Македонија
Нинџа го тужи Стоилковски за клевета, oбвинува дека функционери од ВМРО-ДПМНЕ му предизвикале страв

Тензично помина рочиштето каде Александар Василевски-Нинџа, осуден и сведок во предметот „27 април“, го тужи портпаролот на ВМРО-ДПМНЕ, Наум Стоилковски, за клевета. Причината е прес-конференција каде портпаролот кажа: „Режимот на СДСМ/ДУИ пресуди над 200 години затвор заради изјавата на Александар Василевски-Нинџа, а тој ќе шета слободен по улиците. Над 200 години затвор, Нинџа помилуван од Пендаровски на предлог на Маричиќ и на Заев“.
Судијката Наташа Тодорова најпрво не овозможи тонско снимање на рочиштето со образложение дека нема услови, одби истото да го одложи додека не обезбеди судница со инсталирана опрема, не дозволи на новинарската екипа на „Макфакс“ да води забелешки, се закани со земање опрема за работа, го извади тужениот надвор од судница повикувајќи се на ЗПП, но не и на член од законот, а потоа го сослуша тужителот Василевски-Нинџа. Расправија имаше и меѓу Ружица Николовска, адвокатка на Стоилковски и судијката. Николовска бараше Стоилковски да остане во судницата, судијката да не прави суштествена повреда и да води рочиште без тонско снимање. Судијката Тодорова пак, во записник не нотираше сè што на рочиштето беше кажано, со образложение: „Судот одлучува што ќе влезе на записник“, што е спротивно за ЗПП. Сето ова, на крајот, по исказот на Нинџа, резултираше со барање за изземање на судијката, за кое треба да одлучи претседателот на судот.
„Останувам на тужбеното барање. Предлагам да се прифати“, кажа адвокатот Sвонко Давидовиќ на судењето, барајќи Стоилковски да биде осуден за упатена клевета, додека, пак, адвокатката Николовска побара барањето да биде одбиено.
Нинџа пред судот впери прст во претседателот на ВМРО-ДПМНЕ, Христијан Мицкоски, и други функционери дека со нивните изјави му ја загрозиле безбедноста и предизвикале страв. Тој во граѓански суд кажа дека тој во предметот „27 април“ се бранел, а не ги нападнал другите. Нинџа посочи дека бил обвинет, а не сведок.
„Во декември 2021 година на средствата за јавно информирање видов како лицето Наум Стоилковски дава изјава пред Министерството за правда во која кажува дека лицето Александар Василевски добил ослободување од страна на Пендаровски за лажните сведочења за случајот ’27 април’ каде луѓето кои лежат 211 години се осудени врз основа на негова лажна изјава, а тој се договара со Заев и Маричиќ да биде помилуван…Тоа кај мене побудува чувство на загрозеност и страв, за мене и мојата фамилија. Кажува нешто што не е точно, дека јас сум ги наклеветил за да добијат толку високи затворски казни“, кажа Василевски-Нинџа во дел од исказот.
Се правдаше дека не ги познава Зоран Заев и Бојан Маричиќ, кои беа премиер и министер за правда во тој период кога е давана изјавата од Стоилковски. Како факт дека се плашел и дека безбедноста му була загрозена наведе дека бил преместуван од затвор во затвор. Одново раскажуваше што правел на „27 април“, споменуваше имиња на началници во УБК, кажуваше какви наредби добивал од началниците
„Со осудените лица на 211 години другарувавме и бевме едно семејство, делевме иста соба… Потоа почна ‘хушкање’ дека еден од виновниците за казната сум јас. А тоа хушкање почна од телевизиски интервјуа на претседателот на ВМРО-ДПМНЕ Христијан Мицкоски. Потоа бев пренесен во затворот ‘Скопје’ во Шуто Оризари. Наум Стоилковски е капакот кога реков да се преземе некаква мерка, бидејќи притисокот веќе не можам да го трпам. Ме растревожи изјавата“, додаде Нинџа пред судот.
