Македонија
Павле Трајанов ќе бара предвремени избори или Влада со сите партии
Павле Трајанов, претседател на Демократскиот сојуз, посочи дека на лидерската средба ќе го отвори прашањето за предвремени избори или влада со сите политички партии во неа. Според него, најважно прашање на кое ќе се дискутира ќе биде вклучување на Бугарите во Уставот, што би поддржале, само доколку Македонците бидат признаени во Бугарија.
„Ќе побарам прва точка за која ќе се разговара да биде упатување силна порака до Бугарија, политичкиот врв таму, да ги признаат Македонците како национална припадност и да ги остваруваат своите права. Да формираат клубови, асоцијации, како политички партии преку кои ќе ги негуваат своите обележја кои ја карактеризираат нацијата. Ова прашање ќе го покренам и ќе барам консензус. Досега никој од врвот не го покренува ова прашање. Уште помалку МНР. Никој не бара Македонците да ги добијат своите права, како што ги имаат Бугарите. Ќе побарам сите креативни кадри да бидат вклучени во процесот на скрининг, за формално почнување на преговорите со ЕУ“, кажа Трајанов.
Тој додаде дека ќе го отвори и прашање за функционирањето на системот во државата, бидејќи граѓаните се разочарани дека законите не се применуваат еднакво за сите и дека тој не функционира.
„Ќе го отворам и прашањето за темелни реформи за изборното законодавство, за една изборна единица, за системските предности на поголемите политички партии и ќе отворам, ако има услови за тоа, да се разговара за предвремени избори или Влада со сите политички партии. Треба да има сплотеност на сите во овие кризни услови“, додаде Трајанов.
Тој додаде дека нема ништо против Бугарите да бидат во Уставот, но ако Македонците бидат признаени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.