На Меѓународиот ден на белиот стап – кој е посветен на лицата со оштетен вид, Движењето ЗНАМ го презентираше делот од изборната програма за Куманово кој се однесува на инклузивноста и еднаквоста на сите, како и на обезбедување на услови за нормално живеење на сите лица со посебни потреби.

„Белиот стап не е само симбол на слепилото или оштетениот вид. Тој е симбол на слободата, самостојноста и борбата за достоинствен живот. Секој чекор што го правиме со белиот стап е чекор кон еднаквост, кон прифаќање и кон почит. Како човек со оштетен вид, секојдневно се соочувам со предизвици кои за некого се едноставни – премин на улица, читање документ, движење низ градот. Но, секој ден повторно избирам да не се откажам, затоа што животот ми покажа дека границите не постојат кога имаш волја, поддршка и верба“, изјави кандидатот за советник од редовите на Движењето ЗНАМ – За наша Македонија, Христијан Ѓорѓевиќ.

Тој нагласи дека е горд што е дел од едно општество кое се менува на подобро, дел од Куманово – град кој секој ден прави значајни чекори за да биде пристапен, инклузивен и праведен за сите. Град кој ја слуша секоја приказна и секој глас.

„Токму затоа сум дел од советничката листа на Движењето ЗНАМ – За наша Македонија. Во нашата програма, активностите значајни за лицата со посебни потреби, како и инклузивноста во целост се посебен и многу значаен сегмент. Како советник ќе се борам Куманово да продолжи да се движи во вистинска насока и заедно да градиме поинклузивно и попристапно општество за сите“, нагласи Ѓорѓевиќ.

Кандидатот за советник ги нагласи и активностите што најпрво ќе се преземат во следниот мандат:

· Пристапни рампи

· Звучни семафори

· Тактилни патеки за лица со оштетен вид

· Пристапни веб страници и

· Пристапни општински објекти

Можеме, рече Ѓорѓевиќ, да создадеме средина каде децата со посебни потреби имаат ист старт како и сите други. Каде лицата со оштетен вид не се гледаат низ призмата на ограниченост, туку низ призмата на можностите, знаењето и талентот.

Белиот стап не е само алатка. Тој е продолжение на нашата верба, на нашата решителност и на нашата љубов кон животот. А, еднаквоста не е само збор, туку начин на живеење, велат од Движењето ЗНАМ.

Кандидатката за градоначалничка на Град Скопје, Каја Шукова, денеска истакна дека во рамки на својата програма предвидува зелен развој и обновување на јавните површини низ сите скопски општини.

„Локациите се веќе мапирани – дел ќе бидат нови зелени површини, а дел реконструкции на паркови што се во лоша состојба” -рече Шукова.

Таа посочи дека покрај парковите, ќе бидат засадени и 10.000 нови дрвја, меѓу кои и овошни садници, како дел од заложбата за поубав и поздрав град.

,,Покрај зимзелени и листопадни дрвја, ќе засадиме и овошни дрвја нешто што Скопје го имаше пред 20–30 години. Време е да ја вратиме таа традиција и да го направиме градот поубав, зелен и животен,“ рече Шукова.

Центарот за мајка и бебе во Клиника Жан Митрев одбележува една година успешна работа исполнета со радост, посветеност и стотици среќни моменти. Во текот на првата година од функционирањето, овој современ центар за породилна и неонатолошка грижа помогна да се родат 167 бебиња и создаде 167 нови семејства.

Во изминатите дванаесет месеци низ Центарот поминаа бројни емотивни приказни – од најмалото бебе родено со тежина од само 1270 грама, до најголемото бебе спонтано родено со 4630 грама. Секоја од нив е доказ дека знаењето, искуството и технологијата кога ќе се обединат, го создаваат најубавото нешто – нов живот.

„Создадовме породилен центар каде мајката и бебето се во фокусот – со безбедност, удобност и топлина што секое семејство ја заслужува. Нашата визија е секое породување да биде убаво искуство, ослободено од страв и неизвесност, а исполнето со доверба, професионализам и грижа. Во оваа една година докажавме дека и во Македонија може да се развива акушерство според највисоките светски стандарди – со врвна медицинска технологија, тим од искусни специјалисти и пристап кој ги спојува науката и хуманоста“, изјави медицинскиот директор д-р Емил Стоицовски.

Центарот за мајка и бебе е изграден на површина од над 800 метри квадратни и опремен со најсовремена медицинска технологија. Располага со две родилни сали, операциона сала, соби за будење, неонатолошка и гинеколошка ординација, како и комфорни апартмански соби кои овозможуваат приватност и удобност во постпородилниот период. Областите во кои делува Центарот ги опфаќаат сите три тримесечја од бременоста, спроведување на дијагностички испитувања, ХСГ лабораторија, генетски испитувања како амниоцинтеза, хорионбиопсија, ултразвучни и неинвазивни пренатални тестови.Тимот кој се состои од гинеколози акушери, неонатолози, анестезиолози, акушерки и медицински сестри, овозможува целосна грижа пред, за време и по породувањето, достапна 24 часа дневно.

Одделот за неонатална интензивна нега (NICU), кој работи во склоп на Центарот обезбедува третман и згрижување на предвремено родени и ризични новороденчиња. Еден од најзначајните моменти во изминатата година беше породувањето на тројка бебиња, родени во 31-та гестациска недела. Овој редок природен случај ја потврди високата стручност и подготвеност на медицинскиот тим, но и ја симболизира хуманоста и посветеноста кон секое новороденче.

Центарот нуди целосен спектар на услуги за мајката и бебето – следење на бременоста, дијагностички и генетски испитувања, неинвазивни пренатални тестови, постпартална нега и советување. Особено внимание се посветува на индивидуалниот пристап, при што гинекологот кој ја водел бременоста е присутен и при самото породување, овозможувајќи доверба и континуитет во најважниот момент.

Со само една година работа, Центарот за мајка и бебе се позиционира како водечки породилен и неонатолошки центар во земјата, кој секојдневно докажува дека успехот се мери во најубавата мерна единица – нов живот.

ПР