Македонија
Митрополит Агатангел: Тие што ме поддржаа и тие кои се изнафрлаа „дрва и камења“ знаат дека не одиме во добар правец

Митрополитот на Повардарската епархија Агатангел со дообјаснување на социјалните мрежи, откако на верскиот празник Свети Трифун во Кавадарци упати порака до лидерот на ВМРО-ДПМНЕ, Христијан Мицкоски да врати се што Македонија изгубила изминатиот период.
На официјалната страница на Повардарската епархија на фејсбук, митрополитот Агатангел вели дека негова должност е да се грижи и да го заштитува народот.
Пишува дека подолг период не реагирал на политичките случувања.
Во писмото тој вели: „Деновиве сме сведоци на една таква животна прилика, која успеa да разбуди многу од овие душевни чувства кај нашиот македонски народ. Некои ја толкуваа оваа ситуација полни со гнев, огорченост, омраза, други пак со поддршка, разбирање и сочувство.
Малку подолг период оставив простор без свои јавни реакции на актуелните политички случувања, имајќи надеж дека сепак македонскиот народ јасно ќе ги види замките во кои западна благодарејќи на однесувањето на оваа крајно однародена власт, која насилно и необјасниво протурка смена на името и отвори „добрососедски дебати“ со Бугарија за ревизија на нашата историја, со што го стави македонскиот народ во подредена позиција во однос на други и предизвика многу антидржавни чувства, а со тоа длабоко ги пречекори своите овластувања како извршна власт.
Како епископ на Македонската православна црква, секојдневно имам контакти со наши браќа и сестри кои имаат различни идеолошки и политички убедувања, и кои при нашите разговори неретко ја изразуваат својата загриженост и разочараност од потезите на оваа власт, која дефинитивно не го слуша пулсот на народот и неговите потреби, а најмалку ја гледа и ја чувствува неговата болка која несразмерно порасна изминативе неколку години.
Тој народ, македонскиот, е Црквата Македонска. Тој народ е душата на Црквата наша. Тој народ е народот за кои ние, како свештенослужители, ги принесуваме нашите молитви кон Севишниот Бог, народ за кој просиме благосостојба, здравје, среќа и напредок. Тој е оној ист народ, кој власта го запостави, му ги зголеми егзистенционалните маки, но згора на се, му ја допре и му ја повреди душата.
Мене ми е должност да се грижам за нашиот верен народ и да го заштитувам. Тој е сега ранлив и му треба утеха. Црквата е утеха. Црквата е закрила. Црквата е надеж.
И оние кои ме поддржаа овие денови, но и оние кои се изнафрлаа „дрва и камења“ по мене, длабоко во својата душа знаат дека не чинат работите. Дека нашата Македонија не оди во добар правец. Знаат сите, драги мои. И од ова повеќе нема бегање.
Прашање е само дали ќе развиеме доблести како народ да ја искористиме оваа крајно лоша ситуација во наша полза или дополнително ќе му дадеме простор на раздорот, неслогата и гневот и понатаму да го расекуваат и раскрвавуваат живото македонско ткиво.
Би се заблагодарил и би ги благословил сите Македонци во оваа прилика, онака како што правам секој ден во моите молитви. За мене секој еден од нас е Македонец, без разлика на се, и го љубам како роден брат. Тоа е моето силно чувство, кое никогаш нема да згасне“, пишува Митрополитот на Повардарската епархија Агатангел.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Железничката станица не може да биде турбо – фолк хаб, Ивановски ќе отстранува сѐ што не е во проектот од Кензо Танге

