Ветуваа живот и борба со корупцијата, а во суштина донесоа историски најголема корупција, вели претседателот на ВМРО-ДПМНЕ, Христијан Мицкоски, за извештајот на меѓународната организација World Justice Project за мерење на индексот на владеењето на правото во државата.

Мицкоски смета дека високиот степен на криминал и корупција, како и невладеењето на правото во државата, се причина поради која граѓаните не гледаат надеж и се иселуваат од државата укажувајќи дека одредена политичка елита, која е блиска до Владата на ДУИ, поддржана од СДСМ, е заштитена како бела мечка.

Јасно се гледа дека корупцијата и криминалот во Македонија, како и невладеењето на правото практично се клучните проблеми зошто имаме и економска стагнација и зошто луѓето се иселуваат и губат надеж дека не може да биде подобро бидејќи очигледно е дека имаме определена политичка елита која арбитрира околу Владата на ДУИ, поддржана од СДСМ, и таа е практично заштитена како бела мечка што и да направи, каков било криминал, таа останува заштитена. И тоа предизвикува чувство на разочарување кај луѓето, а тоа чувство на разочарување се префрла потоа и во перцепцијата и во амбиентот во општеството, посочи тој.

Од ова рангирање може да забележите дека ако се споредат два периода, 2015 и 2022 година, ќе видите дека кога станува збор за корупцијата, таа е двојно влошена. Нели ветуваа живот и борба со корупцијата, а во суштина донесоа историски најголема корупција и доколку се забележи втората ранг-листа, тоа е ранг-листата за владеење на правото, ќе видите дека Македонија се наоѓа од 60-тото место, мислам дека беше, ако не се лажам 66-тото, а во 2015 година била на 40-тото место, што значи дека и тука за повеќе од 50-ина проценти е влошена перцепцијата, односно состојбата со владеењето на правото, рече Мицкоски.

Мицкоски потенцира дека идната влада на ВМРО-ДПМНЕ, која, освен реализирање на проектите, одлучно ќе спроведе борба против криминалот и корупцијата, како и криминалците во политиката.

За жал, имаме состојба во која владее корупцијата, а не владее правото, и владеат заштитени политички елити на Владата на ДУИ, поддржана од СДСМ. Но, набргу од денес ќе дојде една друга влада предводена од ВМРО-ДПМНЕ, која мотивирано, покрај реализирање на ветеното, ќе се впушти во одлучна борба со криминалот и корупцијата и криминалците во политиката, дециден е претседателот Мицкоски.