Европа
Реакции од светските лидери по историскиот договор помеѓу Русија и Украина за извоз на жито
Генералниот секретар на ОН, Антонио Гутереш, денеска изрази олеснување по потпишувањето на договорот за ставање крај на блокадата на украинскиот извоз на жито нарекувајќи го светилник на надеж за светот што се соочува со криза со храната, посредникот Турција го нарече историски, а Брисел, Г7 и Вашингтон повикаa на брза имплементација и најавија дека внимателно ќе го следат почитувањето на преземените обврски.
Договорот „го отвора патот за големи количини комерцијален извоз на храна од трите клучни украински пристаништа во Црното Море – Одеса, Черноморска и Јужни“, рече Гутереш во Истанбул.
„И да нема сомнеж – ова е договор за светот“, нагласи тој.
Испраќањето резерви жито и храна на светските пазари ќе помогне да се „премости глобалниот јаз во снабдувањето со храна“ и да се стабилизираат глобалните цени на храната, според генералниот секретар на ОН. „Тоа ќе им донесе олеснување на земјите во развој на работ на банкрот и најранливите луѓе на работ на глад“, рече Гутереш.
Ердоган: Блокираното жито набргу ќе биде подготвено за извоз
Блокираното жито набргу ќе биде подготвено за извоз, изјави турскиот претседател Реџеп Таип Ердоган.
„Со почетокот на бродскиот сообраќај во наредните денови, ќе отвориме нов коридор од Црното Море кон другите земји во светот“, рече тој нарекувајќи го историски ден.
Шојгу: Русија нема да ја искористи ситуацијата
Рускиот министер за одбрана, Сергеј Шојгу, потписникот на договорот во име на Москва изјави дека Русија „ги презема своите обврски“ од договорот и нема да ја искористи ситуацијата.
„Нема да го искористиме тоа што пристаништата ќе бидат исчистени (од мини) и отворени. Ние ја презедовме оваа обврска“, посочи тој.
Мишел: Овој договор може да биде од корист за милиони
Претседателот на Европскиот совет, Шарл Мишел, го поздрави договорот.
„Овој договор може да биде од корист за милиони во светот“, напиша тој на „Твитер“.
„Строгото спроведување на договорот сега е од најголема важност за тоа да успее“, додаде тој.
ЕУ: Чекор во вистинската насока
Шефот на европската дипломатија, Жозеп Борел, го поздрави „истанбулскиот договор како чекор во вистинската насока“ кон деблокирање на извозот на украинското жито велејќи дека тоа е „клучна фаза во напорите да се надмине глобалната несигурност во храната предизвикана од руската агресија врз Украина“.
„Руската инвазија на Украина остави милиони луѓе во опасност од глад“, рече тој.
Што рекоа САД и Г7?
Г7 внимателно ќе го следи спроведувањето на договорот за Украина да не се изложи на „дополнителен ризик од напад од Русија“, изјави во петокот канадскиот премиер, Џастин Трудо.
„Г7 тесно соработува со партнери како Турција и други за да се осигураме дека можеме да го извадиме тоа жито од Украина и на места во светот каде што е потребно, без да ги загрозиме суверенитетот и заштитата на Украина“, рече канадскиот премиер.
САД ќе работат на тоа Русија да го почитува договорот, изјави американската амбасадорка во Обединетите нации, Линда Томас-Гринфилд. САД исто така бараат Кина да престане да собира жито и да донира повеќе за да ги задоволи глобалните хуманитарни потреби, изјави за новинарите Џејмс О’Брајан, шеф на канцеларијата за координација на санкции на Стејт департментот.
Соединетите Американски Држави исто така сакаат Кина да престане да собира жито и да понуди повеќе за да ги задоволи потребите за глобална хуманитарна помош, изјави за новинарите Џејмс О’Брајан, шеф на Канцеларијата за координација на санкции на американскиот Стејт департмент.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украина: Соборивме руски борбен авион
Украинската 110-та посебна механизирана бригада собори уште еден руски борбен авион Су-25, соопшти единицата.
47-та механизирана бригада претходно во текот на денот извести дека соборила руски јуришен хеликоптер Ка-52 Алигатор, пишува Киев Индепенден. 110-та посебна механизирана бригада собори три руски авиони во последните две недели. Бригадата погоди уште два Су-25 на 4 и 11 мај.