Адвокатката Ружица Николовска немаше ниту прашања за тужителот бидејќи немаше можност да се консултира со нејзиниот клиент, тужениот Стоилковски. Таа сметаше дека чекорите на судијката се тенденциозни. Кога во судницата влезе Стоилковски и почна да дава исказ, судијката реагираше зошто пред него има лист. Стоилковски, пак, возврати дека не чита.
„Немојте да читате, распит на странки е“, рече судијката Тодорова, а Стоилковски возврати: „Тек ако почнам да читам, ќе видите…“ и пред да ја доврши реченицата, судијката возврати: „Немојте да се заканувате“ и го опомена.
Стоилковски и Николовска обвинија за нетрпеливост и пристрасност на судијката Наташа Тодоровска на судењето и побараа нејзино изземање. Давањето исказ беше прекинато. За изземањето треба да одлучи претседателот на судот, Илир Сулејмани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Шукова: Зелен кеј, модерни вело рути и безбедни јавни простори во Ѓорче Петров

Кејот во Ѓорче Петров, требаше да биде симбол на урбано зеленило и активен живот, истакна Каја Шукова, кандидатка за градоначалничка на Скопје, порачувајќи дека жителите на Ѓорче Петров заслужуваат многу повеќе од кал, трње и лажни ветувања.
„Се сеќавате што ветија? Зелен спортски кеј, 40 километри вело и еко коридори. А што добија жителите, ниту спорт, ниту зеленило, само запуштен простор и уште едно разочарување. Ѓорче Петров е оставена општина, како да не е дел од Скопје“, истакна Шукова во изјава за медиумите.
Таа го посочи конкретниот потег од Влае до Хром, долг само еден ипол километар, како вистинска слика за неработењето и игнорирањето на основните потреби на граѓаните од страна на ВМРО ДПМНЕ. Според неа, тоа не е само урбанистички, туку и политички пропуст, симбол на нефункционален град.
„Ако некој не знае да поврзе само еден километар ипол, како очекувате да поврзе град, идеи и луѓе?“, праша Шукова.
Шукова најави проект за целосно уредување на овој простор. Планирана е современа, безбедна и зелена пешачко-велосипедска патека која ќе стане дел од континуирана, урбана врска помеѓу Ѓорче Петров, Карпош, Центар, Аеродром и Гази Баба, вистинска зелена оска низ срцето на градот.
„Во фокусот е создавање на простор којшто не служи само за транзит, туку за живот. Решенијата опфаќаат уредено корито, ново зеленило, јавни простори достапни за сите генерации и нов урбан пулс којшто ја враќа довербата на граѓаните во можноста за уреден, функционален и здрав град“, рече Шукова.
Таа најави дека Ѓорче Петров нема да биде третирано како периферија, туку како точка од која започнува вистинското поврзување.
„Имаме план, имаме решение, знаеме како. Нема повеќе празни ветувања ова е почетокот на ново, поврзано, зелено и живо Скопје“, истакна Шукова.
Македонија
Новата грејна сезона официјално почнува на 15 октомври: испораката на топлинска енергија ќе зависи од атмосферските услови

Од 15 октомври, официјално почнува грејната сезона 2025/2026 година за сите потрошувачи приклучени на системот за централно греење во градот Скопје, со кој управува АД ЕСМ. Преку системот се греат околу 66 000 активни потрошувачи, од кои 65 000 домаќинства и над 1 000 деловни потрошувачи, во кои се вклучени болници, здравствени домови, средни и основни училишта и детски градинки, велат од таму.
Испораката на топлинска енергија, како што појаснуваат, ќе се одвива секојдневно согласно строго утврдените правила и дијаграми што зависат од атмосферските услови и надворешните температури.
