Македонија
Лекарската комора: Стручниот надзор со побавна динамика во пандемија, лекарите се повеќе ангажирани во лекувањето
За да се изврши вонреден надзор, потребно е подносителот на барањето до Комората да достави писмена пријава и комплетна документација за случајот, која често се доставува некомплетна или со задоцнување, што може да биде една од причините за доцнење на надзорот“, наведуваат од Лекарската комора.
Од почнувањето на пандемијата на Ковид-19 до Лекарската комора поднесени се поголем број барања за вонреден стручен надзор. На овие барања, како што велат, не може да се одговори со очекуваната динамика бидејќи во комисиите што треба да го направат надзорот се ангажираат лекари вработени во здравствените установи, кои беа и се ангажирани со поголем интензитет на работните места поради зголемениот број пациенти.
„За секоја пријава се формира посебна комисија, која брои три члена, а изборот на специјалноста на лекарите, кои се нејзини членови, се прави врз основа на тоа за каков случај станува збор. Во комисиите поврзани со случаите со Ковид-19 требаше да се вклучат инфектолози, пулмолози, анестезиолози, кои се дефицитарни специјалности и кога станува збор за лекување на пациентите, за лекарите тоа е приоритет во однос на ангажманот во стручниот надзор. Исто така, треба да се разграничи и дека стручниот надзор не е судско вештачење, односно тој не прави реконструкција на настаните, туку ја констатира состојбата врз основа на расположлива документација и земени изјави од доктори и други здравствени работници, кои активно биле вклучени во лекувањето и третманот на пациентот и дава стручно мислење.
Во однос на извршувањето на стручниот надзор во услови на пандемија, доставена е писмена информација до Министерството за здравство, со кое сме во комуникација, со цел изнаоѓање решение, кое ќе ја направи работата на комисиите побрза и поефикасна. Лекарската комора е одговорен партнер на Министерството за здравство во креирање подобри решенија за надминување на проблемите, со цел создавање подобри услови за лекување на пациентите и работата на лекарите. Во таа насока, активно работиме на подобрување на постојниот механизам и правно доуредување на процедурата за формирање на комисиите, а со цел постапката да се одвива поефикасно. Лекарската комора има целосен капацитет да го организира преостанатиот дел од процесот“, се додава во соопштението.
Во согласност со Законот за здравствената заштита, Лекарската комора исто така има овластување за издавање, обновување, продолжување и одземање лиценца за работа на докторите по медицина. Кога е во прашање стручноста на лекарот, законот предвидува привремено и трајно одземање на лиценцата, кое во двата случаја се прави ако постои соодветна судска пресуда со која се докажува дека докторот сторил кривично дело поврзано со здравствената дејност или сторил стручен пропуст или грешка при работата, со што предизвикал трајно нарушување на здравјето или смрт на болниот.
„Одземањето на лиценца за работа е сериозен чин поради што и законот предвидува тоа да се прави само во случај на постоење судска пресуда, со која се докажува дека лекарот сторил кривично дело. Одземањето лиценца не може да се прави по лично убедување на поединци, без да се докажат поставените сомневање, бидејќи тоа би било сериозна атака на професијата и можност за злоупотреби. Лекарската комора во овој дел постапува максимално стручно и одговорно и ги процесира сите предмети за кои е добиена соодветна судска пресуда.
Истакнуваме и дека системските проблеми, кои постојат во здравствениот систем, од каде што најчесто произлегуваат причините за незадоволството на пациентите и пропустите во лекувањето, нема да дозволиме по правило да се препишуваат на стручноста на лекари и на раководството на Комората бидејќи тоа е тенденциозно, неоправдано и што е најважно – не носи решение за надминување на состојбите и спречување на можностите проблемите да се повторуваат. Тие предизвици треба да се решаваат со транспарентен и отворен пристап од страна на креаторите на здравствените политики, со вклученост на сите засегнати страни, во што лекарите како практичари во целиот процес може да дадат голем придонес бидејќи сите имаме заедничка цел – создавање подобар здравствен систем како за пациентите така и за здравствените работници“, велат од Лекарската комора.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Демири се налути: Ќе ја оставам болницата Лешок, пратеничката која излезе на прес нека реши, да видиме како ќе земат плата
Министерот за здравство Илир Демири се налути на вработените од Специјализираната болница за белодробни заболувања во Лешок кои преку прес-конференција му кажаа дека се против неговата идеја да бидат споени со Клиничката болница во Теотово. Иако се уште е министер, рече дека нема повеќе да работи на решавање на проблемот со оваа болница. И денес повтори дека побарал болницата во Лешок да се спои со тетовската болница за вработените да можат да земаат плата и болницата да ја задржи дејноста. Исплатата на платите и дејноста на болницата се доведени во прашање откога се пензионирал единствениот вработен со кого тоа било возможно.
