Свет
Поранешниот израелски премиер добил уверување од Путин дека нема да го убие Зеленски

Поранешниот израелски премиер Нафтали Бенет, на почетокот на 2022 година, беше посредник меѓу раководството на Русија и Украина.
Тој во интервју за израелскиот канал 12 рече дека рускиот лидер Владимир Путин на почетокот на специјалната операција во Украина го уверил дека ништо не му се заканува на украинскиот претседател Володимир Зеленски.
Ова беше прво интервју на Бенет откако се повлече од политиката во летото 2022 година. Сеќавајќи се на своето патување во Москва на 5 март 2022 година, каде што имаше средба со Путин во Кремљ, Бенет раскажа како продолжил разговорот за судбината на Зеленски.
„Знаев дека Зеленски e загрозен. Тој се криеше во некој вид бункер за кој никој не знаеше. Но во одреден момент, по три или четири часа од почетокот на средбата, прашав: „Кажете ми дали имате намера да го убиете“, ми одговори: „ Нема да го убијам Зеленски“, а потоа му реков: „Сакам да потврдам, дајте ми збор дека нема да го убиете Зеленски“, тој ми одговори: „ Нема да го убијам Зеленски“, ја даде Бенет својата верзија за содржината на разговорот со Путин.
По средбата во Кремљ, на пат кон аеродромот, Бенет му се јавил на Зеленски и го уверил дека не е во животна опасност. Веднаш потоа, истакна Бенет, украинскиот претседател „се врати во својата канцеларија и сними видео од неговиот кабинет“ во кое објави дека не се плаши од ништо.
Според израелскиот политичар, во тој момент рускиот лидер направил голема отстапка.
„ И таа сабота Зеленски направи многу голема отстапка… Одби да влезе во НАТО. Тоа беа огромни отстапки од двете страни“, смета поранешниот премиер.
Бенет исто така истакна дека украинскиот претседател побарал од него да се обрати до руското раководство по почетокот на специјалната операција, од негова страна тоа било „молба за помош“.
„ Зеленски ми се јави и ме замоли да контактирам со Путин. Имам сè снимено… Му беше многу тешко. Не заборавајте, во тој момент беше сигурен дека деновите му се избројани, дека имале намера да го убијат” изјави поранешниот шеф на владата.
Во исто време, тој додаде дека „целосно ги координирал сите свои акции“ со лидерите на САД, Велика Британија, Германија и Франција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп: Не грижете се, нема да има трета светска војна

Планетата повеќе не се движи кон трета светска војна, изјави американскиот претседател Доналд Трамп во интервју за новинарот Марк Левин.
Зборувајќи за конфликтот во Украина, тој истакна дека за време на администрацијата на поранешниот американски претседател Џо Бајден, ситуацијата само се влошувала.
„Мислам дека сè водеше кон трета светска војна, но сега не. Тоа е добра вест. Веќе не мора да се грижите за тоа“, рече Трамп.
„Ќе видиме како ќе се одвива процесот на решавање на кризата. Но, сè се движеше кон трета светска војна. Ова е најстрашната работа што се случила во однос на воените конфликти од Втората светска војна“, додаде тој.
Претседателот на САД, по средбата со претседателите на Русија и Украина, Владимир Путин и Володимир Зеленски, сака да ја процени можноста за дијалог меѓу нив без негово присуство.
„Имав многу успешна средба со претседателот Путин. Имав многу успешна средба со претседателот Зеленски. А сега помислив дека ќе биде подобро ако се сретнат без мене, само да видиме, сакам да видам што ќе се случи“, рече тој.
Трамп додаде дека, доколку е потребно, ќе им се придружи на Путин и Зеленски за да им помогне на страните да постигнат договор.
Фото: ЕПА
Свет
Ужас на базен во Швајцарија: 8-годишно дете случајно уби маж

Дете (8) уби маж на базен во Швајцарија. Ужасот се случи на 2 август, пред многу капачи.
Според извештаите, осумгодишно дете предизвикало смрт на шеесет и шестгодишен маж скокајќи од даска за скокање и удирајќи го човекот кој бил под вода.
Околу 14:30 часот, момчето се искачило на даската за скокање висока 5 метри. При влегувањето во водата, тој удрил 67-годишен пливач кој малку порано скокнал од истата даска и сè уште бил на местото.
И покрај брзата интервенција на службите за итни случаи, мажот, кој претрпел сериозни повреди, не преживеал, соопшти полицијата.
Обвинителството изјави дека семејството на детето само ја контактирало полицијата.
Како што истакна, спасувачите реагирале навремено и направиле сè што е во нивна моќ.
„Работата на спасувачите не била доведена во прашање на никаков начин во оваа фаза од истрагата. Интервенцијата била брза“, изјави обвинителството.
Според градот каде што се случила несреќата, спасувачите биле во полна сила во времето на несреќата. Лицето задолжено за надзор на базенот за скокање веднаш ги известило своите колеги за „судирот“ преку радио и скокнало во базенот за да ѝ помогне на жртвата.
Случајот ќе биде проследен до системот за малолетничка правда. Сепак, швајцарските медиуми забележуваат дека младиот пливач нема да потпадне под оваа регулатива, бидејќи таа се однесува само на деца над 10 години.
Свет
Трамп: Нетанјаху е воен херој, исто како мене

Американскиот претседател Доналд Трамп се нарече себеси „воен херој“ затоа што одобрил воздушни напади врз иранските нуклеарни објекти.
Појавувајќи се во радио емисијата на конзервативниот водител Марк Левин, Трамп рече дека израелскиот премиер Бенјамин Нетанјаху е воен херој затоа што работеле заедно.
„Тој е воен херој. Претпоставувам дека и јас сум. На никој не му е гајле. Но, и јас сум. Мислам, јас ги испратив тие авиони“, рече Трамп, очигледно алудирајќи на нападот што го нареди во јуни врз подземните нуклеарни објекти на Иран со цел уништување на нуклеарната програма на Техеран.
Нетанјаху е под потерница од Меѓународниот кривичен суд со месеци поради наводни воени злосторства во Газа.
Израелската офанзива врз Појасот Газа, која трае од нападот на Хамас на 7 октомври 2023 година, уби повеќе од 60.000 Палестинци, според извори контролирани од Хамас, додека Хамас тој ден убил околу 1.200 луѓе во Израел и киднапирал околу 200 и ги однел во Газа.
Самиот Трамп никогаш не служел во војна ниту служел во војската. За време на Виетнамската војна, тој добил пет одложувања на воената служба, вклучително и медицинско ослободување поради дијагноза на коскени израстоци на петиците кога имал 22 години.
Во 2015 година, тој предизвика контроверзии кога тврдеше дека републиканскиот сенатор од Аризона Џон Мекејн, кој поминал повеќе од пет години како воен заробеник во Северен Виетнам, не е воен херој затоа што, како што рече, повеќе ги сака луѓето кои не се заробени.
Во 2020 година, Атлантик објави дека Трамп приватно ги навредил паднатите американски војници, нарекувајќи ги „губитници“ и „наивни“. Трамп енергично ги негираше овие обвинувања.
Фото: ЕПА