Македонија
Петровска: Како најнова членка на Алијансата од исклучителна важност е придонесот во доменот на стратегиските комуникации
„Само две години по формалното членство во НАТО, нам ни е доверена оваа одговорност да бидеме домаќини на најголемата Конференција за комуникатори во Алијансата и за нас како најнова членка на Алијансата е од исклучителна важност да дадеме свој придонес во доменот на стратегиските комуникации“, рече министерката за одбрана Славјанка Петровска по денешниот брифинг со претставниците на медиумите на кој информираше за претстојната НАТО – Конференција за комуникатори која ќе се реализира во Скопје следната недела.
Министерката посочи дека очекува отворена интелектуална, политичка и стратегиска дебата од која треба да произлезат идеи и практични решенија за голем број отворени прашања од областа на стратегиските комуникации, како алатка на лидерите и како поддршка во напорите на Алијансата за „одбрана и одвраќање“ на сите потенцијални безбедносни предизвици во НАТО и земјите – членки.
Директорот за комуникации во Сојузничката команда за трансформација, Џеј Џанзен истакна дека станува збор за конференција на која што има претставници од 30 земји членки, сојузници, кои што тука во Скопје, во Република Северна Македонија, како најмлада земја сојузник, ќе го демонстрираат единството на земјите членки на НАТО.
„Фактот дека овие 300 претставници на земјите членки и земји партнери се присутни тука во Скопје, за време на оваа конференција, ја покажува кохезијата на воената Алијанса во однос на начинот на кој ние учиме за себе и ја почитуваме нашата разноликост. Во исто време комуникациите се користат и против нас и заедно треба да дискутираме, соработуваме, учиме и споделуваме, зашто кога сме здружени можеме да ги надминеме овие предизвици, да ги обезличиме и да ги истакнеме работите кои што се важни за нас како Алијанса. Преку нашето присуство тука покажуваме дека заедно сме посилни“, рече Џанзен.
На Конференција ќе се разговара за информациските активности за време на руската инвазија на Украина, соработката со партнерите во оваа област, новиот Стратешки концепт на Алијансата и дигиталните комуникации.
На отворањето на Конференцијата освен министерката Петровска, ќе се обратат и премиерот Димитар Ковачевски, како и помошничката на генералниот секретар на НАТО за јавна дипломатија, Баиба Браже, а со видео обраќања ќе се обратат и командантите на двете НАТО Команди: генералот Кристофер Каволи, командант на Командата за операции и генералот Филип Лавињ, командантот на Командата за трансформација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Лефков: СДС како власт ги користеле институциите за испумпување на пари преку тендери
„СДС како власт ги користеле институциите за испумпување на пари преку тендери“, рече денеска на прес-конференција, Миле Лефков, пратеник и член на ИК на ВМРО-ДПМНЕ.
„Фирми блиски до СДС свртеа милиони евра народни пари од ЕСМ преку РЕК до здравство каде жареше и палеше Венко Филипче.
Дражавниот ревизор при ревизија на буџетот за 2021 година, која е направена во 2023 година кај дел од постапките за јавни набавки утврдил недоследности во начинот на планирање, спроведување и реализација, поради што за дел од истите започнати се постапки пред надлежни органи.
Судството и обвинителството со 2% доверба очигледно е споро и не гледа тоа што целата јавност го гледа.
Треба да истражи и утврди како Венко Филипче има 5 стана во Скопје кои претходно не ги пријавувал во анкетен лист, луксузен џип, хациенда на семејството на Водно. Тоа е се имот кој треба да биде проверен како е стекнат.
Стотици милиони се одлеани на сомнителни тендери, а сомнителност и недоследности утврдува и ДЗР“, кажа Лефков во партиското седиште.
Македонија
АХВ спроведе вонредни контроли во Кавадарци, недоследности се најдени кај три ресторани и една месарница – изречени се парични казни
Инспекциските служби на Агенција за храна и ветеринарство (АХВ) неделава спроведоа вонредни инспекциски контроли и кај оператори со храна во Кавадарци.
Недоследности се најдени кај три ресторани и една месарница на кои им се изречени парични казни за пласирање во промет на небезбедна храна и неспроведени санитарни прегледи за вработените лица.
Изречените глоби се движат од 600 до 3 илјади евра во денарска противвредност за правните лица, зависно од големината на субјектот и по 400 и 500 евра во денарска противвредност за одговорните лица во правните субјекти.
Уништени се 87 килограми небезбедна храна ( месо, замрзнати производи, замрзната риба).
Македонија
Мицкоски упати честитка по повод Меѓународниот ден на Бошњаците
Премиерот, Христијан Мицкоски, упати честитка по повод 28 Септември Меѓународниот ден на Бошњаците.
„Почитувани, дозволете ми во мое лично име и во името на Владата, да го честитам 28 Септември Меѓународниот ден на Бошњаците.
Тие се дел од нашето општество и заедничката традиција градена со години. Заедништвото низ децениите покажува дека взаемното почитување и изградбата на меѓусебна доверба се темелите врз кој може и треба да се гради напредокот. Заедно минуваме низ турбулентни времиња и предизвици, но и заедно можеме да победиме за да донесеме подобра иднина.Свесен сум за тешкиот живот, многуте наследени проблеми и за реалните потреби на луѓето и тие се заеднички за сите граѓани, но ве уверувам дека сплотени и со напорна работа, посветено можеме и ќе ја надминеме секоја пречка. Заедно да се избориме за иднина каква сите граѓани заслужуваат. Нека е честит Меѓународниот ден на Бошњаците!“, напиша тој на ФБ.