Економија
Неопходен е ефикасен социјален дијалог за унапредување на безбедноста и здравјето при работа
Предизвиците поврзани со пандемијата на Ковид-19 покажаа дека постоењето позитивна култура и силни системи за безбедност и здравје при работа (БЗР) се од суштинско значење за заштитата на работната средина и одржување на здравјето и безбедноста на работниците. За успешно справување со постојните и со идните предизвици што влијаат врз здравјето и безбедноста на работните места, неопходен е ефикасен социјален дијалог, како и активно учество на сите релевантни страни во областа на БЗР како на национално така и на ниво на деловни субјекти.
Ова се клучните пораки од конференцијата, која по повод 28 aприл – Светскиот ден на безбедност и здравје при работата, ја организираа Меѓународната организација на трудот, Министерството за труд и социјална политика и Советот за безбедност и здравје при работа, а на која учествуваа и претставници на синдикатите, Државниот инспекторат за труд, Организацијата на работодавци, како и експерти од областа на трудовото право.
„Сите ние заедно, самите работници, работодавците, стручните лица и професионалци од областа, институциите, мораме да работиме активно, секој во својот домен и во рамките на своите надлежности и можности за да обезбедиме нашите работници навистина да бидат посигурни, побезбедни и поздрави на своите работни места“, рече во своето обраќање министерката за труд и социјална политика, Јованка Тренчевска, потенцирајќи дека oдбележувањето на 28 април треба сите да нѐ поттикне уште повеќе да работиме и на подигнување на јавната свест за безбедноста и здравјето при работа имајќи предвид дека сите ние ја споделуваме и одговорноста и обврската, секој во својот дел, да се грижиме за унапредување на безбедноста на работните места и да работиме на превенирање на несреќите, повредите и заболувањата поврзани со работата.
Истакнувајќи го значењето на социјалниот дијалог за унапредувањето на безбедноста и здравјето при работа, министерката Тренчевска рече: „Мораме да ги негуваме и постојано да ги поттикнуваме социјалниот дијалог и меѓусебната соработка во оваа област како на национално така и на ниво на претпријатие ако сакаме да создадеме реални услови за успешно справување со постојните, но и со новите предизвици во однос на безбедноста и здравјето на работното место.
За познавачите на оваа проблематика, исклучително е важно во земјата да се создаде превентивна култура на безбедност и здравје при работа, онака како што таа е дефинирана во Конвенцијата на меѓународната организација на трудот (МОТ) за промотивната рамка за БЗР од 2006 година.
„Суштинскиот социјален дијалог и трипартитните обврски претставуваат камен темелник на превентивната култура за безбедност и здравје при работа, чија улога е да поттикне трајни подобрувања на безбедноста и здравјето при работа“, истакна националниот координатор на МОТ, Емил Крстановски.
Статистичките податоци покажуваат дека годишно во светот се случуваат и над 400 милиони инциденти и несреќи на работните места, а се регистрирани и до 2,9 милиoна смртни случаи. Повредите на работното место и професионалните заболувања не само што предизвикуваат немерливо човечко страдање на жртвите и нивните семејства туку се причина и за големи економски загуби за претпријатијата и националните економи, кои се манифестираат преку зголемени трошоци за здравствена заштита и обесштетување, трошоци поради изгубено производство, намалена работна способност и пониско учество на работната сила. Се проценува дека придонесот на несреќите на работното место и професионалните заболувања во вкупните годишни загуби на домашниот бруто- производ (БДП) на светско ниво изнесува 5,4 %.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Стојаноски за одлуката на Регулаторна: ВМРО-ДПМНЕ ќе ги користи сите инструменти за да нема ценовни шокови за граѓаните
Бојан Стојаноски, пратеник на пратеничката група на ВМРО-ДПМНЕ истакна дека ја поздравуваат одлуката на Регулаторната комисија за енергетика, за минималното незначително покачување на цената на електричната енергија.
Мораме да нагласиме, вели Стојаноски дека оваа одлука доаѓа откога се создадоа услови, по усвојувањето на предлог-законот за енергетика поднесен од тогашниот пратеник, сегашен Премиер, Христијан Мицкоски и од пратеничката група на ВМРО – ДПМНЕ.
„Само да ја потсетам јавноста, со тие измени кои беа усвоени со 84 гласа “ЗА”, прво се создаде услов за продолжување на лиценцата на универзалниот снабдувач, со што се заштеди и на средства кои што се потребни за да се формира ново правно лице, но и на роковите кои што беа потребни за формирање на истото правно лице со што пак се создаде можност маржата која што е клучна за пресметување на цената на електричната енергија да биде од 11,5% на 9,9%.
Би сакал да потсетам дека премиерот, Христијан Мицкоски упати еден апел до универзалниот снабдувач за оптимизација на енергетскиот систем, за да оној остаток од 15% кој што требаше да се набави од слободниот пазар кој што чини од 90-100 евра мегават час, наместо оние 60 кои што беа понудени на домашниот тендер ќе успеат да се надополнат од домашниот пазар и на тој начин цената на електрична енергија да остане скоро иста како што е сега“, појаснува пратеникот на ВМРО-ДПМНЕ.
Ова, како што додава е максимум што можеше новото парламентарно мнозинство и новата владејачка коалиција да го направи со оглед на тоа што, како што појаснува, сè уште во клучните институции не е преземено владеењето.
