Свет
Шефот на американската стратешка команда: „На повидок е подолг конфликт меѓу САД и Кина“
Адмиралот Чарлс А. Ричард, шефот на стратешката команда на САД, смета дека на повидок е голем конфликт меѓу САД и Кина. Според него, војната во Украина е само „загревање за подолг конфликт со Кина што им се заканува на САД“, пишува The War Zone.
Американскиот адмирал предупредува дека САД треба да се подготват за конфликт со Кина во блиска иднина.
Ричард смета дека конфликтот може да почне со некој агресивен чин на Кина кон Тајван.
Ричард, како шеф на американската стратешка команда, е одговорен за подготвеноста и состојбата на американскиот нуклеарен арсенал.
„Ова оружје може да се активира во случај на напад или одговор на напад со нуклеарно оружје лансирано од земја или море и од воздух“, оценува тој.
Адмиралот Ричард го искажа своето мислење пред неколку дена на симпозиум, а Министерството за одбрана на САД го објави потоа.
Ричард нагласи дека предноста на Америка во вооружувањето пред Кина полека се топи.
Тој рече дека војната во Украина е загревање и дека допрва претстои големиот конфликт со Кина.
„Наскоро ќе бидеме тестирани како што не сме биле долго време. Мораме да иницираме фундаментални и брзи промени во начинот на кој САД пристапуваат кон својата одбрана“, рече тој, според „The War Zone“.
Адмиралот вели дека не е премногу охрабрен од моменталната ситуација. Кога гледа на нивото на САД во одвраќањето на заканите на Кина, тој вели дека „американскиот брод полека тоне“. „Полека, но сè уште тоне, имајќи предвид дека Кинезите ги развиваат своите воени способности побрзо од нас“, рече тој.
„Нема да биде важно колку е добар нашиот оперативен план, колку се добри нашите команданти или колку е добро оружјето. Нема да имаме доволно од нив, и тоа е нашиот прв проблем“, вели шефот на американската стратешка команда.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Премиерот Фицо уште е во животна опасност, напаѓачот призна вина
Осомничениот за нападот врз словенечкиот премиер Јурај Цинтула денеска пред Специјализираниот кривичен суд во градот Пежинок призна вина. Состојбата на премиерот Фицо и понатаму е сериозна.
Обвинителството вчера побара притвор за 71-годишниот Цинтула поради евентуално бегство или повторување на кривичното дело. Напаѓачот беше спроведен под силно полициско обезбедување, а ниту на новинарите им беше дозволен влез во Судот.
Премиерот на Словачка, Роберт Фицо на 15 мај беше застрелан во градот Хандалова додека се поздравуваше со насобраниот народ. Цинтула веднаш по нападот е приведен.
Тој се соочува со обвинение за обид за убиство од одмазда, за што е предвидена казна од 25 години до доживотен затвор.
Словачките политичари изјавија дека нападот врз Фицо не е политички мотивиран.
Свет
Русија нема сила повторно да го нападне Киев, изјави Зеленски за АФП
Претседателот на Украина, Володимир Зеленски во интервју за Агенцијата Франс прес (АФП) изјави дека не верува оти Русија има сила повторно да го нападне Киев.
Тие немаат сила за голема офанзива против главниот град, како што имаа на почетокот на инвазијата, посочи Зеленски додавајќи оти главни цели на Кремљ се Харков и Донбас.
Тој ги обвини западните земји што му забраниле да ја нападне Русија со нивното оружје.
„Русите можат да не нападнат на наша територија, тоа е најголемата предност што ја има Русија, но ние не можеме да направиме ништо со западното оружје на нивните вооружени системи лоцирани на руска територија. Немаме право“, вели Зеленски.
Според него, Западот се плаши и од руски и од украински пораз и оваа ситуација ја нарече апсурдна.
„Ние сме во апсурдна ситуација кога Западот се плаши дека Русија ќе ја изгуби војната. А во исто време тие не сакаат Украина да ја изгуби. Затоа што конечната победа на Украина ќе доведе до пораз на Русија и конечна победата на Русија ќе доведе до пораз на Украина“, истакна Зеленски.
Регион
Пленковиќ, хрватскиот премиер кој доби трет мандат најави прва седница за понеделник
Откако хрватскиот Сабор вчера ја поддржа 16. Влада на Република Хрватска, а третата предводена од лидерот на Хрватската демократска заедница (ХДЗ) Андреј Пленковиќ, тој во изјава за медиумите рече дека првата седница на новата Влада ќе биде во понеделник и најави продолжување на посветената работа во интерес на хрватскиот народ.
„Благодарам на мнозинството во хрватскиот Сабор што ни ја укажа довербата да станеме Влада на Република Хрватска по трет пат и ние, како што правевме претходните осум години, посветено ќе работиме во интерес на хрватскиот народ, сите наши сограѓани, економијата, врската меѓу татковината и иселениците Хрвати и да спроведеме програма врз основа на која ја добивме довербата на хрватските гласачи“, рече Пленковиќ откако Собранието гласаше за неговата трета Влада
Тој им се заблагодари на сите партнери кои ја поддржаа Владата.
Пратениците во хрватскиот Сабор вчера гласаа за доверба на новата влада на премиерот Андреј Пленковиќ.
За доверба на Владата гласаа 79 пратеници, против беа 61 пратеник, а еден беше воздржан.