Македонија
Ислам Абази е нов шеф на местото од Русковска

Ислам Абази, гостиварскиот шеф на Вишото обвинителство, победи на изборите за шеф на Обвинителството за гонење организиран криминал и корупција, дознава „А1он“. Тој доби 66 гласа од вкупно 160 обвинители што можеа да гласаат.
На второ место, со 64 гласа, или два гласа помалку, заврши скопскиот обвинител Ермон Незири.
Пребројувањето е завршено, а се очекува и официјално да се презентираат резултатите.
За разлика од Незири и Абази, едноцифрен број гласови имаат обвинителката Деса Пауновска од гостиварското Вишо обвинителство и Вилма Русковска, која досега беше шефица на Обвинителството и бараше нов мандат.
Гостиварскиот обвинител Ислам Абази е непознат за јавноста дотолку повеќе што медиумите не можеа да најдат ниту фотографија од неговиот лик. Тој избегна и дебата во „А1он“, на која присуствуваа другите кандидати. Неговото оправдување беше дека има други обврски, а откога оставивме сам да одлучи кога може да дојде, тој не одговараше на пораките и на повиците. Исто постапи и со другите медиуми, каде што не одговараше на новинарски повици. Во јавноста се шпекулира дека зад неговата кандидатурата за шеф стои ДУИ. Тој никогаш не одговори дали се точни овие шпекулации.
За разлика од Абази, неговиот противкандидат, со кого води тесна битка, Ермон Незири, во дебатата на „А1он“ ги кажа сите критики, планови и визија за Обвинителството за гонење организиран криминал и корупција. Незири посочи дека 70-80 отсто е сигурен оти ќе победи на овие избори.
„Повторно излегоа на површина две тези: туристичка агенција и персонализација на Обвинителството. Барем јас така разбрав. Тоа е спротивно на она што јас планирам да го направам. Не може Обвинителството да се врзе со Ермон Незири. Таму има 15 обвинители, кои самостојно одлучуваат, за тоа земаат плата, искусни обвинители“, рече Незири, а прашан кој ги разочарал младите обвинители, тој рече: „Тоа секој си го сфаќа субјективно“.
Речиси 160 од обвинителите од целата држава денеска првпат гласаа за да изберат нов шеф на Основното јавно обвинителство за гонење организиран криминал и корупција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Силниот ветер ја влоши состојбата со пожарот во „Јасен“

Состојбата со пожарот во ловиштето „Јасен“ попладнево значително се влоши поради силниот ветер, информира директорот на Дирекцијата за заштита и спасување (ДЗС), Стојанче Ангелов.
„Јачината на ветрот постепено се зголемуваше и ни предизвика голема непријатност затоа што пожарот се движеше со исклучително голема брзина горејќи ги боровите стебла, создавајќи висока температура и многу густ и црн чад што удираше на гребенот. Нашата цел беше да го одбраниме гребенот и да не му дозволиме на овој пожар да прескокне преку гребенот од страната на селото Брезница, односно од скопска страна. Во тоа успеавме по неколку жестоки битки бидејќи огнот на неколку моменти префрли од другата страна, но благодарение на храброста на вработените во ‘Јасен’, лично овде е и директорот, еден од раководителите, со поддршка од екипа пожарникари од Македонски Брод, успеавме да го запреме по самиот гребен, ги изгаснавме местата на кои огнот префрли од другата страна и ја стабилизиравме ситуацијата“, рече Ангелов.
Пожарот сè уште се движи и создава густ чад што им предизвикува проблеми со дишењето на луѓето на теренот. На помош пристигнуваат пожарникари од Скопје, Велес и Куманово што ќе ги распоредат. Истовремено поддршка стигна и од вработените од Општината Сопиште кои цело време вршат дотур на вода, покрај другите активности. Тука се и припадници на Единицата за брзо распоредување (ЕБР) на МВР.
Македонија
Министерството за здравство формира независна меѓународна комисија по изјавата на Кедев за непотребни кардиолошки интервенции

Министерот за здравство, Азир Алиу, најави формирање комисија со експерти од три различни земји за проверка на работењето во приватните здравствени институции, но и продолжување на контролите во јавните здравствени установи кои се занимаваат со истата проблематика. Одлуката следи по изјавата на кардиохирургот, Сашко Кедев, дека во некои приватни болници се вршат непотребни интервенции со цел профит, вклучувајќи и стентирања и операции.
Алиу рече дека комисијата ќе биде независна и дека извештајот ќе служи како патоказ за понатамошни мерки. Од наредниот месец, приватните здравствени установи ќе мора да ги отворат базите со информации за кардиолошки интервенции, со цел Министерството да ги агрегира податоците и да има увид во здравствените патеки на граѓаните.
Министерот потврди дека има база со информации од 2019 до 2025 година за кардиолошки интервенции во јавните и приватните установи и дека ќе се сретне со д-р Кедев за понатамошна соработка. Фондот за здравствено осигурување, пак, ги следи сите прашања за квалитетот и законитоста на услугите, но оценката на медицинската оправданост останува надлежност на Државниот здравствен и санитарен инспекторат и специјалните комисии формирани од министерот.
Македонија
Никоски: Новата градинка во Потстаница, Драчево, значи подобра грижа за децата и поголема поддршка за семејствата

Како напредуваат градежните работи за новата градинка во Потстаница, Драчево, на лице место излезе да провери и директорот на Управата за заштита на животната средина и потпретседател на ВМРО-ДПМНЕ, Игор Никоски, заедно со премиерот Христијан Мицкоски, заменик-министерот за труд и социјала Ѓоко Велковски и градоначалникот на Општина Кисела Вода,Орце Ѓорѓиевски.
„Oвој објект e со вкупна површина од 300 квадратни метри и дополнително дворно уредување од 700 квадратни метри. Тој ќе обезбеди подобра грижа за децата и поголема поддршка за семејствата во овој дел од општината. Овој проект е доказ за нашата посветеност кон социјалниот развој и унапредување на квалитетот на животот во Кисела Вода“, рече директорот Никоски.
Градоначалникот на Кисела Вода, Орце Ѓорѓиевски, најави дека новата детска градинка ќе биде целосно завршена за само 20 дена и дека во неа ќе бидат згрижени 75 деца.