Високата претставничка на Европската Унија за надворешни работи и безбедносна политика, Каја Калас, денес изјави дека не знае зошто американскиот претседател Доналд Трамп го обвини украинскиот лидер Володимир Зеленски, меѓу другите, за војната во Украина.

Во неделата, Трамп го обвини Зеленски, како и рускиот претседател Владимир Путин и поранешниот американски претседател Џозеф Бајден, дека се одговорни за војната во Украина.

„Не знам зошто го кажува тоа. Сè имате документирано. Русија ја започна оваа војна на 24 февруари 2022 година, тоа е војна од големи размери. Во 2014 година, тие го анектираа Крим“, изјави Калас за италијанската „Република“.

Таа се осврна на рускиот напад врз украинскиот град Суми од минатата недела, во кој загинаа најмалку 35 лица, велејќи дека тоа е доказ дека Путин „не сака мир“.

„За жал, така е. За мир се потребни две страни. Само една е доволна за војна. Пред 34 дена, Украина прифати безусловно примирје. Значи, 34 дена, Русија бомбардираше, таргетирајќи цивили. Деца, луѓе што одеа во црква. Ова јасно покажува дека тие сакаат само безусловно предавање на Украина“, истакна Калас.

На прашањето дали Трамп бил премногу оптимист кога рекол дека може да ја заврши војната во Украина за еден ден, Калас вели дека можел брзо да ја заврши војната „со притисок врз Русија“.

„Наместо тоа, притисокот е врз Украина. Сè уште не сме виделе силен притисок врз Русија. Разбирам дека на почетокот сите мора да го спасат образот, но Русија можеше да покаже малку добра волја, на пример, со враќање на илјадници депортирани деца, ослободување на воени заробеници или нешто друго. И наместо тоа – ништо“, рече Калас, пренесува Танјуг.

Шведска и Финска ја продлабочуваат соработката во одбраната. Имено, во случај на војна, земјите треба да си помагаат едни на други во масовната евакуација на цивилите, пишува шведскиот „Афтонбладет“.

„Оваа мисија значително ќе ги зголеми капацитетите“, рече Карл-Оскар Болин, министер за цивилна заштита на Шведска.

Владата го задолжи Министерството за цивилна заштита на Финска да изготви план за голема прекугранична евакуација во случај на војна или криза. Мисијата е дел од обврските на Шведска во рамките на членството во НАТО.

Според „Афтонбладет“, ќе се разгледа снабдувањето со материјали во рамките на службите за итни случаи и цивилната заштита.

„Заштитата на цивилното население за време на состојба на зголемена готовност и во екстремни воени околности е важна задача на цивилната заштита. Доколку се случи најлошото, Шведска и Финска треба да ги имаат сите средства на располагање за да ги одбранат своите земји и да го заштитат цивилното население. Оваа мисија значително ќе ги зголеми нашите капацитети во овој поглед“, рече Болин.

Претседателката на Европската комисија, Урсула фон дер Лајен, изјави дека политиките на американскиот претседател Доналд Трамп носат „историски промени“ што ја принудуваат Европската Унија да „игра многу активна улога“ во обликувањето на новиот светски поредок, пренесува Анадолија.

„Западот каков што го знаевме повеќе не постои“, изјави Фон дер Лајен во интервју за германскиот весник „Ди Цајт“. Иако, како што наведува таа, отсекогаш била „убеден атлантист“ и „голем пријател на САД“, сегашната криза меѓу американската администрација и Европа, во комбинација со пошироките геополитички предизвици, бара решителни чекори од Европската Унија.

„Она што претходно го сметавме за светски поредок, сега се претвора во глобален неред, предизвикан, меѓу другото, од борбата за превласт меѓу Кина и САД, но секако и од империјалните амбиции на Путин“, рече таа.

„Затоа ни е потребна нова, поинаква Европска Унија, подготвена да зачекори на глобалната сцена и активно да учествува во обликувањето на новиот светски поредок што доаѓа“, рече таа.

Тврди дека Европската Унија, и покрај агресивните трговски политики на американскиот претседател Трамп, ја задржала својата сила и станала попривлечна за другите земји поради својата предвидливост и сигурност.

„Позитивниот ефект од сето ова е што моментално водам безброј разговори со шефови на држави и влади ширум светот кои сакаат да соработуваат со нас за да создадат нов поредок“, истакна таа, наведувајќи ги како примери Канада, Индија, Малезија, Индонезија, Мексико и јужноамериканските земји.

Таа нагласи дека, иако трговијата со САД сочинува 13 проценти од светската трговија, што е значаен удел, преостанатите 87 проценти се одвиваат со други земји.

„Сите сакаат поголема трговија со Европа, а тоа не е само прашање на економски односи. Станува збор и за воспоставување заеднички правила, како и за предвидливост. Европа е позната по својата предвидливост и сигурност, што сега повторно почнува да се смета за голема вредност“, додаде Фон дер Лајен.