Европа
Средниот слој во Германија во страв дека ќе пропадне
![](https://makfax.com.mk/wp-content/uploads/2022/10/9b7923c6-00d1-4047-9d31-bdd391d00376.jpg)
Зголемување на трошоците за енергија, инфлација што ги јаде приходите, високи каматни стапки на заемите, сето тоа во моментов оптоварува многумина во Германија. Оваа криза, доколку потрае, може да го разниша темелот на општеството – средната класа, пишува Дојче веле.
Според медиумот, ваквите луѓе ги има многу и добро живееле до сега: просветни работници, државни службеници, занаетчии. Социјалната група со среден приход е столб на германското општество. Постојат различни дефиниции за припадност кон средната класа, но може да се каже дека се работи за луѓе кои заработуваат од 80 до 150 проценти од просечната плата.
За самци тоа е меѓу 1.350 и 3.000 евра нето приход месечно, додека за семејствата тој приход би требало да биде помеѓу 2.800 и 5.000 евра. Во таа група спаѓаат вкупно 50 отсто од населението. Оваа група плаќа најголем дел од даноците и на тој начин придонесува за социјалната држава и благосостојба. Како по правило, овие луѓе имаат голема доверба во демократијата и придонесуваат за стабилноста.
Во Германија, според истражувањето на фондацијата Бертелсман, дури 73 отсто од граѓаните во земјата сметаат дека припаѓаат на средната класа.
„Во Германија има релативно широка средна класа, на која ѝ припаѓа значителен дел од населението или на која можете да и припаѓате доколку сте трудољубиви и вложите труд. Тоа беше центар за интеграција на општеството на кој човек сакаше да му припаѓа“, вели Патрик Сахве од Истражувачкиот центар за нееднаквост и социјална политика на Универзитетот во Бремен.
Според статистиката на Организацијата за економска соработка и развој, средната класа во Германија е нешто поголема од европскиот просек.
Но, некои земји како Данска и Словачка се далеку над тој просек. Во гореспоменатото истражување се вели дека „на младите им е се потешко да обезбедат место во средната класа“. Веројатноста да се постигне статус со просечен приход е десет проценти помала од 1990-тите.
„Ние сè уште имаме широка и стабилна средна класа“, вели Дороти Спанагел, директорка за редистрибутивна политика во Економскиот и социолошки институт на Фондацијата Ханс Беклер.
„Но, таа се придвижува кон долниот раб. Поранешниот впечаток дека со добро професионално образование човек има сигурен приход и можеби еден ден може да купи куќа, постепено исчезна“. Наместо верба во ветувањето за општествено воздигнување, постои страв. Кристоф Батервеге, кој ја проучува сиромаштијата, за германските медиуми изјави дека сиромаштијата повеќе не е проблем само на маргиналните групи.
Се појавува и во сосема нормални семејства. На пример, Истражувачкото друштво никогаш во својата историја не измерило полоша вредност кај Германците кога станува збор за очекуваниот приход во иднина.
Во Советувалиштето за долгови и несолвентност на службата на протестантската црква во Келн, овој страв од неможност да се справи со кризата е веќе реалност. „Вработените во комуналните претпријатија ни се јавуваат да прашаат за курсеви каде што можат да научат како да се однесуваат со луѓе кои се очајни и исплашени“, вели Мартин Дебенер, стручен консултант во советувалиштето. Слични искуства има и Меике Корс од советувалиштето за должници: „Гледаме дека има многу, кои се, на пример, од ниската средна класа, кои нормално би се снашле доста добро со својата плата, но сега на основа на кредити , високи кирии и високи трошоци за енергија и прехранбени производи, со нивниот приход се приклештени на ѕид“.
Истражувањето на Институтот за германска економија (IW) покажува дека енергетската криза директно влијае на ниската средна класа. Штом едно домаќинство троши повеќе од 10 отсто од својот приход на енергија, се смета за „енергетски сиромашно“.
Бројот на такви домаќинства се удвоил од 2021 година до мај 2022 година и сега изнесува 41 отсто од сите домаќинства од пониската средна класа. Тоа значи дека голем број луѓе ќе западнат во тешкотии бидејќи без финансиски резерви очекуваат експлозија на цените на енергенсите. Сахве вели дека задачата на политиката е да не ги заборави овие луѓе и насочено да им помогне.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Европа
Италијанскиот остров го забрани доаѓањето на туристи поради недостиг на вода
![](https://makfax.com.mk/wp-content/uploads/2024/06/kapri-italija-EPA.jpg)
Италијанскиот остров Капри денеска го забрани пристигнувањето на туристи поради недостиг на вода предизвикан од проблеми со снабдувањето од копното.
Градоначалникот на Капри, Паоло Фолко, ја прогласи забраната во седум часот наутро, поради што неколку фериботи веќе на пат кон островот мораа да се вратат назад.
Компанијата задолжена за снабдување на островот со вода објави дека има технички потешкотии во четвртокот, а иако подоцна објави дека ги решила, на Капри се уште му недостасува вода.
„Ситуацијата се влошува“
За време на објавувањето на забраната, Фалко предупреди на вонредна ситуација, велејќи дека иако во петокот имало малку вода на островот, акумулациите се празни.
„Ситуацијата се влошува со пристигнувањето на илјадници туристи секој ден во Капри“, рече тој.
