексико со највисоко ниво на насилство додека локалните нарко банди се борат за територија. И покрај тоа, туристите често ја посетуваат областа поради добрите услови за сурфање.