Пратеничката група на ВМРО-ДПМНЕ и коалицијата „За обнова на Македонија“, денес до Собранието ќе достави два исклучително битни предлог-закона, соопшти Бојан Стојаноски, пратеник на пратеничката група на ВМРО-ДПМНЕ.

„Со првиот предлог-закон бараме намалување на акцизата за горивата за моторни возилата за 50 %, со што значително ќе се намали финансискиот товар врз граѓаните и транспортните компании. Со ова цената на бензинот веднаш ќе се намали 13 денари, а цената на дизел-горивото 9,5 денари.

Со вториот предлог-закон бараме до 31 декември 2022 година данокот на додадена вредност за производите за човечка исхрана и за топлинската енергија, т.е. парното, да бидат со 0 %. Дополнително, бараме и ДДВ за електричната енергија да биде 5 % и во остатокот од 2022 година, а не само до 1 јули, по што е предвидено покачување на ДДВ на 10 %.

Тој потсети дека вчера претседателот на Регулаторната комисија за енергетика најави ново зголемување на цената на горивата. Со што, како што рече, зголемувањата се огромни, надминуваат и 30 % од пред две години.

„Пред точно две години, на 2 март, цената за литар бензин изнесуваше 64 денари, а за литар дизел-гориво 56 денари. Во овој момент без најавеното покачување цената за литар бензин изнесува 82,5 денара, а за литар дизел-гориво 74 денари. Со оглед дека власта не размислува во интерес на граѓаните, ние како пратеничка група сметаме дека државата мора да се откаже од 50 % од акцизата во овој критичен период во кој има нарушување на светскиот пазар на енергентите“. Владата размислува со мотото „сиромашните немаат пари за да возат“ и не сфаќаат дека повисоките цени на горивата ги засегаат сите, без разлика на имотната состојба на граѓаните. Производите што се носат во маркетите се превезуваат со камиони што возат на дизел-гориво, меѓуградскиот превоз, кој поскапе 20-ина отсто изминатиов период, истот ака вози на дизел-гориво, а за жал, власта е слепа и не презема ништо. За потсетување, власта неколкупати досега ја зголемуваше акцизата и сѐ уште има предлог во собраниска процедура за зголемување на давачките за дополнителни 4 денари за литар гориво“, рече Стојаноски.

Покрај намалувањето на акцизите, од ВМРО-ДПМНЕ бараат и дополнително намалување на финансискиот товар на граѓаните преку целосно намалување на ДДВ за прехранбени производи од 5 на 0 %.

„Сведоци сме дека во изминатиот период цените на основните прехранбени продукти драстично пораснаа, па така, според последното соопштение на Државниот завод за статистика во јануари 2022 година наспроти истиот месец претходната година, лебот поскапе 10,6 %, месото 6,4 %, млекото, сирењето и јајцата 7,2 %, маслата 26 %, овошјето 11,3 %, зеленчукот 14,8 % итн. Долга е листата на поскапувања“, додаде Стојаноски.