Британскиот министер за надворешни работи Дејвид Лами изјави дека Обединетото Кралство нема да испрати војници во Украина, откако вестите сугерираа дека Британија и Франција ја разгледуваат оваа опција.

Тензиите меѓу Русија и Западот значително ескалираа во последниве денови, откако американскиот претседател Џо Бајден ја овласти Украина да користи ракети со долг дострел доставени од САД за напад на цели во Русија.

„Монд“ вчера објави дека Франција и Велика Британија „не ја исклучуваат“ можноста за испраќање војници и приватни одбранбени компании во Украина, повикувајќи се на неименувани извори.

Дебатата за испраќање војници во Украина беше повторно покрената по посетата на британскиот премиер Кир Стармер на Франција на 11 ноември, пишуваат француските весници.

Но, на прашањето за извештајот во интервју, британскиот министер за надворешни работи рече дека ставот на ОК да не испраќа војници во Украина не е променет.

„Јасно е дека сме подготвени и дека продолжуваме да ги поддржуваме Украинците, особено со тренинзи, но постои долгогодишен став дека не испраќаме британски војници на местото на настанот“, изјави Лами за весниците Ла Република, Ле Монд и Ди Велт на состанокот на министрите за надворешни работи на Г7 во Италија.

Северноатлантската алијанса ја премина границата на секаква пристојност, дозволувајќи си да дава изјави за можноста за превентивни напади на руска територија, изјави министерот за надворешни работи на Русија, Сергеј Лавров.

Тој денеска на состанокот на шефовите на безбедносните агенции и разузнавачките служби на земјите од ЗНД соопшти дека шефот на воениот комитет на НАТО, Роб Бауер, ги соопштил вистинските намери на Алијансата, кога кажал дека размислуваат за извршување превентивни удари против Русија во случај на можен вооружен конфликт, пренесува ТАСС.

„Шефот на воениот комитет на НАТО отворено рече дека, за да се постигнат целите за заштита и одбрана на земјите-членки на НАТО, треба да се извршат превентивни напади врз цели во Русија кои, според мислењето на НАТО, можат да предизвикаат Закана за земјите-членки на Алијансата,  тие ја преминаа границата на пристојноста и веќе јавно ги кажуваат своите вистински намери“, дополнува Лавров.

Заменик-претседателот на Советот за безбедност на Русија Дмитриј Медведев денеска изјави дека трансферот на нуклеарно оружје во Украина ќе биде еквивалентен на акт на напад против Русија врз основа на одредбите на ажурираната нуклеарна доктрина на Руската Федерација.

„Самата закана за пренесување нуклеарно оружје на режимот во Киев може да се смета за подготовка за нуклеарен конфликт со Русија“, напиша Медведев на својот канал Телеграм, пренесе ТАСС.

„Њујорк тајмс“ претходно објави дека американски и европски претставници предложиле враќање на нуклеарното оружје на Украина, кое таа го напушти по распадот на СССР. Весникот оценува дека таквиот чекор е тежок за спроведување и дека се заканува да предизвика „сериозни последици“.

Рускиот претседател Владимир Путин минатата недела потпиша указ за одобрување на ажурираната нуклеарна доктрина.