Црна хроника
Кривична пријава за две лица од Прилеп, ја злоупотребиле службената положба
Денеска Единицата за финансиски криминал во секторот за криминалистички истраги при одделот за сузбивање на организиран и сериозен криминал поднесе кривична пријава до Основното јавно обвинителство за гонење на организиран криминал и корупција за П.Р.(45) и И.Ј.(66), двајцата од Прилеп. Истите се сомничат дека сториле кривично дело злоупотреба на службената положба и овластување казниво по Кривичниот законик, информира полицијата.
Првопријавениот П.Р. кривичното дело го сторил како службено лице во ЈЗУ Општа болница „Борка Талески“ во период од 02.10.2015 до 04.08.2017 година, злоупотребувајќи ја својата службена положба и постапувајќи спротивно на Законот за јавни набавки, при што во име на јавната установа од економски оператор, без да спроведе постапка за јавна набавка, набавил мазут во вкупна количина од 190.425 кг. со вкупен износ во вредност од 5.483.198.00 денари.
Второпријавениот И.Ј., во својство на службено лице во ЈЗУ Општа болница „Борка Талески“ во периодот од 07.08.2017 до 14.11.2017, злоупотребувајќи ја својата службена положба постапил спротивно на одредбите од Законот за јавни набавки и во текот на ноември 2017 година набавил мазут од 6.020 кг. повеќе и исплатил износ во вредност од 257.428.00 денари повеќе од предвидената количина и вредност во Договорот на економски оператор, иако согласно своите должности и овластувања по исполнување на предвидената количина и вредност во договорот требало да донесе нова Одлука за спроведување постапка за јавна набавка.
Со вака преземените дејствија, прво и второпријавениoт во корист на правно лице од Прилеп му овозможиле да се стекне со противправна имотна корист во вредност од 5.740.626 денари, соопшти полицијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.