Свет
Навални од затворот: Ако сакаме крај на војната, треба да ги наполниме затворите со сопствените тела
![](https://makfax.com.mk/wp-content/uploads/2022/03/1440x810_cmsv2_6331770e-d34b-5ea2-b6cf-8c5b89fb14aa-6383774.jpg)
Противникот на рускиот претседател, опозиционерот Алексеј Навални, кој моментно се наоѓа во руски затвор, на „Твитер“ објави преглед на војната во Украина и ситуацијата во Русија.
Рецензијата на Навални е објавена на официјалниот твитер-профил на рускиот опозициски лидер. Иако Навални нема пристап до интернет во затворот, се верува дека тоа му го диктирал на својот адвокат.
„Не можеме да бидеме кукавици што се преправаат дека не ја гледаат агресивната војна на лудиот император. Ние – Русија – сакаме да бидеме нација на мирот. За жал, малкумина може да нè наречат така сега. Но, во најмала рака можеби нема да станеме нација на исплашени, замолчени луѓе. Кукавици што се преправаат дека не ја забележуваат агресивната војна што ја води луд цар против Украина“, напиша Навални.
„Не можам, не сакам и нема да молчам и да гледам како псевдоисториските глупости за настаните пред 100 години стануваат изговор за Русите да убиваат Украинци, а тие, бранејќи се, убиваат Руси“, напиша жестокиот противник на Путин.
„Во 20-тите години на 21 век гледаме вести за луѓе што горат во тенкови и бомбардирани куќи. Ги гледаме на телевизија заканите за почнување нуклеарна војна. Јас сум од СССР. Таму сум роден. Главната фраза на СССР од моето детство беше борба за мир. Ги повикувам сите да излезат на улица и да се борат за мир“, повика опозиционерот.
„Путин не е Русија. И ако има нешто во Русија на што може да се гордеете најмногу, тоа се 6.824 лица што беа приведени затоа што, без причина, излегоа на улиците носејќи постери на кои пишуваше „’Не’ на војната“. Тие велат дека некој што не бил на протест и не ризикува апсење не може да повика на протест. Јас сум во затвор, па мислам дека можам. Не можеме повеќе да чекаме. Каде и да сте, во Русија, Белорусија или на другата страна на планетата, излегувајте на главниот плоштад во вашиот град секој ден во 14 часот“, напиша тој.
„Мораме да стискаме заби. Ако сте во странство, излезете пред руската амбасада. Ако можете да организирате протест, направете го тоа за време на викендите. Да, може да има малку луѓе првиот ден. А вториот – уште помалку. Но, ние мора да стискаме заби, да го победиме стравот и да излеземе на улица и да бараме крај на војната. Секој уапсен мора да биде заменет со двајца нови демонстранти. Ако сакаме да ја запреме војната, треба да ги наполниме затворите со сопствените тела. Сѐ си има своја цена, а сега, пролетта 2022 година, таа цена треба да ја платиме. Никој нема да го направи тоа наместо нас. Да се бориме против војната“, заклучи тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Европа
Русија соопшти дека соборила 36 дронови испратени од Украина
![](https://makfax.com.mk/wp-content/uploads/2024/04/shahed-136-dron00002-830x0.jpg)
Системите на руската противвоздушна одбрана уништија 36 дронови, испратени од Украина во текот на изминатата ноќ кон територијата на Русија, соопшти Министерството за одбрана во Москва.
Петнаесет беспилотни летала се соборени над Курска област, девет над Липецка, по четири над Воронешка и Брјанска и по два над Орловска и Белгородска, посочи Министерството во објава на социјалната мрежа Телеграм.
Европа
Четиринаесетгодишно девојче е киднапирано во Грција, во месноста Лариса
![](https://makfax.com.mk/wp-content/uploads/2024/06/isceznata.jpg)
Четиринаесетгодишно девојче е киднапирано во Грција, во месноста Лариса, а активирана е „Амберт алерт“ – килибарна тревога. Девојчето Хрисула Хрисобаланти исчезнало на 27 јуни околу 20.30 часот. Се претпоставува дека девојчето било киднапирано од постаро лице.
Медиумите пренесуваат дека девојчето е високо 155 сантиметри, тешко 55 килограми, долга кафена коса и темнозелени очи.
Во моментот на нејзиното исчезнување носела зелени бермуди, бела маица и бели влечки.
Грчките власти пред неколку дена известија дека трагаат по девојчето Константина-Ирини Р.(16), кое исчезна од предградието Ахарнес во Атина.
Според грчките медиуми, девојчето последен пат била видена во неделата на 16 јуни во вечерните часови.
Регион
Вучиќ го посети повредениот полицаец, му честиташе за неговата смиреност и храброст
![](https://makfax.com.mk/wp-content/uploads/2024/06/Vucic.jpg)
Претседателот на Србија, Александар Вучиќ денеска го посети повредениот припадник на Жандармеријата Милош Јевремовиќ (34), кој откако беше ранет од самострел, беше опериран и е во стабилна состојба.
„Пресреќен сум што Јевремовиќ Милош се чувствува добро по операцијата. Му честитав на Милош за неговата извонредна храброст, неговата смиреност и успешно завршената задача во борбата со терористот. Србија нема да има милост кон терористите“, напиша Вучиќ на фотографијата со ранетиот полицаец.
„Им честитам на командирите и на сите во полициските сили за исклучителното однесување на Милош Јевремовиќ, ќе му се оддаде почест штом ќе ја напушти болницата. Важно е што нашиот херој Милош е жив и здрав, покажа како треба да се реагира во таков момент“, изјави претседателот на Србија.
Непознато лице денес со самострел тешко го рани припадникот на жандармеријата кој бил на должност да ја обезбедува израелската амбасада.
Припадникот на жандармеријата употребил оружје во самоодбрана и го победил напаѓачот, кој од здобиените повреди починал.
Министерот за внатрешни работи на Србија Ивица Дачиќ изјави дека во Белград е уапсено уште едно лице под сомнение за терористичко здружување.
„Во Белград е уапсено уште едно лице осомничено за терористичко здружување. Станува збор за лице од Белград, родено 1999 година, кое веќе беше уапсено пред две години бидејќи бил администратор на неколку милитантни групи на Интернет кои повикувале на џихад“, соопшти Дачиќ.
Тој објасни дека случајот против него и понатаму се води, а тој е пуштен од притвор.