Регион
Хаос во Грција поради снегот, затворени училишта и градинки
Атина денеска е покриена со снег, што предизвика прекин на сообраќајот и затворање на училиштата.
Во главниот град на Грција, кој не е навикнат на сурови зими, училиштата и градинките денеска ќе бидат затворени поради невремето Барбара, кое за време на викендот го зафати северниот дел на земјата.
Владата ги повика жителите да се движат помалку и да работат од дома бидејќи сака да избегне повторување на хаосот предизвикан од обилните снежни врнежи минатата година.
Услугата на метрото до меѓународниот аеродром во Атина, кој се наоѓа на 30-ина километри источно од центарот, е прекината. Затворен е и патот што води до аеродромот.
Во предупредувањата испратени до мобилните телефони цивилната заштита наведува дека до пладне се очекуваат „обилни снежни врнежи“ на поширокото подрачје на Атина.
Испитите на факултетите се одложени, а супермаркетите, аптеките и бензинските пумпи ќе работат до 18 часот по локално време.
Ќе бидат затворени и судовите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вулин: Голема Албанија може да ја спречат само Србите и српскиот свет, но и Грците
Вицепремиерот на Република Србија, Александар Вулин, реагира на собирот на албанската имиграција одржан во Атина, на која говореше албанскиот премиер Еди Рама и покрај противењето на грчките власти, пренесуваат српските медиуми.
„Следниот пат кога владата на Грција ќе размислува за признавање на таканареченото Косово, нека се сетат како изгледа пречекот на Еди Рама среде Атина“, напиша Вулин.
Според него, она што Рама не можеше да го доживее во Тирана – го доживеа во Атина.
„Признавањето на таканареченото Косово од грчките власти, а исто така и приемот на Приштина во Советот на Европа, би бил немерлив придонес на владата на Грција и Дора Бакојани за создавање голема Албанија. Само Србите и српскиот свет може да ја запрат голема Албанија, но и Грците, драги наши Грци, мислете на тоа“, рече Вулин.
Регион
Земјотрес ја погоди Албанија: се стресе во близина на границата со Црна Гора
Земјотрес со јачина од 3,4 степени според Рихтеровата скала синоќа ја погоди Албанија.
Земјотресот се случил во 2.20 часот по локално време.
Епицентарот на земјотресот бил на 28 километри од Скадар.
Со оглед на тоа што земјотресот бил со помал интензитет, се претпоставува дека нема повредени и поголема материјална штета.
Регион
Земјотрес ја погоди Хрватска, се стресе кај Петриња: „Нѐ разбуди, куќата ми се стресе кратко и силно“
Послаб земјотрес со јачина од 1,7 степен според Рихтеровата скала е почувствуван во 4.35 часот во Хрватска.
Епицентарот на земјотресот бил на 31 километар од Загреб и 20 километри од Велика Горица на длабочина од осум километри.
Според сведоштвата на граѓаните, земјотресот бил почувствуван на подрачјето на Петриња и Сисак, пишува „24сата.хр“.
„Куќата ми се затресе силно и кратко, како гром. Повторно се будам со познатиот звук и чкрипењето на куќата“, напиша сведок од Петриња на веб-страницата на Европско-медитеранскиот сеизмолошки центар (EMSC).
„Тежок тресок, гадно будење“, „Истовремен татнеж и тресок“, „Ова беше за будење. Кратко траеше. Како да е под куќата“, „Звук и краток силен удар“, пишуваат сведоци.