„Забраната останува до понатамошно известување“
Жителите на тој остров во близина на Неапол имаат право на 25 литри вода за пиење по домаќинство, најави градоначалникот.
Забраната за пристигнување на туристи ќе остане на сила до понатамошно известување, додаде тој.
Капри, островот познат по своите бели вили, заливи и врвни хотели, има околу 13 илјади жители.
Европа
Барселона планира да забрани изнајмување станови на туристи
![](https://makfax.com.mk/wp-content/uploads/2021/05/barselona-turisti.jpeg)
Барселона денеска објави дека до 2028 година ќе го забрани издавањето станови на туристи, со што сака да го спречи растот на трошоците за домување и да им овозможи на граѓаните да живеат во свој град.
Левичарскиот градоначалник на градот, Жауме Колбони, рече дека до ноември 2028 година, Барселона ќе ги одземе лиценците на 10.101 станови кои моментално се лиценцирани за краткорочно изнајмување.
„Се справуваме со она што го сметаме за најголем проблем на Барселона“, рече Колбони на настанот на градската влада.
Краткорочниот бум на изнајмување во Барселона, најпосетуваниот град во Шпанија, остави некои граѓани да не можат да си дозволат кирија откако кириите се зголемија за 68 отсто, а цените на недвижниот имот за 38 отсто во изминатите 10 години, рече тој. Пристапот до домување стана двигател на нееднаквоста, особено за младите луѓе, додаде тој.
Во последните десет години, локалните власти воведоа ограничувања за краткорочно изнајмување на Канарските Острови, Лисабон и Берлин.
Социјалистичката министерка за домување на Шпанија, Изабел Родригез, рече дека ја поддржува одлуката.
„Станува збор за правење сè што е потребно за да се гарантира пристап до прифатливи станови“, објави таа на Икс.
Airbnb, платформата за изнајмување станови, не одговори на барањето за коментар.
„Колбони прави грешка што ќе доведе до сиромаштија и невработеност“, соопшти асоцијацијата за изнајмување на туристички станови во Барселона АПАРТУР, додавајќи дека забраната ќе доведе до зголемување на нелегалните изнајмувања на станови.
Одлуката ќе биде од корист за хотелите. Екстремно левичарската партија која владееше со Барселона од 2015 до 2023 година забрани отворање на нови хотели во најпопуларните области во градот, но Колбони навести дека може да ги ублажи ограничувањата.
Од хотелската асоцијација на Барселона не сакаа да ја коментираат веста.
Тие 10.000 станови ќе ги користат граѓаните или ќе завршат на пазарот под кирија или продажба“, рече градоначалникот.
Локалните власти најавија строги инспекции кога забраната ќе стапи на сила.
Во последниве години во Барселона не беше дозволена регистрација на нови туристички апартмани. Од 2016 година локалната власт нареди затворање на 9.700 диви туристички станови и речиси 3.500 станови повторно ги користат граѓаните за домување.
Европа
Русија: Треба да разговараме со САД, глобалната безбедност е загрозена, проблемите растат
![](https://makfax.com.mk/wp-content/uploads/2024/06/putin4-1.jpg)
Русија гледа итна потреба од безбедносни разговори со Соединетите Американски Држави, но тие мора да бидат сеопфатни и да го вклучуваат прашањето за Украина, соопшти денеска Кремљ. „Невозможно е да се извлечат поединечни делови од општиот комплекс на акумулирани проблеми, а ние нема да го сториме тоа“, рече портпаролот на Кремљ, Дмитриј Песков, на прашањето дали Москва е подготвена да разговара со Вашингтон за нуклеарните ризици.
„Отворени сме за дијалог, но за широк, сеопфатен дијалог кој ги опфаќа сите димензии, вклучително и сегашната димензија поврзана со конфликтот околу Украина, поврзана со директното учество на САД во овој конфликт“, рече Песков за новинарите. САД ги отфрлаат руските тврдења дека со вооружувањето на Украина станаа директен учесник во војната чија цел е да и се нанесе „стратешки пораз“ на Москва. Вашингтон вели дека какви било преговори за војната се во јурисдикција на Украина.
Руската позиција, како што ја претстави Песков, не е ништо ново, потсетува Ројтерс. Сепак, тој им рече на новинарите дека списокот на теми за кои Русија и САД треба да разговараат се зголемува. „Сè на сè, овој дијалог е многу неопходен. Неопходен е затоа што проблемите се натрупуваат, а има и многу тешкотии поврзани со глобалната безбедносна архитектура“, рече Песков.
Од перспектива на Вашингтон, рускиот претседател Владимир Путин, кој веќе трета година води војна во Украина, е одговорен за умножувањето на безбедносните проблеми.
Оваа недела Путин ја посети Северна Кореја, единствената земја која тестираше нуклеарно оружје во 21 век, и потпиша договор за заемна одбрана со нејзиниот лидер Ким Џонг Ун и рече дека можеби ќе му испрати руско оружје на Пјонгјанг како одговор на западното вооружување на Украина. .
Путин, исто така, во вторникот повтори дека размислува да ја ревидира руската доктрина за употреба на нуклеарно оружје. Најновиот договор за контрола на вооружувањето, кој го ограничува бројот на стратешки нуклеарни боеви глави што Русија и САД можат да ги распоредат, истекува во 2026 година.