„Тој вработен од месец октомври е во пензија. Тогаш, како менаџер на тетовската болница, упатив барање до Министерството за здравство, да се припои болницата Лешок со тетовската клиничка болница со цел да може да има континуитет во работењето, да има носител на дејност. Таму се вработени 20 луѓе кои се со средно медицинско образование и не може да бидат носители на дејност. Се случи нешто многу необично кога дел од вработените во таа специјална болница, потпомогнати од пратеникот на ВМРО излегоа со прес и кажаа некои небулози според кои наводно јас сум имал тенденции за вработување на друга структура на вработени што не е точно. Структурата на вработените во болницата Лешок е 16 Македонци, четворица Албанци, значи 20 вработени, нема врска со тие невистини кои ги изнесоа во јавноста. Сега ќе ја оставам болницата Лешок, нема да преземам никакви дејствија бидејќи вработените не сакаат. Нека го реши пратеничката која излезе со нив на прес и ќе видиме како ќе добијат плата и како истата болница ќе ја зачува дејноста“, рече министерот Демири.
Вработените бараат место спојување, во болницата да се вработат специјалисти и таа да продолжи да функционира самостојно.
Македонија
Сиљановска Давкова со украинската амбасадорка Дир, швајцарската амбасадорка Улман и евроамбасадорот Гир: реафирмирана поддршката за Украина
Претседателката Гордана Сиљановска Давкова денеска ги прими амбасадорката на Украина Лариса Дир, амбасадорката на Швајцарската Конфедерација, Вероник Улман и шефот на делегацијата на Европската Унија, амбасадорот Дејвид Гир.
На средбата Сиљановска Давкова изрази благодарност за поканата упатена од претседателката на Швајцарската Конфедерација, Виола Амхерд, за нејзино учество на Самитот за мир во Украина, што ќе се одржи на 15 и 16 јуни во Швајцарија.
Претседателката оцени дека претстојниот самит претставува добра можност за обезбедување платформа за дијалог за сеопфатен, праведен и траен мир во Украина.
Сиљановска Давкова ја реафирмираше македонската поддршка за Украина по неиспровоцираната и неоправдана воена агресија на Руската Федерација и повика на почитување на територијалниот интегритет, суверенитет и независност во Украина во меѓународно признатите граници и територијални води.
Македонија
Хируршките сали на Клинички остануваат затворени: Системот за воздух мириса и без хаварија, примероци од гасот испратени во Германија
Лабораторија во Германија ќе утврдува зошто без хаварија во системот се јавува миризба во дистрибутивната мрежа за кислород и компримиран воздух поради што се затворени хируршките сали во Клиничкиот центар „Мајка Тереза“ во Скопје. Се оперираат само итни случаи, за кои се не се користи мрежата за воздух туку надворешен компресор, а останатите пациенти се препраќаат во „Св. Наум Охридски“ и во ГОБ „8 Септември“.
По молкот од минатата недела, министерот за здравство Илир Демири денес кажа дека Клинички има проблем со мрежата за кислород и компримиран воздух веќе еден месец. Имало хаварија во компресорската станица пред еден месец.
„Се расипа еден од компресорите и доведе до оштетување, влезе масло во цевките по што тој компресор е исфрлен од функција. Беа три компресори. Почна клиниката да функционира со два компресори. Ги издувавме комплетно цевките, поминаа технички преглед од две независни институции кои не се поврзани со Клинички центар. За сметка на квалитетно испорачување на компримиран воздух, ја сопревме и функцијата хипербарната комора, која е дел на пластична хирургија. Побарав итно од менаџерите да поднесат барање и да може да се сервисираат истите компресори. Повторно минатата сабота, веќе осум – девет дена се случи истиот проблем. Без да има никаква хаварија во системот едноставно се појавува некоја лоша миризба во дистрибутивната мрежа на кислород и на компримиран воздух поради што веднаш реагиравме. Денеска се испратени мостри од гасот во Република Германија да се испитаат“, рече министерот Демири кој нагласи дека хируршките сали се градени пред 30 години, кога била поставена инсталацијата за снабдување со кислород и компримиран воздух.
Хируршките сали ќе останат затворени се додека не добијат документ од Германија кој ќе им потврди дека е безбедно да ја користат мрежата за снабдување со воздух. Морале да испратат примероци во Германија оти немаме домашна акредитирана лабораторија која може да издаде валиден документ за исправноста на системот. Анализата во две домашни лаборатории, кои компании ги имаат за свои потреби, покажала дека нема недостаток во квалитетот на гасовите, освен што има зголемена влага. Поради тоа во два наврати препорачале да се менуваат филтрите во компресорските станици.
За да се утврди одговорноста за хаваријата во системот, Демири сета документација што ја има ја доставил до Обвинителството оти сопственик на компресорката станица не е здравствената установа туку службата за општи работи. Очекува Обвинителството да ја расплетка замрсената сопственичка структура и да утврди кој треба да одговара за хаваријата со хируршките сали.