Единицата не прецизираше каде е соборен авионот, но познато е дека бригадата оперира кон Авдиивка во регионот на Доњецк.
Су-25 се користи за обезбедување блиска воздушна поддршка на руските трупи на теренот, помагајќи им да извршат интензивни напади на повеќе делови од источниот фронт, кој го покрива најголемиот дел од регионот на Доњецк.
Европа
Три недели од исчезнувањето на аутистично момче во Германија: дали Аријан бил жртва на несреќа при лов
Поминаа три недели откако шестгодишното момче Аријан Арнолд исчезна во германскиот град Бремерворде. „За нас е необјасниво што сè уште никаде не го најдовме момчето“, изјави портпаролот на полицијата Хајнер ван дер Верп.
„Ништо не можеме да исклучиме. Никогаш не сме ја отфрлиле можноста тој да е киднапиран“, додаде Ван дер Верп во интервју за магазинот „Шпигел“. Според информации на Билд, полицијата ја истражува можноста дека се работи за скриена несреќа при лов.
Билд пишува дека полицијата истражува дојава дека момчето може да биде повредено и моментално се наоѓа во непозната куќа. Полицајците имаат намера да разговараат со локалните жители за да добијат нови информации и да видат дали забележале нешто.
„Тоа ќе биде еден вид чистење од врата до врата“, објасни Ван дер Верп. Досега, официјалните лица главно претпоставуваа дека станува збор за несреќа, стравувајќи дека детето со аутизам можело да падне во блиската река Осте.
Беа ангажирани нуркачи и чамци, но тоа не даде резултат. На брегот е откриен детски отпечаток, што е интересно бидејќи Аријан не носел чевли во моментот на неговото исчезнување. Предвидено е и ново пребарување на реката. Изминатиот викенд беше топло време, кое многумина го искористија за да се прошетаат покрај реката, но никој не забележа ништо корисно.
Аријан исчезна од куќата на неговите родители на 22 април. Полицијата има снимка од блиската надзорна камера. Според информациите на Билд, на снимката се гледа како Аријан брзо се движи по улицата околу 19:15 часот. Додаваат дека Аријан во тој момент држел предмет кој личи на играчка меч или стап и дека изгледал безгрижно.
Европа
Шолц со колегите од нордиските земји: „Ќе ја поддржуваме Украина се додека е потребно“
Германскиот канцелар Олаф Шолц и неговите колеги од нордиските земји повикаа денеска на состанок во Шведска за итно зголемување на помошта за Украина, која се соочува со нови руски напади во близина на Харков.
„Ќе ја поддржуваме Украина се додека е потребно“, рече канцеларот на прес-конференција во Стокхолм.
Германија, која во април објави дека испраќа дополнителен систем за воздушна одбрана „Патриот“ во Украина, ги повика своите европски сојузници да го следат примерот.
„Берлин се надева дека ќе следат и други европски земји, бидејќи на крајот ни треба многу муниција и артилериски тенкови и системи за противвоздушна одбрана“, нагласи Шолц.
„Мораме да направиме повеќе. Многу е важно дискусијата да не запре тука, туку да се носат реални одлуки низ цела Европа“, додаде тој.
Триесетина села во североисточна Украина денеска беа под оган од руската армија во областа Харков, каде за неколку дена окупираа десетици квадратни километри.
Украина упорно бара од западните сојузници да испратат системи за противвоздушна одбрана, особено Патриоти, кои се особено ефикасни во пресретнувањето на балистички ракети. Ги имаат неколку европски земји.
„Главната причина за загубите на Украина денес е недостатокот на противвоздушна одбрана, а ние имаме системи. Ако треба да формулираме само една желба, тоа би била испорака на системи за противвоздушна одбрана што е можно побрзо“, изјави данската премиерка Мете Фредериксен.
„Сите ние мора да ја почувствуваме итноста на ситуацијата“, додаде таа.
Нордиските земји и Германија се меѓу главните поддржувачи на Украина од почетокот на руската инвазија во февруари 2022 година, а Берлин е вториот најголем донатор, според институтот Кил. Олаф Шолц се сретна со колеги од Данска, Норвешка, Финска и Шведска.
„Тие разговараа за прашањата на безбедносната политика како што се хибридните закани, цивилната подготвеност и новите технологии“, објави шведската влада.