Претседателот на Србија, Александар Вучиќ, изјави дека со претседателот на Франција, Емануел Макрон, во Париз разговарал за сите стратешки прашања за соработка меѓу двете земји и најави дека наскоро ќе биде потпишан комерцијален договор со француската компанија „Алстом“ за изградба на првата линија на белградското метро.

Претседателите на двете земји се сретнаа во Елисејската палата. Припадници на француската гарда присуствуваа на свечениот прием пред палатата, а Макрон приреди и работна вечера за Вучиќ.

Во своето обраќање до медиумите, Вучиќ нагласи дека ова е исклучително важна и суштинска средба со Макрон и дека разговарале за сите важни геополитички, регионални и билатерални прашања, како и за европскиот пат на Србија.

View this post on Instagram

A post shared by Александар Вучић (@avucic)

„До 15 декември конечно ќе потпишеме комерцијален договор за изградба на првата линија на метрото со француската компанија „Алстом“, значи следниот месец. Ја завршуваме таа работа или влегуваме во последната фаза, така што за две и пол години ќе ја имаме првата линија на метрото – две и пол, три, не е важно – но Белград конечно добива метро“, рече Вучиќ.

Вучиќ изјави дека е многу задоволен што имал можност да разговара три часа со претседателот на Франција, кого го смета за еден од клучните светски лидери. Тој изјави дека разговарале за стратешки важни прашања и планови за следниот период.

„Ќе ми треба малку време детално да анализирам сè и да ги разгледам забелешките. Секако, една од главните теми беше европскиот пат на Србија. Убеден сум дека во следната година можеме да постигнеме значителен напредок. Многу зависи од нас, но очекувам и поволен став од ЕУ што би ѝ овозможил на Србија да напредува. Исто така, се осврнавме на сите билатерални прашања“, рече Вучиќ.

Тој нагласи дека трговијата меѓу Србија и Франција за прв пат оваа година ќе надмине две милијарди евра.

„Разговаравме за различни области, заеднички инвестиции, француски инвестиции во Србија, како и соработка во областа на вештачката интелигенција“, додаде тој.

Вучиќ изјави дека го информирал Макрон за моменталната состојба во врска со НИС и изјави дека српската делегација ќе има средби со Американците по тој повод во петок.

„Имаме состанок со Американците, се надевам дека тогаш ќе се знае нешто повеќе и дека ќе можеме да го решиме тоа“, рече Вучиќ.

фото: принтскрин

Авионот „Ер Трактор АТ-802“ се урна во близина на Сењ, додека беше на повратен лет помеѓу Риека и Загреб, соопшти Дирекцијата за цивилна заштита.

45-годишниот пилот, Хасан Бахар, почина. Тој е истиот пилот кој го преживеа падот на противпожарниот авион во округот Јатаган во Мугла, северозападна Турција, на 29 август оваа година.

Пријавата за исчезнување на авионот од радарот од Хрватската контрола на воздушната пловидба била регистрирана во 16:53 часот, а во 17:11 часот била примена пријава за падот и пожарот.

Спасувачите многу брзо пристигнале на местото на падот. Пожарот бил локализиран околу 18:00 часот, а пожарникарите го забележале јагленисаното тело на пилотот.

Објавен идентитетот на загинатиот пилот
Турските медиуми објавија дека 45-годишниот пилот Хасан Бахар загинал во падот на авионот „Ер Трактор АТ-802“ во близина на Сењ.

Бахар го преживеа падот на противпожарниот авион во округот Јатаган во Мугла, северозападна Турција, на 29 август. Тој се здобил со повреди и бил однесен во болница, каде што го посетил гувернерот на Мугла, Идрис Акбијик.

фото: принтскрин

Во центарот на Љубљана, се случи напад во кој возач на градски автобус е тешко повреден со остар предмет. Напаѓачот избегал од местото на настанот пеш, а полицијата интензивно го бара, пишува 24ur.com.

Нападнатиот возач е итно пренесен во Клиничкиот центар во Љубљана. Според неофицијални информации, како што пишуваат локални медиуми, тој се здобил со тешки повреди, наводно во главата, но неговиот живот не е во опасност.

Љубљанската полиција започна обемна потрага по сторителот. Како што потврди Полициската управа во Љубљана, сите расположиви полицајци и криминалистички истражители се на местото на настанот, а над поширокото градско подрачје лета и хеликоптер.

Полицијата објави и опис на осомничениот. Станува збор за маж на возраст меѓу 35 и 50 години, висок од 180 до 190 сантиметри, со светла коса и светла брада. Во моментот на нападот, носел црвена јакна, но полицијата предупредува дека постои можност во меѓувреме да се пресоблекол.

Бидејќи станува збор за опасна личност, полицијата издаде важно предупредување до граѓаните да не ѝ му приближуваат доколку го видат, туку веднаш да ја повикаат полицијата.

Фото: принтскрин