Премиерот Димитар Ковачевски не негира дека потрошил 26.000 евра на спонзорирање објави на социјалните мрежи во последните 100 дена. Тој на прес-конференција го правдаше ваквиот чекор наметнувајќи ја тезата дека тоа е начин за современа комуникација со јавноста. Ковачевски посочи дека овие средства не се платени од буџетот. Не одговори зошто во видеата главен фокус е тој наместо политиките, ниту дали е транспарентност кога јавноста гледа како тој дели пакетчиња на коледарите и му пеат песни.

„Не сметам дека се прави што било погрешно. Сметам дека дел од мојата работа и дел од работата на тимот што работи на комуникацијата на тоа што јас го работам е исто така транспарентноста. И да ги информира граѓаните што работат избраните и именувани функционери во однос на прашањата што ги засегаат граѓаните. Дилемата што вие ја поставувате е дали таа комуникација треба да се прави преку билборди, преку видеа, преку други канали. Тоа е веројатно дилемата што ја имате. Јас и ние што работиме во комуникацискиот тим сметаме дека во денешно време, ако сакате да прикажете нешто на јавноста, ова е начинот на кој тоа се прави, а со оглед на современите трендови и потреби на граѓаните за добивање информации. Важно е да се каже дека премиерот на државата оди во Минхен на безбедносна конференција, каде што се сретнува со светските лидери. Изборот е пак дали тоа да се направи преку соопштение, прашање е колку денес се читаат соопштенија или се гледаат видеа или други презентации на социјалните медиуми. И дали ќе користите методи на комуникација стари и по 150 години или од поново време, адаптирани на публиката. На крајот, важна е транспарентноста, сè е транспарентно“, рече Ковачевски.

Според него, ако на граѓаните им пречи што тој прави видеа и ги спонзорира за 26.000 евра, кои ги троши во 100 дена, тоа ќе го кажат на избори.

„Ако граѓаните не го сакаат тој вид комуникација, тоа ќе го кажат на избори. Јас спроведувам социјалдемократски политики. Ниту еден денар не е од буџетски средства ниту, пак, некој вработен во Секторот за комуникации при Владата за да ја сработува комуникацијата. Денеска, подготвувањето видеа и анимации се прави преку разни комуникации. Нивната изработка е поедноставна од минатото“, додаде тој.