Црна хроника
Екс-сопругот на пратеничката не ги признава обвинувањата за „Детонатор“
Не се чувствувам виновен, ниедно од кривичните дела за кои се товарам не сум ги сторил, изјави пред судот Горан Кузмановски, поранешниот сопруг на пратеничката од ВМРО–ДПМНЕ, Бети Кузмановска, кој е еден од обвинетите во случајот „Детонатор“.
Во својот исказ постојано ја споменуваше поранешната сопруга, која не се појави во судот да го слушне неговиот исказ.
Пиштолот што го нашла полицијата при претресот во неговата куќа бил од неговиот дедо од Крушево и го нашол во подрумот. Бидејќи бил љубител на антиквитети го извадил од подрумот, како трофеј, како сувенир. Овој пиштол не можел да го користи за пукање.
Не бил член на никаква злосторничка група, а поголем дел од обвинетите не ги ни познавал. Го познавал обвинетиот Горан Божиновски кој бил братучед со неговата поранешна сопруга.
Според неговиот исказ, семејството на Божиновски со години не контактирало со семејството на неговата сопруга, сé додека Кузмановска не станала пратеничка.
Кога ја избрале, Божиновски почнал да и’ се јавува и да бара од неа да му направи услуга, неговата жена да добие решение на неопределено време. Бидејќи Кузмановска не му одговарала на телефонските повици, Божиновски почнал да му се јавува на Горан Кузмановски.
Иако обвинението го товари Кузмановски дека му се јавил на телефон на Божиновски и му кажал дека ги прислушуваат телефоните, да ги сменат телефонските апарати и со тоа ги помогнал кривичните дела, изнуда, лихварство, комар – тој го негираше ова пред судот.
Тој го потврди овој телефонски разговор, но тврдеше дека му рекол така за „да го откачи“, да не му бара веќе услуги.
Потоа нивната комуникација продолжила, Кузмановски кој бил производител на мед, побарал од Божиновски да му помогне, да го пласира својот мед. Го распрашувал за поранешниот началник на СВР Штип, Ѕвонко Каширски, за неговите деловни објекти, магацини и за тоа што поседува.
Кузмановски се бранеше дека за Каширски се распрашувал бидејќи работел и со животно осигурување и сакал да се поврзе со него, за да му понуди своите вработени да ги осигура преку оваа фирма за животно осигурување.
Освен со Божиновски, контакт имал и со Симеон Михаилов кој е сега во бегство. Но, не контактирале пријателски, туку се скарале за девојка. Како што тврдеше Кузмановски, Михаилов го нападнал пред осум години, бидејќи бил женет за поранешна девојка на Кузмановски.
Началникот на СВР Штип, Каширски беше разрешен веднаш по полициската акција „Детонатор“. Во судскиот процес за полициската акција „Детонатор“ им се суди на вкупно 16 лица од Виница, Кочани и Штип .
Двајца од нив се во бегство, а дел од обвинетите се товарат дека трипати се обиделе да го убијат Драганчо Стојменов, двапати со подметнување експлозив на неговиот автомобил, а третиот пат дека првообвинетиот Игор Горански се обидел да го убие со пушка.
Обвинителството ги гони за обид за убиство, злосторничко здружување, перење пари, затајување на данок, лихварство, насилство и измама./крај/мф/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Топ
Две жртви во сообраќајката на патот Радовиш-Штип, уште едно лице повредено
Две лица загинаа на лице место во сообраќајната несреќа што се случи попладнево на магистралниот пат Радовиш-Штип.
Во несреќата е повредена и сопатничката од едното возило, која е пренесена во штипската Болница.
Веста за „Макфакс“ ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.
„На местото на несреќата починале возачите на двете возила, смртта ја констатирал лекар од „ЈЗУ Здравствен дом Радовиш“ а сопатничка од патничкото возило „опел” била пренесена во Медицински центар Штип“, информира Трајанова.
Увид на местото на несреќата врши јавен обвинител, а сообраќајот се пренасочува по стариот пат.
Од полицијата повеќе детали за несреќата најавуваат за утре.
Црна хроника
Приведен скопјанец: се заканувал со ловечка пушка
Утрово во 01.20 часот во село Богомила, општина Чашка, полициски службеници од Полициското одделение Чашка го лишиле од слобода Ѓ.Ѓ.(36) од Скопје, постапувајќи по претходна пријава од Н.Д.(37) од село Богомила.
Ѓ.Ѓ. пред објект во селото со ловечка пушка му се заканил нему и на С.С., М.Д., Б.Ј., Т.Д., П.Б. и Д.Ѓ..
Бил задржан во полициска станица, а известен бил и јавен обвинител и по документирање на настанот протв него ќе биде поднесена соодветна пријава, соопшти полицијата.
Црна хроника
Кривична за директорот на ЈП „Пазари“ Битола: склучил договор за јавна набавка со фирма избришана од Централниот регистар
Одделот за криминалистичка полиција, по наредба од Основното јавно обвинителство Битола презема предистражни дејствија и во координација со СВР Битола поднесе кривична пријава против Б.К. од Скопје поради постоење основи на сомнение за сторено кривично дело „злоупотреба на постапката за јавен повик, доделување на договор за јавнa набавкa или јавно-приватно партнерство“ по член 275-в од Кривичниот законик и против В.А. од Битола поради постоење основи на сомнение за сторено кривично дело „несовесно работење во службата“ по член 353-в од Кривичниот законик. Имено, првопријавениот Б.К., во својство на управител на правно лице од Битола, на 19.12.2019 со неизвршување на обврските од склучен договор за јавна набавка на стоки за проектирање, набавка и монтажа на фотоволтаични панели за производство на електрична енергија со ЈП „Пазари“ Битола нанел штета на претпријатието. Тој дал гаранција за поставените фотоволтаични панели во рок од 25 години, иако знаел и бил свесен дека во предвидениот рок од една година од основањето на друштвото не го внел основачкиот влог на своето друштво согласно чл.186 ст.5 од Законот за трговски друштва поради што истото согласно чл.552-а и чл.552-б од истиот закон било избришано од Централниот регистар. Исто така, Б.К. знаел дека не можел да гарантира за изведените работи, со што постапил спротивно на дадената изјава за сериозност на понудата.
Второпријавениот В.А., во својство на директор на ЈП „Пазари“ Битола со пропуштање на должен надзор во вршењето на своите овластувања и должности, не извршил надзор кој бил должен да го изврши над носителот на набавката дали е активен субјект или не, со што не постапил согласно одредбите од склучениот договор за јавна набавка и не го раскинал. Исто така, В.А. постапил спротивно на чл.101 ст.7 од Законот за јавни набавки и не објавил негативна референца на електронскиот систем на јавни набавки на Бирото за јавни набавки. На тој начин В.А. му овозможил на првопријавениот да се стекне со противправна имотна корист како право да не биде исклучен од идните постапки за јавни набавки во период од шест месеци од денот на евентуалното објавување на негативната референца, а воедно и по доставена фактура одобрил и извршил плаќање кон првопријавениот односно кон неговото правно лице во вкупен износ од 1 298 000 денари со што го оштетил буџетот на ЈП „Пазари“ Битола.