„Според правилата, во месец октомври и првата половина од ноември, кога временските услови често се менуваат, снабдувањето со топлинска енергија ќе зависи од температурата на воздухот и атмосферските услови во различни периоди од денот, односно кога температурите се пониски, испораката на топлинска енергија се зголемува, а кога се повисоки, се намалува. При точно утврдени атмосферски услови, кога надворешните дневни температури ќе достигнат одредени гранични вредности, испораката на топлинската енергија се прекинува, односно системот се исклучува. Веднаш по падот на температурите под утврдените гранични вредности, централното греење повторно се вклучува. Со ваквиот начин на регулирана испорака се обезбедува оптимална потрошувачка на топлинска енергија и минимални можни трошоци за греење на потрошувачите.
Воедно ја информираме јавноста дека систем операторот за пренос на гас НОМАГАС најави дека оваа година поради ремонтни активности на регионалните транспортни системи за пренос на природен гас и гасоводот „Турски тек“ се очекува од 13 до 17 октомври да има прекин во испораката на природен гас кон потрошувачите во земјава.
Очекуваме расположливите количини на гас во преносниот систем да бидат доволни за обезбедување квалитетна испорака на топлинска енергија, согласно надворешните температурни услови. Сепак, доколку во преносниот гасоводен систем со кој управува НОМАГАС не се обезбедат соодветни количини, можни се незначителни редукции на испораката на топлинска енергија кои нема значително да влијаат на комфорот на потрошувачите, и тоа само во периодот од 15 до 17 октомври“.
Апелираат до потрошувачите, заедниците на сопственици и управителите да ги обезбедат потребните услови за непречена испорака на топлинска енергија во објектите по почетокот на грејната сезона.
Потрошувачите и заедниците на сопственици е потребно да ги отстранат дефектите на внатрешната грејна инсталација во најкус можен рок, да овозможат непречен пристап на екипите на компанијата до топлинската станица, да обезбедат постојано напојување на топлинската станица со електрична енергија (платени сметки за електрична енергија за топлинската станица и функционална електрична инсталација).
„Во делови од градот каде се врши санација на дефекти на топлификациската мрежа, истите навремено се објавуваат на веб страницата ЕСМ Снабдување. Пред да пријават дефект или рекламација, важно за потрошувачите е да проверат дали нивниот објект се наоѓа на списокот на моментално затворени објекти кои во моментов немаат услови за испорака на топлинска енергија.
За дополнителни информации, пријави на дефекти или известувања за завршени интервенции, потрошувачите можат да се обратат до ЕСМ Снабдување – центарот за грижа на потрошувачи на телефонските броеви 02 3076 200 и 075 400 100, како и во службите на ЕСМ Енергетика на телефонските броеви 02 3104 816 и 02 3104 872“.
Македонија
(Видео) Манасиевски: РЕК со СДС плаќала двојно повеќе на „Марковски компани“ од година претходно

РЕК со СДС плаќала двојно повеќе на „Марковски компани“ од година претходно, а плаќано е и за еден камион неколку пати, затоа судиите на СДС го штитат газдата, обвини Валентин Манасиевски од ВМРО-ДПМНЕ.
„Имено, на 22 ноември 2022 година е склучен договор со Марковски компани, во вредност од 20 милиони евра. Само една година претходно, на 24 јуни 2021 година, за истата услуга се платени 13 милиони евра. Разликата е 7 милиони евра народни пари. Разликата во крајната сума не е единствениот проблем. Криминалот се случувал и внатре кога во комбинатот доаѓале камионите за мерење. При испораката на јаглен се користеле лажни фактури, истиот товар се наплаќал повеќепати, а депониите останувале празни. Ова не е грешка, ова е системски криминал. Аздисаноста на власта на СДС и желбата да се испумпаат милиони од РЕК и ЕСМ ги чини граѓаните стотици милиони евра кои очигледно завршиле надвор од Македонија, на фирми во Бугарија и Дубаи“, рече тој.
Заради ова, вели Манасиевски, судиите на СДС се борат газдата на Марковски да не заврши во притвор и да го спасат колку можат од страв дека ќе ги каже шемите и како и каде завршиле стотици милиони евра од тендерите кои неговата фирма ги добивала во РЕК и ЕСМ.