Македонија
Спасовски во Женева се сретна со високиот комесар за бегалци на ОН, Филипо Гранди

Министерот за внатрешни работи Оливер Спасовски, за време на 73. редовна сесија на Извршниот комитет на Високиот комесар за бегалци на Обединетите нации во Женева, кадешто ја предводи делегацијата од МВР, се сретна со високиот комесар за бегалци Филипо Гранди. На средбата беше даден детален осврт на реализираното во изминатиов период, имајќи го предвид партнерството со УНХЦР во обврските кои произлегуваат од Акцискиот план за миграциска политика на земјава, следење и усогласување со законодавството на ЕУ во областа на државјанството, подобрување на состојбите во областа на лица без државјанство, создавање услови за олеснет пристап до документи за државјаните кои живеат во странство.
Министерот Спасовски упати благодарност до Високиот комесаријат и до претставничката на УНХЦР во Скопје, Моника Сандри, за континуираната соработка во делот на државјанството, статусот на бегалците, миграцијата, како и поддршката од Канцеларијата на УНХЦР во Скопје, со цел зголемување на капацитетот на Секторот за азил преку обуки и материјално-техничка поддршка.
Во однос на Глобалниот пакт за бегалци, како еден од низата клучните меѓународни инструменти на ОН, чија договорна страна е и нашата земја, Спасовски нагласи дека државата континуирано дава силна поддршка, а во изминатиов период беа исполнети добар дел од заложбите, вклучително и усогласување на националното со европското законодавство, усвојување важни документи од областа на азилот, односно миграциите, директиви на ЕУ, кои се во висок степен вградени во националната позитивна легислатива.
На средбата беа поздравени заложбите на државата за зајакнување на управувањето со системот на азил, имајќи предвид дека во текот на пандемијата Северна Македонија беше меѓу првите што пристапија кон спроведување на интервјуа со баратели на право на азил преку онлајн платформа, со цел зачувување на нивното здравје, а за цело времетраење на вонредната состојба беше обезбеден непречен пристап до постапката за признавање на право на азил, за сите лица кои имаа потреба од меѓународна заштита.
За време на разговорите беа отворени и темите за тековната ситуација со мигрантите, предизвиците поттикнати од конфликтите кои резултираат со раселувања од огромни, па во врска со новите геополитички случувања, министерот Спасовски информираше државата, иако не е на главната евакуациска рута, ја изрази својата хуманост преку прифаќање на украинските бегалци и нивните семејства кои побараа засолниште во Северна Македонија, па од почетокот на кризата до денес се издадени 358 дозволи за привремен престој поради хуманитарни причини, додека досега нема лица украински државјани кои побарале азил на територија на РСМ.
Високиот комесар Филипо Гранди изрази задоволство за можноста да се реализира оваа заедничка средба и истакна дека од страна на УНХЦР се препознаени заложбите и резултатите што Република Северна Македонија ги постигнува во заштитата на правата на бегалците упатувајќи посебна благодарност до министерот Спасовски за прифаќање на украинските бегалци и нивните семејства кои побараа засолниште во Северна Македонија.
Гранди упати благодарност и за успешната финализација на твининг проектот „Усогласување на националните системи за гранично управување со барањата на ЕУ и Шенген“ во чии рамки е изготвена Националната стратегија за интегрирано гранично управување на Република Северна Македонија, согласно Европскиот концепт за Интегрирано гранично управување, со што е нотиран значителен исчекор кон зголемено управување со границите и управување со нерегуларната миграција, како заеднички интерес и на Северна Македонија и на Европската Унија, и се разбира на УНХЦР.
Двете страни особено позитивно ја оценија досегашната соработка на УНХЦР и Северна Македонија, па во таа насока се разговараше и за тековните програми на Канцеларијата на УНХЦР во земјата и во светот, а министерот Спасовски упати покана до Високиот комесар Гранди, во име на досегашното партнерство и плодната соработка во навремениот одговор на ситуацијата со бегалците, да биде гостин на Министерството за внатрешни работи на Северна Македонија, што од страна на Високиот комесар Гранди со задоволство беше прифатена.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Гори депонијата „Вардариште“, соопшти ЦУК