Железничката станица во најкус рок ќе биде исчистена од билборди, паноа и графити и ќе биде забрането да се поставуваат нови, а во исто време ќе почне подготовката на проекти за целосна реконструкција на објектот, за линија до аеродромот и за брза пруга на Коридорот 10. Ако се оди според планот, Синиша Ивановски, директор на „Македонски железници инфраструктура“, очекува изградбата да почне во текот на 2026 година, а дотогаш да се подготвуваат проектите на кои ќе работат заедно со Архитектонскиот и Градежниот факултет.
„Ќе се направи целосна реконструкција со особен акцент на зачувување на основниот изглед кој што е направен 1981 година по основниот проект на Кензо Танге, но со нови модерни елементи во архитектурата. Ќе има промени на инсталации, електро-инсталации, ќе се реши греењето, ладењето, водоводот. Она што станицата изгледа како пит-стоп на формула 1 веќе нема да биде така. Ќе има забрана за рекламирање и какви било билборди и се што во моментов го гледате. И за тоа нема да го чекаме проектот. Ќе почнеме веднаш. Договорите што ги имаме за закуп на рекламни паноа веќе нема да ги продолжуваме. Оние што се актуелни ќе ги замолиме компаниите за малку совесно, одговорно општествено однесување, да ги раскинеме спогодбено. Потоа ќе има промена на содржини. Железничката станица не може да биде турбо-фолк хаб во државата“, рече директорот Ивановски.
Се што не е дел од основниот проектот на Кензо Танге и низ годините било додадено на Транспортниот центар, директорот Ивановски вели дека ќе биде отстрането, вклучително и култниот објект за бојадисување кожа „Кенан“ кој од плоштадот беше преселен кај Железничката станица.
„Се што е во меѓувреме доградено од првичниот проект на Железничката станица ќе биде отстрането. Низ годините наназад некој тоа го легализирал, некој склучил некои договори кои не се баш правно издржани. Секоја надградба, дали се ресторани, дали е кој било комерцијален објект кој што излегува од првичниот проект, ќе биде отстранет“, вели директорот Ивановски.
Тој очекува за пет до шест години од денес да бидат готови брзата пруга на Коридор 10, линијата до аеродромот и целосната реконструкција на Железничката станица.
Деканот на Градежниот факултет, Јосиф Јосифовски, смета дека овој проект е долго задоцнет, но веќе се гледа некаков почеток.
„Објектот на Железничката станица е многу значаен и битен меѓутоа не помалку битна е железничката мрежа, поточно железничкиот Коридор 10 кој што исто така не е во некоја добра состојба. Наша задача со овој проект е да направиме целосна реконструкција и рехабилитација на елементите од железницата во која што се јавуваат различни проблеми или санации со кои што ние ќе се занимаваме како институција од санирање и зајакнување на мостовски конструкции преку санирање и обезбедување таканаречени свлечишта, потпорни ѕидови и така натаму“, рече деканот Јосифовски.
Посебен предизвик за Архитектонскиот факултет, како што рече деканката Анета Христова – Поповска ќе биде работата на овој проект оти тој за земјата претставува пасош за влез во европското семејство.
„Внимателно ќе ги преиспитаме оригиналните аспекти на проектот на дизајнот на Кензо Танге, ќе бидеме многу внимателни софистицирано да ги редизајнираме аспектите на дизајнот, но исто така да пружиме и нешто ново што скопјани долго време го очекуваат и претставува додадена вредност на она што денес претставуваат железничките станици. Тој приклучок со брзата линија, брзите железници во Европа е извонредна работа, го очекуваме со години, им го должиме на генерациите после нас но исто така тоа е една наша неостварена желба која што мислиме дека со оваа интервенција што ќе се направи ќе биде еден остварен сон“, рече деканката Христова-Поповска.
Со проектирање нема да брзаат, ќе работат во фази и за секоја фаза ќе ја известуваат јавноста.
Директорот Ивановски вели дека заедно со обновата на објектот, брзата пруга на Коридорот 10 и линијата до аеродромот, ќе работат и на санација на мостот на Црна река кој делумно се урна 2022 година, санација на неколку свлечишта во државата кои се проблем за железничкиот сообраќај и ремонт на пругата Зелениково – Велес за која постојано добива жалби дека возовите се движат многу споро.
Македонија
Сиљановска-Давкова го пречека Пелегрини, во фокус соработката и евроинтеграциите

Започна официјалната посета на словачкиот претседател Пелегрини
Со највисоки државни и воени почести претседателката Гордана Сиљановска-Давкова го пречека словачкиот претседател, Петер Пелегрини, кој престојува во дводневна официјална посета на земјава.
По тет-а-тет средбата, се одржа пленарен состанок на македонската и на словачката делегација.
Соговорниците се заложија за унапредување на билатералните односи, продлабочување на економската соработка, забрзување на македонскиот и регионалниот евроинтегративен процес и превземање итни чекори за подобрување на европската и глобалната безбедност.
Обајцата ја потврдија одличната соработка, втемелена во заедничкото духовно наследство, културната блискост и искреното пријателство.
Претседателката му се заблагодари на словачкиот претседател за континуираната поддршка на македонското членство во Европската Унија, повторувајќи дека процесот на проширување мора да се темели на Копенхагенските критериуми, без дополнителни билатерални условувања.
Со оглед на бројните глобални предизвици, претседателите укажуваат на потребата од поголема доверба, солидарност и заедништво на државите и нациите во рамките на ЕУ, НАТО и Обединетите нации.
На средбата со претседателот Пелегрини, Сиљановска-Давкова изрази жалење за вчерашната железничка несреќа во Словачка, во којашто се повредени околу 100 лица и посака нивно побрзо закрепнување.
За време на посетата на претседателот Пелегрини, македонскиот министер за надворешни работи и надворешна трговија, Тимчо Муцунски и државниот секретар во словачкото Министерство за економија, Владимир Шимоњак, потпишаа Меморандум за соработка во областа на економијата.
Македонија
Измамен кумановец за 1,1 милион денари при купување градежни машини

Триесет и петгодишен маж од Куманово пријавил дека бил измамен од две лица за износ од 1.110.000 денари, соопшти МВР.
Според пријавата, лицата го контактирале преку мобилни апликации, претставувајќи се како сопственици на градежни машини што пријавителот сакал да ги купи. По договорот, тој, по нивни насоки, ги предал парите на едно од лицата преку каса прими на приватен субјект.
Кога подоцна се обидел да ги подигне машините, лицето му рекло дека работи сам и дека парите требало да се уплатат на негова сметка. Пријавителот потоа забележал дека истите машини повторно се огласени за продажба и сфатил дека бил измамен.
Полицијата презема мерки за целосно расчистување на случајот.