Европа
Србија, Австрија и Унгарија потпишаа документ за борба против илегалната миграција
Србија, Австрија и Унгарија потпишаа документ за зајакнување на трилатералната соработка во борбата против илегалната миграција, а една од целите е поместување на граничната одбрана кон југ.
Меморандумот за разбирање го потпишаа српскиот претседател Александар Вучиќ, австрискиот канцелар Карл Нехамер и унгарскиот премиер Виктор Орбан.
Дел од договорот е заеднички полициски патроли да ја контролираат границата со Северна Македонија.
На заедничката прес-конференција Орбан рече дека Србија има клучна улога во регулирањето на миграцијата бидејќи на овој начин „ги штити Австрија и Унгарија и другите земји од Унијата“.
Тој наведе дека годинава во соработка со Србија спречени се 250.000 обиди за илегални преминувања на границата и оти мигрантите се „сè поагресивни“, а оружје користат и криумчарите на луѓе. Орбан тврди дека единствениот начин да се спречи миграцијата е да се каже: „Нема преминување преку нашите граници“.
Тој оцени дека би било полесно да се бранат границите на Унијата доколку Србија веќе би била во ЕУ. „Србија требаше да биде примена вчера“, рече Орбан и нагласи дека неговата земја ќе се обиде да создаде коалиција од земји што ќе го забрза приемот на Србија.
Австрискиот канцелар Нехамер рече дека Австрија „јасно ја поддржува Србија и другите земји од Западен Балкан на патот кон ЕУ“ и додаде дека „Србија има важна безбедносна и стратешка улога“.
Вучиќ посочи дека европската интеграција „се уште е стратешка цел на Србија“, но оцени дека тоа е „процес кој ќе биде тежок“. Повикувајќи се на податоци од српските институции за регистрирани мигранти, тој рече дека најмногу мигранти се од Авганистан (40%), Сирија (27%), Мароко (12%), Бурунди (7%) и Пакистан (2%).
„Не сакаме да бидеме паркинг за илегални мигранти, иако разбираме и сме подготвени да им помогнеме на оние кои се во неволја“, рече Вучиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.