„Но она кое што планираме да го направиме во наредниот регулациски период тоа е од 01.01 до јуни месец 2025 година, да го оптимизираме енергетскиот систем со што ќе ги намалиме трошоците кои што се нудат на универзалниот снабдувач, ќе успееме подомаќински да работиме и на тој начин доколку надворешните влијанија во енергетскиот сектор не бидат на некое подруго ниво, ќе успееме дополнително да ја намалиме цената на електричната енергија.
Зошто е тоа важно? Бидејќи нашата држава во изминатите 7 години мака мачи со покачувањето на потрошувачката кошничка и со инфлацијата, а добро е економски познато дека два клучни фактори ја подгреваат инфлацијата тоа е едниот кој што е цената на електричната енергија и вториот е цената на горивата. Така да со оваа одлука која што е рационална на Регулаторната комисија за енергетика и по самото укажување на претседателот на комисијата дека по усвојувањето на овој Закон се создале услови за да нема ценовен шок на граѓаните, ВМРО – ДПМНЕ и во иднина ќе продолжи на ваков начин, со сите инструменти кои се дадени во можност да ги искористува за да нема ценовни шокови и за да го подобрува животот на граѓаните“, истакнува Стојаноски.
Економија
НБРМ: Банкарскиот систем останува здрав и стабилен, а мерките придонесуваат за дополнително зголемување на неговата отпорност
Советот на Народната банка на редовната седница го разгледа и го усвои Извештајот за ризиците во банкарскиот сектор за првиот квартал од 2024 година. Во Извештајот се оценува дека банкарскиот сектор ја задржа својата стабилност и сигурност во работењето, со подобрена солвентност, одржана ликвидност и добар квалитет на кредитното портфолио.
Стапката на адекватност на капиталот достигна ниво од 18,9%, коешто е највисоко анализирано од 2006 година наваму. Подобрувањето на показателот произлегува од растот на сопствените средства на банките, најмногу заради реинвестирањето на добивките од минатата година. Повисоките показатели за солвентноста во голема мера се поттикнати и од повисоките регулаторни и супервизорски барања во врска со капиталот на банките, пред сѐ поврзано со заштитните слоеви на капиталот (противцикличниот и заштитниот слој на капитал за системските значајни банки) и капиталниот додаток утврден врз основа на супервизорска оценка.
Ликвидноста на банките се задржа на вообичаените задоволителни нивоа. Стапката на покриеност со ликвидност на банкарскиот систем изнесува 279,1%, што е значително повеќе од регулаторниот минимум (100%) и го потврдува задоволителниот обем на ликвидност со кој располага македонскиот банкарски систем.
Во првиот квартал од 2024 година, квалитетот на кредитното портфолио на банките се задржа, и покрај тоа што дел од показателите за изложеноста на кредитниот ризик забележаа зголемување, што се должи на методолошките промени коишто се воведоа од почетокот на годината, со примената на новата Одлука за методологијата за управување со кредитниот ризик. Со новата Одлука се направи целосно усогласување со новата регулатива на ЕУ во овој сегмент. Стапката на нефункционални кредити на ниво на банкарскиот систем се зголеми за 0,3 проценти поени, што е ефект од поинаквиот методолошки пристап во определувањето на нефункционалниот статус на кредитната изложеност, а не на променетата кредитоспособност на клиентите
Во услови на подобрена солвентност, заедно со традиционално солидната ликвидност, билансите на банките продолжија солидно да растат. Депозитите од нефинансиските субјекти остварија солиден годишен раст од 9,1%, со забележителни поволни поместувања во рочните и валутните склоности на депонентите, при што долгорочните депозити го забрзаа годишниот раст на 28,3%, а депозитите во денари растеа двојно побрзо од девизните депозити. Кредитната активност на банките забележа годишен раст од 6,2%, кој што беше присутен кај кредитите и кон домаќинствата и кон претпријатијата.
На седницата се разгледа и Годишната информација за плаќањата во земјава во 2023 година при што беше заклучено дека според податоците од банките со кои располага Народната банка продолжи трендот на годишен раст на бројот на безготовински платежни трансакции за 12,4 %, при остварени 218 милиони платежни трансакции. Растот во значаен обем произлегува од посилниот раст на бројот на трансакции со платежни картички за 17,3%, со што нивното учество во вкупниот број безготовински трансакции достигна значителни 65,2%, при истовремено зголемување и кај вредноста на овие трансакции за 16,2%. Притоа, забележан е сѐ поголем број на плаќања со картички на физичките места на продажба (годишен раст од 18,0%), но продолжува и позитивниот тренд на пораст на плаќањата во е-трговијата (годишен раст од 11,3%).
Економија
Цените на златото се стабилизираа по двонеделен минимум
Цените на златото денеска се стабилизираа откако претходно паднаа на најниско ниво за две недели, додека инвеститорите ги очекуваа податоците за инфлацијата во САД за да видат колку брзо Федералните резерви ќе ги намалат каматните стапки.
Цената на златото е непроменета на 2.299,55 долари за унца, а златото падна на најниско ниво од 10 јуни во средата, пренесува CNBC.
Цената на фјучерсите на златото во САД паднаа за 0,1 отсто на 2.310,20 долари.