Европа
Зеленски: Русија се подготвува да мобилизира до милион луѓе
Украинскиот претседател Володомир Зеленски тврди дека руското раководство се подготвува да мобилизира до милион луѓе, пренесува „Интерфакс“.
„Однапред беа отпечатени 300.000 повици за мобилизација во Русија, но руското раководство се подготвува да мобилизира до милион луѓе“, рекол Зеленски во видеообраќање, пренесува „Интерфакс Украина“.
Тој посочил дека протести против мобилизацијата имало во градовите во Русија и оценил дека Русите се „соучесници во сите злосторства, убиства и мачења на Украинците бидејќи молчеле и молчат“.
Според него, сега е време да се направи избор.
„За мажите во Русија, ова е избор да умрат или да живеат, да бидат осакатени или да останат здрави. За жените во Русија, изборот е да ги изгубат своите сопрузи, синови, внуци засекогаш или да се обидат да ги заштитат од смрт, од војна, од еден маж“, рекол Зеленски.
Тој ги повикал Русите да протестираат, да бегаат или да се предадат, додавајќи дека тоа се нивните опции за преживување.
Портпаролот на Кремљ, Дмитриј Песков, вчера ги демантирал наводите на одредени медиуми дека планот на Москва е да мобилизира милион војници.
„Тоа е лага“, изјавил Песков за ТАСС.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Шолц ја откажа изборната кампања и ги посети поплавените региони во Германија
Германскиот канцелар Олаф Шолц денеска ги посети поплавените региони во западната германска сојузна покраина Сарланд, каде обилните дождови предизвикаа поплави и лизгање на земјиштето, а неколку згради беа евакуирани.
Шолц ја откажа својата изборна кампања во Сар, на границата со Франција, и наместо тоа, го обиколи делумно поплавениот пат во селото Клајнблитерсдорф заедно со регионалниот гувернер Анке Релингер.
Тој ја потврди солидарноста на сојузната влада со Сарланд.
„За жал, не е првпат да треба да се справиме со голема природна катастрофа, па ќе разгледаме што треба да се направи овде и што е неопходно“, им рече Шолц на новинарите.
Службите за итни случаи одговорија на илјадници повици за помош во главниот град на покраината, Сарбрикен.
Европа
Напаѓачот на Фицо доби мерка притвор за да не побегне и да не го повтори делото
Специјалниот кривичен суд во словачкиот град Пезинок, со силно полициско обезбедување денеска му одреди притвор на 71-годишниот Словак Јурај Цинтула, кој на 15 мај годинава во градот Хандлова со пет истрели го застрела премиерот Роберт Фицо и тешко го рани во стомакот.
Притворот за осомничениот е побаран поради опасност да не избега или да го повтори делото.
Осомничениот за нападот врз словенечкиот премиер Јурај Цинтула денеска призна вина.
Адвокатите предупредија дека признавањето на вината е спорно, бидејќи Цинтула веднаш по атентатот и апсењето бил сослушан во шок, без присуство на адвокат.
Европа
Премиерот Фицо уште е во животна опасност, напаѓачот призна вина
Осомничениот за нападот врз словенечкиот премиер Јурај Цинтула денеска пред Специјализираниот кривичен суд во градот Пежинок призна вина. Состојбата на премиерот Фицо и понатаму е сериозна.
Обвинителството вчера побара притвор за 71-годишниот Цинтула поради евентуално бегство или повторување на кривичното дело. Напаѓачот беше спроведен под силно полициско обезбедување, а ниту на новинарите им беше дозволен влез во Судот.
Премиерот на Словачка, Роберт Фицо на 15 мај беше застрелан во градот Хандалова додека се поздравуваше со насобраниот народ. Цинтула веднаш по нападот е приведен.
Тој се соочува со обвинение за обид за убиство од одмазда, за што е предвидена казна од 25 години до доживотен затвор.
Словачките политичари изјавија дека нападот врз Фицо не е политички мотивиран.