Македонија
Тренчевска: Вашата поддршка како Амбасада на Кралството Шведска е од особена важност за нас како држава
Министерката за труд и социјална политика, Јованка Тренчевска, денеска оствари протоколарна средба со новата амбасадорка на Кралството Шведска во Република Северна Македонија, Ами Ларсон Јаин. На средбата се разговараше за поддршката на Кралството Шведска и Амбасадата којашто ја дава на Република Северна Македонија со акцент на влезот на државата во Европската Унија. Како теми на разговор беа и родовата еднаквост, како и зајакнувањето на капацитетите на жените со цел нивно полесно и поголемо вклучување на пазарот на трудот.
„Ви благодарам за вашата поддршка којашто ја покажавте кога се работи за прашањето за влез на Република Северна Македонија во Европската Унија. Како држава сме спремни да ги преземеме сите чекори за да обезбедиме подобар стандард на живот на нашите граѓани, кој е гарантиран со влезот во ЕУ“, рече Тренчевска.
Амбасадорката посочи дека од особена важност за државата e родовата еднаквост и овозможувањето на сите жени да се вклучат на пазарот на трудот. Таа истакна дека тоа особено влијае на зајакнувањето на економијата.
„Како Влада се залагаме во зголемување на капацитетите на градинките, особено во руралните средини преку програмата за Рамномерен регионален развој и на тој начин директно влијаеме на зголемувањето на можностите на жените за активна вклученост на пазарот на трудот во сите региони од државата. За нас од особена важност е да обезбедиме секоја жена да биде економски и материјално независна“, изјави Тренчевска.
Министерката посочи дека со новите измени на Законот за работни односи ќе има измени во делот на породилното отсуство со што подеднакво ќе се овозможи и на мажите и на жените отсуство од работа со користење на можноста за мајчинско, татковско и родителско отсуство.
На крајот од средбата присутните ја истакнаа важноста од досегашната соработка и посочија дека истата продолжува поинтензивно во следниот период, посебно за време на претседателствувањето на Република Шведска со Европската Унија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Две жени намамиле човек во мотел во Скопје, каде го пречекале двајца мажи: го удирале со боксови додека не паднал, па го ограбиле
Истрага против четири лица – двајца мажи и две жени поведе Основното јавно обвинителство Скопје за кривично дело – Разбојништво од член 237 став 4 во врска со став 1 од Кривичниот законик, бидејќи четворицата во група, со употреба на сила одзеле 200 илјади денари од едно лице.
На 30 октомври оштетениот со една од осомничените жени отишле во мотел во Скопје, по што таа му предложила да повика уште една девојка. Оштетениот се согласил и осомничената ја повикала другата жена, па заедно го убедиле оштетениот да одат во „поубав и поевтин хотел“.
Излегувајќи од собата, во темниот двор на мотелот, ги пречекале двајцата мажи кои биле во договор со жените и заедно му се нафрлиле на оштетениот. Го удирале со боксови по главата и телото додека не паднал на земјата, а од џебовите му ги одзеле парите, мобилниот телефон и личната карта.
Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за сите четворица осомничени, поради опасност од бегство и можност да го повторуваат делото. За една од осомничените жени која е во бегство откако го извршила делото, притворот ќе започне да се применува од нејзиното пронаоѓање и лишување од слобода.
Македонија
Поради поголем пламен и отпаднати делови од приколка на возило делницата од автопат А1 Велес – Градско е затворена
Поради поголем пламен и отпаднати делови од приколка на возило, во 01:20 часот делницата од Автопат А1 Велес – Градско е затворена и возилата се пренасочуваат по експресниот пат Градсско – Дреново до локализирање и ликвидирање на пожарот, извести АМСМ.
Сообраќајот на магистралниот пат Прилеп – Градско се одвива наизменично.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
Македонија
Без струја делови од Петровец, Чаир и Гази Баба
Од ЕВН Македонија АД известуваат дека денеска без електрична енергија ќе останат:
– во периодот од 08.30 до 11.30 часот, корисниците од селата Градманци, Летевци, Катланово и Брезница, општина Петровец;
– во периодот од 08.30 до 15.00 часот, корисниците од улицата Ордан Чопела, улицата Петре Георгиев и улицата Челопек, општина Чаир;
– во периодот од 09.00 до 13.00 часот, корисниците од улицата Вера Вучковска Жезељ во населба Хиподром, општина Гази Баба.

