Доколку не се постигне договор со „Адора“ за топланите, решението ќе се бара во Законот за управување со кризите, при што Владата има право да ги стави на располагање сите ресурси на државата, и на јавните претпријатија и на приватните компании, за обезбедување на јавната услуга, изјави денеска советникот за енергетика, Виктор Андонов.

Прашан до каде се преговорите со „Адора“ за топланите „Исток“ и „Запад“, Андонов рече дека Владата нема да потпадне под притисоци или уцени за некои да ја искористат ситуацијата во која се наоѓаме додавајќи дека за да се случи продажба, треба некаква процедура, која не може да се направи во рок од неколку дена.

Тој истакна дека и досега електраните функционираа на закуп, така што интенцијата на Владата е тоа да се заврши до крајот на грејната сезона – ЕСМ да го добие закупот од „Адора“ за електраните како што било досега.

На новинарското прашање дали граѓаните може да очекуваат дека со почетокот на грејната сезона ќе имаат парно, Андонов изрази увереност дека на граѓаните ќе им биде испорачана топлинска енергија навреме и дека со оглед на тоа што БЕГ ги врати назад трите лиценци, до крајот на оваа недела ќе се презентира решението за неговиот наследник.

На медиумскиот интерес за договорите со соседна Република Србија за набавка на дополнителни количества гас, тој оцени дека до крајот на грејната сезона топланите ќе потрошат околу 230 милиони нормални кубни метри природен гас и дека можниот договор со нашиот северен сосед е со цел да се обезбеди поповолна цена на енергенти за индустријата, како и поповолни цени на топлинската енергија за граѓаните.

Соработникот за енергетика истакна дека во ваква глобална енергетска криза сите држави преку своите буџети прават напори да дадат целосна поддршка и на граѓаните и на индустријата и дека тоа го прават и преку обезбедување пониски цени на енергентите.

Тој информира дека доколку се финализира договорот со купениот гас од соседна Република Србија, ќе се произведува електрична енергија, од која дел потоа ќе се продава назад во Србија. Тој изрази оптимизам дека овој можен договор ќе профункционира и ќе се обезбеди потребно количество енергенти, а доколку не се обезбеди потребното количество гас, електраните имаат резервна опција да работат и на мазут.

На новинарското прашање како ќе им се помогне на најголемите потрошувачи на електрична енергија, кои се на отворен пазар, Андонов истакна дека решенијата беа презентирани на состанокот на министерот за економија со Стопанската комора за обезбедување прифатлива цена на електричната енергија и истакна дека граѓаните нема да останат без електрична енергија и ќе бидат заштитени заедно со малите потрошувачи. Како што посочи, предвидени се и дополнителни мерки за граѓаните и ранливите категории.

За најавите за почнување со работа на електрана што ќе произведува електрична енергија од мазут, Андонов информира дека сите овие заложби се прават со цел да бидеме што помалку зависни од надвор и да обезбедиме сопствени извори на енергија. Тој истакна дека ЕСМ е задолжено да ги направи сите анализи во овој правец и да презентира до Владата кои се опциите за почнување со работа на ваква електрана.