Македонија
Мицкоски: МВР и Обвинителството да ги обелоденат имињата на функционерите од СДСМ и ДУИ, кои испумпувале пари од УЈП
Организирана група, која злосторнички се здружила и лесно ги крадела граѓаните, односно го оштетила буџетот, според нашите информации, некаде помеѓу 20-30 милиони евра. Постојат дури и докази дека лица вработени во Управата за јавни приходи се повикувани во Министерството за внатрешни работи да дадат свој исказ за тоа што јас вчера го зборував. Затоа е многу важно дали МВР ќе излезе со детали и ќе го спроведува законот заедно со Обвинителството за организиран криминал или ние тоа ќе го направиме, ќе го обелодениме во јавноста, и тоа во детали со имиња и со точни фирми, кои се дел од ова би рекол злосторничка здружина, истакна претседателот на ВМРО-ДПМНЕ, Христијан Мицкоски, при посетата на општина Радовиш во рамките на активноста „Промените се случуваат, секогаш со народот“ одговарајќи на новинарско прашања во врска со аферата за фиктивно испумпување на пари од УЈП.
Мицкоски додаде дека во аферата се вплеткани високи функционери на СДСМ и ДУИ.
„Ако ме прашувате како тоа функционирало, еве ќе се обидам да објаснам, имаме субјект А, кој е инстант-компанија и која генерира фиктивни побарувања од УЈП за поврат на данок на додадена вредност, и фирма Б, односно субјект Б, кој ѝ долгува на УЈП по основ на данок на додадена вредност. Фирмава А инстант-компанија отворено со фиктивни фактури ѝ приоѓа на фирмава Б и ѝ вели – дај да се прибиеме со цесија, односно нити тие мене да ми вратат нити вие да платите. Нормално, со определен надомест. И тогаш што се случува? Тие се пребиваат, ниту овие што должат на Управата, фирмата Б, плаќа, нити фирмата А добива официјално поврат на ДДВ, а фирмата Б нормално за одреден надомест ја прифаќа оваа услуга од фирмата А. Тоа е суштината и на тој начин никој од Управата, поточно од скопската дирекција, тука можеби детали може да ви каже и една актуелна пратеничка на СДСМ, која сега е пратеник, а порано беше директор на скопската подружница на Управата за јавни приходи. Или, пак, има еден господин, кој мислам дека доаѓа од општина Ранковце, близок до поранешен висок функционер на СДСМ, а сега министер, можеби тој што е сега актуелен директор на скопската дирекција на УЈП може да ви каже детали. Или, пак, самата директорка на УЈП или нејзиниот заменик може да ви ги каже деталите“, нагласи Мицкоски.
Тој ги повика МВР и Обвинителството за организиран криминал да излезат со имиња, со јасна и прецизна динамика како ќе се спроведе законот за овој криминал. Во спротивно, ако тие не го сторат, Мицкоски рече дека тие јавно ќе ги обелоденат фирмите и кои се тие високи партиски функционери што учествувале и од ДУИ и од СДСМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сообраќајот непречено по наместа влажни коловози
Сообраќајот на државните патишта се одвива непречено, по наместа влажни коловози. Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата, соопшти АМСМ.
Се препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Патниот правец Охрид – Ресен, преку националниот парк Галичица од 01.04.2024 е пуштен за сообраќај за сите видови возила со вкупна тежина до 3.5 тони.
Времена измена на режим на сообраќај на регионален пат Р1101 делница Прилеп – Битола заради интезивирање на градежни активности во врска со проект “Санација на трупот на патот кај мост на река Шемница на Државен пат Р1101 км 85+903, делница Прилеп – Битола”, и тоа од 27.03.2024 ќе има целосно затворање на делницата.
На 26.03.2024 година од 14.15 часот извршена е времена измена на режимот на сообраќајот на делницата од автопатот 300м после надвозник „Маџари“ до клучка „Белви“ за време на поправка и рехабилитација на државен пат А1/А2 делница Скопје-Куманово (десна коловозна лента) каде што со ветикална сообраќајна сигнализација во должина од 200м сообраќајот се канализира и успорува од левата (за претекнување) сообраќајна лента во средната (за возење) сообраќајна лента за да потоа во должина од 1500м целиот сообраќај ќе се одвива по сообраќајната лента за претекнување (левата), а средната и сообраќајната лента за принудно запирање ќе бидат затворени за сообраќај.
Од 18.03.2024 г. има измена на режимот на сообраќај на државниот пат Р1101, делница Прилеп – Битола, заради интезивирање на градежните активности во врска со проект Санација на патот, кај мост на река Шемница.
Македонија
Г.г. Стефан: Да ги зацврстиме единството и слогата, да ги надминеме разногласијата и меѓусебните поделби
Ариепископот Охридски и македонски заедно со Светиот архиерејски Синод, по повод велигденските празнувања, испраќа мир и благослов од Бога до свештенослужителите, монаштвото и до сите чеда на МПЦ-ОА.
– Христовото воскресение е смислата на нашето севкупно постоење. Тоа е стожерот околу којшто се одвива сиот наш живот и камен-темелникот врз којшто се гради сиот наш подвиг на верата, на надежта и на љубовта во Бога. Тајната на Христовото воскресение го преобразува и го вообличува севкупниот наш поглед кон светот и човекот, кон времето и вечноста. Зашто, токму ова спасоносно собитие е најголемата вистина којашто му беше објавена на човековиот род и токму оваа Тајна над тајните е најрадосното благовестие со коешто велегласно беше возвестена конечната победа на животот над смртта, на доброто над злото и на љубовта над омразата, вели г.г. Стефан меѓу другото во обраќањето.
Македонија
Времето денеска сончево и потопло
Времето денеска во земјава ќе биде претежно сончево и потопло, попладне во планинските подрачја со услови за краткотраен пороен дожд и ретки грмежи. Ќе дува слаб ветер од јужен правец. Минималната температура ќе биде во интервал од 3 до 10, а максималната ќе достигне од 18 до 25 степени.
Во Скопје претежно сончево и тивко. Минималната температура ќе се спушти до 7, а максималната ќе достигне до 24 степен.
Утре времето ќе биде претежно сончево и топло, попладне во планинските подрачја со услови за краткотраен пороен дожд и ретки грмежи. Во вторник попладне ќе има локална појава на нестабилност, а во среда и четврток под влијание на нов влажен бран во поголем дел од земјава ќе има пороен дожд и грмежи, локално во форма на невреме со пообилни врнежи и засилен ветер.