На територијата на државата евидентиран е еден пожар на отворен простор до 18:00 часот, соопшти ЦУК.
Според последните информации од центарот, гори депонијата „Вардариште“ во Општина Гази Баба.
Македонија
МВР со апел за фер и спортско навивање: било какви навреди ќе бидат најстрого санкционирани

Министерството за внатрешни работи апелира до сите граѓани и членови на навивачки групи да ги бодрат своите спортски миленици, но да навиваат спортски, исклучиво во спортски дух, без говор на омраза, без било какви навреди по лична, етничка, верска или било која друга припадност што не соодветствува на спортски натпревари и е спротивно на законот.
„Во врска со кошаркарскиот натпревар што се одржа на 02.08.2025 во Спортската сала во Куманово, во СВР Куманово веќе се повикани неколку осомничени лица со кои што е извршен службен разговор, и по извршени анализи во координација со ОЈО Куманово ќе бидат преземени конкретни законски мерки против инволвираните лица, вклучително и кривични постапки. Денеска, полициски службеници од СВР Куманово го лишија од слобода С.М. (30) од Куманово, кој се сомничи дека на полувреме од кошаркарскиот натпревар се обидел да внесе транспарент со навредлива содржина. По целосно расчистување на случајот против него ќе следи соодветен поднесок.
Во тој контекст, МВР уште еднаш нагласува дека во рамки на обезбедувањето на мирни и непречени спортски натпревари, полицијата ќе биде крајно ригорозна по однос на било какви нарушувања на јавниот ред и мир, односно било какви навредливи скандирања врз база на национална, етничка или верска припадност и тоа ќе биде најстрого санкционирано, без никаква толеранција. Само спортското фер навивање и бодрење може да ни донесе успеси, победи и спортски радости.
Македонија
Со ВМРО-ДПМНЕ исчезнува македонската култура, велат од СДСМ

Љутков и ВМРО-ДПМНЕ ја оставаат спомен-куќата на Петре М. Андреевски да скапува, тоа е нивниот патриотизам, велат од СДСМ.
Срамно е, болно и понижувачки за целата држава, додаваат од опозициската партија, кога синот на Петре М. Андреевски, еден од најголемите великани на македонската книжевност, мора да бара поддршка за да се спаси спомен-куќата на неговиот татко од влага, заборав и молк.
„Но тоа е резултатот кога министерот Љутков ја зголемува ставката за патувања и репрезентации на сметка на буџетските средства наменети за заштита на културното наследство.
Оваа спомен-куќа, оваа меморијална постановка во Слоештица, беше создадена токму во време на владеење на СДСМ – со јасна намера: трајно да се сочува споменот на творецот на „Пиреј“, творецот кој ја однесе Македонија до светските книжевни височини.
А денес? Денес тоа светилиште на македонската литература е оставено на забот на времето, игнорирано од министерот Љутков и Владата на ВМРО-ДПМНЕ, кои инаку постојано се повикуваат на „чување на македонскиот идентитет“.
Ова, според СДСМ, не е обична негрижа, туку културен вандализам под раководство на Љутков и ВМРО-ДПМНЕ.
„Ги красат бините со зборови за традиција, а ја пустошат суштината на нашата културна меморија. Ги споменуваат Карев и Делчев за дневно-политички поени, а го забораваат Петрета – кој ја воспеваше Македонија не со знамиња, туку со збор.
Оваа небрежност е културно предавство. Денес е Петре, утре ќе биде некој друг. А кога ќе ја снема културата- ќе ја снема и државата. Затоа СДСМ бара итна реакција, без разлика на кого е надлежноста, и спомен-куќата на Петре М. Андреевски да се стави под државна заштита и за истата да се обезбедат средства за одржување“.
Очигледно истакнуваат од СДСМ, ова е новата културна политика со која власта докажува дека не ја цени ниту државата ниту делото и ликот на нашите великани.
„Ако не знаете кој е Петре – прашајте ги учениците. Тие сè уште читаат „Пиреј“.
Ако не знаете што значи држава – прашајте нè нас. Зашто држава се гради со заштита и чување на културната посебност, а не со заборав.