Европа
Путин: Русија не може и нема да се развива во изолација од светот
Рускиот претседател Владимир Путин изјави дека неговата земја не може да се развива изолирано од остатокот од светот и мора да се фокусира на развивање сопствена технологија и поддршка на брзорастечките компании.
„Очигледно е дека не можеме да се развиваме изолирано од остатокот од светот и нема да се развиваме. Во денешниот свет невозможно e да се опкружи сѐ и да се подигне огромна ограда, тоа, едноставно, е невозможно“, рече Путин на седницата на Советот за стратешки развој и национални проекти, пренесе ТАСС.
Тој посочи дека антируските санкции претставуваат огромен предизвик за земјата, но дека Русија нема да се откаже, туку уште поинтензивно ќе се развива користејќи го постојниот потенцијал.
„Јасно е дека ова е голем предизвик за нашата земја, но ние не само што немаме намера да се откажеме или, како што предвидуваат некои наши добронамерници, да се вратиме децении назад. Се разбира дека не, напротив, сфаќајќи ги огромните тешкотии што стојат пред нас, интензивно и компетентно ќе бараме нови решенија, ефикасно ќе ги користиме постојните суверени технолошки резерви и развојот на домашните иновативни компании“, изјави Путин, пренесе „Интерфакс“.
Рускиот претседател призна дека сето тоа е исклучително тешка задача и додаде дека руските власти се свесни за тоа.
Тој рече дека се потребни мерки за поддршка на развојните институции и истакна дека е потребно да се разбере како тоа ќе се направи во услови на санкции.
Повтори дека намалувањето на сиромаштијата во Русија останува една од главните цели на националните проекти.
„Една од нашите главни национални цели, за која постојано зборуваме, е подобрување на економската состојба на нашите граѓани, зголемување на нивните приходи, особено за оние граѓани што живеат, благо кажано, скромно, односно главната цел е намалување на сиромаштијата“, изјави Путин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц ја откажа изборната кампања и ги посети поплавените региони во Германија
Германскиот канцелар Олаф Шолц денеска ги посети поплавените региони во западната германска сојузна покраина Сарланд, каде обилните дождови предизвикаа поплави и лизгање на земјиштето, а неколку згради беа евакуирани.
Шолц ја откажа својата изборна кампања во Сар, на границата со Франција, и наместо тоа, го обиколи делумно поплавениот пат во селото Клајнблитерсдорф заедно со регионалниот гувернер Анке Релингер.
Тој ја потврди солидарноста на сојузната влада со Сарланд.
„За жал, не е првпат да треба да се справиме со голема природна катастрофа, па ќе разгледаме што треба да се направи овде и што е неопходно“, им рече Шолц на новинарите.
Службите за итни случаи одговорија на илјадници повици за помош во главниот град на покраината, Сарбрикен.
Европа
Напаѓачот на Фицо доби мерка притвор за да не побегне и да не го повтори делото
Специјалниот кривичен суд во словачкиот град Пезинок, со силно полициско обезбедување денеска му одреди притвор на 71-годишниот Словак Јурај Цинтула, кој на 15 мај годинава во градот Хандлова со пет истрели го застрела премиерот Роберт Фицо и тешко го рани во стомакот.
Притворот за осомничениот е побаран поради опасност да не избега или да го повтори делото.
Осомничениот за нападот врз словенечкиот премиер Јурај Цинтула денеска призна вина.
Адвокатите предупредија дека признавањето на вината е спорно, бидејќи Цинтула веднаш по атентатот и апсењето бил сослушан во шок, без присуство на адвокат.
Европа
Премиерот Фицо уште е во животна опасност, напаѓачот призна вина
Осомничениот за нападот врз словенечкиот премиер Јурај Цинтула денеска пред Специјализираниот кривичен суд во градот Пежинок призна вина. Состојбата на премиерот Фицо и понатаму е сериозна.
Обвинителството вчера побара притвор за 71-годишниот Цинтула поради евентуално бегство или повторување на кривичното дело. Напаѓачот беше спроведен под силно полициско обезбедување, а ниту на новинарите им беше дозволен влез во Судот.
Премиерот на Словачка, Роберт Фицо на 15 мај беше застрелан во градот Хандалова додека се поздравуваше со насобраниот народ. Цинтула веднаш по нападот е приведен.
Тој се соочува со обвинение за обид за убиство од одмазда, за што е предвидена казна од 25 години до доживотен затвор.
Словачките политичари изјавија дека нападот врз Фицо не е политички мотивиран.