Во групната тепачка којашто во петокот се случи во Велес, во заедничкиот двор на средните училишта „Димитрија Чуповски“ и „Кочо Рацин“, едно лице е повредено со нож а десет се приведени во полицијата.

Меѓусебното недоразбирање, средношколци од двете училишта, меѓутоа и повозрасни лица го расчистувале со употреба на метални предмети и нож. Училишното обезбедување најнапред се обидело да ја смири состојбата, но таа целосно била ставена под контрола откако пристигнала полицијата.

„Поради претходно меѓусебно недоразбирање се пресметале со употреба на метален боксирач и употребени се ножеви“, рече Ненко Александрив, портпарол на СВР Велес

Во тепачката едно лице се здобило со убоди од нож во левата дланка. Тоа е пренесено на лекување во градската болница.

„Раната е од средно тежок карактер, детето е згрижено во моментов е на одделението на хирургија“, рече Силвана Мишкова, портпаролка на Јавната здравствена установа Општа болница Велес.

Од полицијата велат дека инспекторите сé уште работат на сослушување на приведените учесници во тепачката. Постои можност бројот на приведени да се зголеми.

По завршување на истрагата, од велешката полиција велат дека ќе се знае и конечната причина за масовната тепачка и каква пријава ќе заработи секој од учесниците во насислтвото./крај/мф/сн